នៅសល់តែប៉ុន្មានម៉ោងទៀតប៉ុណ្ណោះ ការប្រកួតវគ្គផ្ដាច់ព្រ័ត្រនៃពានរង្វាន់បាល់ទះ Special Volleyball Challenge 2021 មកដល់ហើយ ដោយសមាគមបាល់ទះវិសាខា ត្រូវជួបក្រុមក្រុមបាល់ទះ PS Concrete លើទីលានពហុកីឡដ្ឋានព្រីសន៍ (ម្ដុំហ្រ្គេនភ្នំពេញ) ខណៈគ្រូបង្វឹករបស់ក្រុមទាំង២សុទ្ធតែលើកឡើងពីទស្សនៈខុសគ្នាមុនជំនួបតានតឹងមកដល់។
ប្រាប់មកកាន់ក្រុមការងារសារព័ត៌មានត្រយង លោក នៅ សាម៉េត គ្រូបង្វឹកក្រុមសមាគមបាល់ទះវិសាខា បានលើកឡើងថា៖«គ្រប់គ្នាដឹងថាហើយនេះជាវគ្គតានតឹង។ ការប្រកួតគឺត្រូវការឈ្នះរៀងៗខ្លួន។ តែយើងក៏ត្រូវតែលេងឱ្យអស់ពីសមត្ថភាពដូចគ្នា។ ក្រុមដែលឡើងមកដល់វគ្គនេះគឺជាក្រុមមានសមត្ថភាពដូចគ្នា។ ប៉ុន្ដែសម្រាប់ពួកយើងគឺត្រូវការជ័យជម្នះជាចាំបាច់ ដើម្បីឈ្នះពាន»។
លោក នៅ សាម៉េត មានសមាជិកក្រុមដូចជា សួន ចាន់ណារ៉ូ, គូន ម៉ុម,វឿន វាសនា,សឿន ហេង, មួន និមល និងឈឹម ឈាងនី។ គិតត្រឹមពេលនេះក្រុមវិសាខា មិនទាន់ស្គាល់បរាជ័យទាល់តែសោះ។
គ្រូបង្វឹករូបនេះបន្ថែមថា៖«យើងដឹងហើយថានេះជាការប្រកួត ដែលលេងតំណាងក្រុមរៀងខ្លួន អ្នកណាខ្លាំងជាងគឺឈ្នះពាន។ យើងមិនមានការយោគយល់គ្នាទេ បើវ៉ៃដាច់បានគឺដាច់។ ពេលចូលទីលានគឺប្រកួតដើម្បីក្រុមរៀងខ្លួន តែចេញពីទីលានជារឿងផ្សេងមួយទៀត។ សម្រាប់ខ្ញុំបានរៀបចំកូនក្រុមរួចហើយ កូនក្រុមខ្ញុំវិញរីករាយដែលបានឡើងមកដល់វគ្គនេះ ហើយត្រៀមខ្លួន១០០%ហើយសម្រាប់ការប្រកួតនេះ»។
ដោយឡែកលោក ម៉ី រស្មី គ្រូបង្វឹកក្រុម PS Concrete វិញបានលើកឡើងដែរថា៖«នេះជារឿងនឹកស្មានដល់ថាយើងមកជួបគ្នានៅវគ្គនេះ តែយើងនឹងខិតខំប្រឹងប្រែងដើម្បីបញ្ជាក់ឱ្យឃើញពីសមត្ថភាពក្រុម»។ កូនក្រុមរបស់បុរសដែលធ្លាប់ចេញទៅប្រកបអាជីពប្រទេសថៃ រូបនេះមាន ពិន សារុន, ខឹម សុវណ្ណដារ៉ា, ឡាង រាសីកែវ, ផុល រតនៈ,ម៉ន សុខនាង និង គង់ ពិសិដ្ឋ។
កាលក្នុងវគ្គចែកពូល ក្រុម PS Concrete បានយកប្រកួតចាញ់លើក្រុមវិសាខា ម្តងមកហើយដោយលទ្ធផល២ សិតទល់០ ខណៈលោក ម៉ី រស្មី បញ្ជាក់ថា៖«ចំពោះការខ្វះខាតរបស់កូនក្រុមបើប្រៀបធៀបទៅក្រុមវិសាខា គឺខុសគ្នាឆ្ងាយ ព្រោះបើមើលទៅក្រុមវិសាខា រកមិនឃើញចំណុចខ្វះខាតសោះ»។
សូមបញ្ជាក់ថាការប្រកួតវគ្គចុងក្រោយនេះមានចំនួន២គូគឺ៖
-វគ្គចំណាត់ថ្នាក់លេខ៣ ក្លិបបាល់ទះក្រសួងមហាផ្ទៃ ប៉ះ ក្រុមបាល់ទះអធិរាជប្រអប់ ម៉ោង២រសៀល
-វគ្គផ្ដាច់ព្រ័ត្រ សមាគមបាល់ទះវិសាខា ប៉ះ ក្រុមបាល់ទះ PS Concrete ម៉ោង៣:៣០នាទីរសៀល
សូមបញ្ជាក់ថាមានក្រុមចំនួន១១ ក្រុមចូលរួមប្រកួតក្នុងពានរង្វាន់ Special Volleyball Challenge 2021 ដោយក្នុងនោះពូល A មានក្លិបបាល់ទះ S&E Cambodia, ក្លិបបាល់ទះកោះដាច់, ក្លិបបាល់ទះកងពលអន្តរាគមន៍លេខ៣,ក្លិបបាល់ទះស្នងការដ្ឋាននគរបាលរាជធានីភ្នំពេញ,ក្លិបបាល់ទះ PS Concrete និងសមាគមបាល់ទះវិសាខា។ ពូល B មាន ក្លិបបាល់ទះគង់នៅវត្តប្រាសាទ,ក្លិបបាល់ទះក្រសួងមហាផ្ទៃ,ក្លិបបាល់ទះយុវជនស្រុកល្វាឯម,ក្លិបបាល់ទះអធិរាជប្រអប់ និងក្លិបបាល់ទះយុវជនខេត្តបន្ទាយមានជ័យ។
ការប្រកួតសន្សំពិន្ទុក្នុងពូលពីថ្ងៃទី២៤ កញ្ញា ដល់ថ្ងៃទី១០ តុលា ឆ្នាំ២០២១ ដោយក្រុមចំណាត់ថ្នាក់លេខ១និងលេខ២តាមពូលនីមួយៗ មានឈ្មោះឡើងទៅវគ្គពាក់កណ្ដាលផ្ដាច់ព្រ័ត្រ និងបន្តប្រកួតវគ្គផ្ដាច់ព្រ័ត្រ។ ក្រុមជើងឯកនឹងទទួលបានពានចំនួនមួយ និងថវិកាចំនួន ១០លានរៀល ក្រុមជើងឯករងទទួលបានរង្វាន់ជាថវិកាចំនួន ៨លានរៀល និងក្រុមចំណាត់ថ្នាក់លេខ៣ ទទួលរង្វាន់ជាថវិកាចំនួន ៦លានរៀល។
ក្រៅពីនោះគណៈកម្មការក៏មានការជ្រើសរើសកីឡាករសម្រាប់ពានរង្វាន់ឯកត្តជនដែរដោយកីឡាករវាយប្រយុទ្ធល្អជាងគេ (The Best Spiker),កីឡាករលើកបាល់ល្អជាងគេ (The Best Blocker) និងកីឡាករឆ្នើម (MVP), កីឡាករលើកល្អជាងគេ (The Best Setter), កីឡាករវាយសេវាល្អជាងគេ (The Best Server) និងក្រុមដែលប្រកួតដោយយុត្តិធម៌ (Fair Play) ដែលផ្ដល់ជូនជាពានរង្វាន់ចំនួនម្នាក់១ អមដោយរង្វាន់ជាថវិកាចំនួន ៤សែនរៀល៕