ភាពយន្តភាគរបស់កូរ៉េខាងត្បូងដែលលើកឡើងពីបញ្ហាអ្នកជំពាក់បំណុលវ័ណ្ឌកចូលរួមលេងហ្គេមមរណៈបែបកូនក្មេងដើម្បីដណ្ដើមប្រាក់រង្វាន់ទៅដោះបំណុល កំពុងតែល្បីល្បាញខ្លាំង ទោះជារឿងបានបញ្ចប់ទៅហើយក្ដី ប៉ុន្តែនៅតែបន្តប្រជាប្រិយភាពរបស់ខ្លួនព្រោះថ្មីៗមានអ្នកគាំទ្រជាច្រើនបានសំរុកទិញឈុតពីក្នុងភាពយន្តនេះ ដើម្បីត្រៀមសម្រាប់ស្លៀកពាក់នៅថ្ងៃទី៣១ ខែតុលា ដែលជាថ្ងៃ Halloween។
យោងតាមគេហទំព័រ WWD fashion មួយសប្ដាហ៍មុននេះ សំលៀកបំពាក់ឯកសណ្ឋានក្នុងរឿង «Squid Game» ស្ថិតក្នុងបញ្ជីស្វែងរកច្រើនជាងគេបំផុតនៅលើ Google ក្នុងនោះមានឈុតពណ៌បៃតងប្រើសម្រាប់ឱ្យបេក្ខជនស្លៀកប្រកួតលេងហ្គេម និងឈុតឯកសណ្ឋានពណ៌ផ្កាឈូកសម្រាប់ឱ្យក្រុមអង្គរក្សបិទមុខ។
Netflix បានចេញលក់សំលៀកបំពាក់ពីក្នុងភាពយន្តនេះ ក្នុងនោះមានអាវយឺតនិងអាវគ្របក្រៅ ដើម្បីបំពេញចំណង់របស់អ្នកទស្សនានិងសាធារណៈជន ដោយតម្លៃចាប់ពី៣៤.៩៥ដុល្លារអាមេរិកឡើងទៅ។ យោងតាមវែបសាយលក់សំលៀកបំពាក់ Amazon UAE ឈុតរបស់ Netflix ខាងលើស្ថិតក្នុងបញ្ជីជាឈុតដែលលក់ដាច់ជាងគេបំផុត។
ជាងនោះទៀត ឈុតក្នុងរឿង «Squid Game» នេះក៏ជាឈុតដែលត្រូវបានសាធារណជនស្វែងរកដើម្បីប្រើប្រាស់ជាឈុតស្លៀកសម្រាប់កម្មវិធី Halloween នៅបញ្ជីលើគេផងដែរ។
ចាប់តាំងពីភាពយន្តភាគជាស៊េរី Squid Game បានបញ្ចេញឱ្យទស្សនានៅលើ App Netflix មករឿងនេះបានក្លាយជាវីដេអូរឿងមួយដេលបំរើឱ្យសេវាកម្មទស្សនាច្រើនបំផុត វ៉ាដាច់រឿងភាគមនោសញ្ចេតនាល្បី Bridgerton ថែមទៀតផង។
មិនត្រឹមតែចំនួនឯកសណ្ឋានក្នុងរឿងដែលនឹងត្រូវប្រើប្រាស់ជាឈុត Halloween សូម្បីតែស្ករបុរាណរបស់កូរ៉េ ដែលត្រូវប្រើមកធ្វើជាវិញ្ញាសារក្នុងការប្រកួតក៏បាននឹងកំពុងល្បីល្បាញខ្លាំងដូចគ្នា លើសពីនោះទៀតចំនួនអ្នកគាំទ្រក៏រំអុកចង់ឱ្យ «Squid Game» បញ្ចេញរដូវកាលទីពីរឬវគ្គ២ផងដែរ ទោះជាអ្នកនិពន្ធនិងដឹកនាំលោក Hwang Dong Hyuk ធ្លាប់ប្រាប់សារព័ត៌មាន Variety កាលពីពេលថ្មីៗនេះថា «គ្រាន់តែគិតថាដល់រឿងនេះធ្វើឱ្យលោកហត់បាត់ទៅហើយ»៕