យោងតាមសារព័ត៌មាន Theguardian តារាចម្រៀង Ed Sheeran បានប្រកាសនៅផេក Instagram របស់លោកថា លោកមានវិជ្ជមាន ជំងឺ Covid-19 ហើយកំពុងតែធ្វើចត្តាឡីស័ក។
ម្ចាស់បទ «Shape of You» បានឱ្យដឹងទៀតថា «ពេលនេះខ្ញុំមិនអាចចេញក្រៅឬទំនាក់ទំនងដោយផ្ទាល់បានទេ ដូច្នេះខ្ញុំនឹងព្យាយាមធ្វើបទសម្ភាសន៍ ក៏ដូចជាការច្រៀង និងសម្ដែងឱ្យបានច្រើនបំផុតតាមដែលអាចធ្វើបានចេញពីផ្ទះទៅ។ សុំទោសចំពោះអ្នកគ្រប់គ្នាដែលធ្វើឱ្យលំបាក។ សូមមានសុខសុវត្ថិភាពគ្រប់ៗគ្នា»។
ខណៈនេះ Ed Sheeran បានធ្វើចត្តាឡីស័ក និង អនុវត្តតាមការណែនាំរបស់រាជរដ្ឋាភិបាល។ ដំណឹងនេះបានផ្សព្វផ្សាយនៅមុន ៥ថ្ងៃ នៃកាលបរិច្ឆេទចេញអាល់ប៊ុមចម្រៀងថ្មីរបស់លោកដែលកំណត់ចេញនៅថ្ងៃសុក្រទី២៩ ខែតុលាខាងមុខនេះ។ Ed Sheeran មានផែនការប្រគំតន្ត្រីបទចម្រៀងថ្មីរបស់ខ្លួននៅសប្ដាហ៍ក្រោយ ព្រមទាំងមានគម្រោងសម្ភាសន៍ជាមួយនឹងបណ្ដាញផ្សព្វផ្សាយជាច្រើនថែមទៀត ប៉ុន្តែគម្រោងមួយភាគធំត្រូវផ្លាស់ប្ដូរដោយសារលោកមានវិជ្ជមានជំងឺកូវីដ-១៩។
ថ្វីត្បិតតែ Ed Sheeran ស្នើសុំសម្ដែងតាមរយៈវីដេអូ Live ចេញពីផ្ទះរបស់លោកសម្រាប់កម្មវិធី Saturday Night Life ដែលលោកនឹងឡើងជាតារាកិត្តិយសនៅថ្ងៃទី៦ ខែវិច្ឆិកា ឆ្នាំ២០២១ ខាងមុខនេះក្ដី ប៉ុន្តែប្រភពខាងក្នុងបានឱ្យដឹងថាកម្មវិធីចង់ជំនួសវត្តមានលោកដោយ Justin Bieber ឬ Shawn Mendes ដែលត្រូវឡើងសម្ដែងក្នុងកម្មវិធីនេះដែរ។
កាលពីកំឡុងឆ្នាំ ២០២០ មានតារាហូលីវូដ Super Star ក្នុងវិស័យកីឡា ខ្សែរាជវង្ស និងអ្នកនយោបាយជាច្រើនបានឆ្លងវីរុសកូរ៉ូណា ក្នុងនោះមានព្រះអង្គម្ចាស់ឆាលនៃចក្រភពអង់គ្លេស ,នាយករដ្ឋមន្ត្រីអង់គ្លេស Boris Johnson, និង តារាបាល់ទាត់សញ្ជាតិព័រទុយហ្គាល់ Christiano Ronaldo ជាដើម។
សូមជំរាបថា ម្ចាស់បទ «Perfect» និង «Bad Habits» រូបនេះបានចេញមកប្រកាសដំណឹងស្ដីពីការឆ្លងជំងឺកូវីដ-១៩ នៅលើផេក Instagram របស់លោក កាលពីថ្ងៃអាទិត្យទី២៤ ខែតុលា ឆ្នាំ២០២១៕