លោក អ៊ឹម រតនៈ ហៅ Tin Mark គឺជាអ្នកនិពន្ធទំនុកច្រៀងបទចម្រៀងល្បី «ស៊ូឃ្លាត» ដែលបកស្រាយដោយលោក វង្ស តារារតនៈ នៅក្នុងផលិតកម្មហង្សមាស ខណៈនេះលោកកំពុងតែសំរាកព្យាបាលជំងឺកូវីដ-១៩ នៅក្នុងមន្ទីរពេទ្យឯកជនមួយកន្លែង។
លោក Tin Mark បានថ្លែងអំណរគុណចំពោះមិត្តសិល្បៈ និងសប្បុរសជន ដែលជួយឧបត្ថម្ភថវិការជួយលោកយកមកព្យាបាលជំងឺកូវីដ-១៩ ប៉ុន្តែលោកមិនភ្លេចផ្ដាំចំពោះអ្នកខ្វះលទ្ធភាពដូចគ្នាឱ្យទុកប្រាក់ដោះស្រាយជីវភាពចុះ មិនបាចជួយលោកទេ។
កាលពីវេលាម៉ោងជាង៣ រសៀលថ្ងៃទី២៥ ខែតុលា ម្សិលមិញនេះ អ្នកនិពន្ធទំនុកច្រៀង «ស៊ូឃ្លាត» បានចេញមកទម្លាយពីការឆ្លងជំងឺកូវីដ-១៩ ប៊ិះនឹងស្លាប់បាត់បង់ជីវិត ប៉ុន្តែលោកប្ដេជ្ញាសងប្រាក់បងប្អូនដែលឱ្យខ្លួនខ្ចីសង្គ្រោះជីវិត។ ប៉ុន្តែនៅវេលាម៉ោងជាង៨យប់ថ្ងៃដដែលអ្នកនិពន្ធទំនុកច្រៀងរូបនេះបែរពោលអរគុណចំពោះមិត្តសិល្បករ និងម្ចាស់ជំនួយ ដែលបានជួយឧបត្ថម្ភថវិការជួយដល់ខ្លួនទោះតិចឬច្រើន តែបើសិនមានជីវភាពខ្វះខាតដូចជាលោកមោះ មិនបាច់ជួយលោកនោះទេលោកសូមឱ្យទុកថវិការនោះជួយផ្គត់ផ្គង់ជីវភាពគ្រួសារខ្លួនឯងចុះ ព្រោះមានជីវភាពខ្វះខាតដូចជាលោកដែរ។
យ៉ាងណាមិញនៅក្រោមការប្រកាសរបស់លោកក៏នៅមានសប្បុរសជនបានបន្តចូលរួមជួយទៅតាមលទ្ធភាពក្នុងនោះមានអ្នកសិល្បៈមួយចំនួនក៏ចូលរួមជួយដែរ ក្នុងនោះមាន តារាចម្រៀងលោកអ៊ីណូ តារាសម្ដែងនិងម៉ូដែលអ្នកនាង ប្រាសាទ ដាវី និង តារាចម្រៀង លោក ឆាយ ណាឃីម ជាដើម។ ចំពោះសាធារណជនដែលអាណិតស្រលាញ់អាចចូលរួមជួយលោកតាមរយៈ អាក់ខោន ABA ដែលមានលេខ : 000785157 និង ឈ្មោះ IM RATTNAK
គួរដឹងថាលោក អ៊ឹម រតនៈ ហៅ ទិនម៉ាក់ ត្រូវវីរុសកូវីដ-១៩ វាយលុយស៊ីអស់សួតមួយចំហៀង ហើយត្រូវចំណាយទឹកប្រាក់ព្យាបាលមួយថ្ងៃអស់ ១២០០ដុល្លារ ដើម្បីថ្លៃព្យាបាល ខណៈលោកបាត់ចំណូលពីសិល្បៈ ៨ខែមកហើយ៕
