យោងតាមការចុះផ្សាយរបស់សារព័ត៌មាន Khaosod (ខាវស៊ុត) រដ្ឋមន្ត្រីក្រសួងទេសចរណ៍និងកីឡា ភិភ័ត រ៉ាត់ឆៈកិច្ចប្រាក់កាន បានអះអាងប្រាប់បណ្ដាសារព័ត៌មានថា តារាចម្រៀងលំដាប់ពិភពលោក Lisa សមាជិកក្រុម Blackpink និងលោក Andrea Bocelli តារាចម្រៀងអូប៉េរ៉ាលំដាប់ទីមួយពិភពលោកជនជាតិអ៊ីតាលី នឹងមកច្រៀងក្នុងកម្មវិធីប្រគំតន្ត្រីរាប់ថយក្រោយដ៏ធំនៅប្រទេសថៃ នៅចុងឆ្នាំ២០២១ ឈានចូលឆ្នាំ ២០២២ខាងមុខនេះ។
តារាចម្រៀង K-Pop សញ្ជាតិថៃ Lisa នឹងហោះមកកាន់ប្រទេសកំណើត ដើម្បីចូលរួមច្រៀងនិងសម្ដែងក្នុងការប្រគំតន្ត្រីដាច់ឆ្នាំដ៏ធំដែលមានរយៈពេល៣ម៉ោងពេញនៅខេត្តភូកេត។
យោងតាមប្រសាសន៍របស់រដ្ឋមន្ត្រីខាងលើបានឱ្យដឹងថាតម្លៃខ្លួនរបស់សិល្បករទាំងពីររូបគឺ Lisa និង Andrea (អាន់ដ្រេអា) រួមគ្នាមានតម្លៃប្រមាណ១០០លានបាត ខណៈដែលកញ្ចក់ថវិការសរុបចំណាយលើការរៀបចំកម្មវិធីទាំងមូលមាន ២០០លានបាត ហើយនៅសប្ដាហ៍ក្រោយនឹងមានការចុះកិច្ចសន្យារួមគ្នាជាផ្លូវការជាមួយនឹងតារាចម្រៀងទាំងពីរដួង។
ថ្មីៗនេះអ្នករៀបចំកម្មវិធីបានចេញមកបង្ហើបឱ្យដឹងដែរថាមានការផ្លាស់ប្ដូរការច្រៀងនិងសម្ដែងរបស់ Lisa និង Andrea នៅលើវេទិកា ដោយកម្មវិធីតម្រូវឱ្យអ្នកទាំងពីរឡើងច្រៀងនៅលើឆាករួមគ្នា ចាំមើលតើ Collaboration រវាងចម្រៀង K-Pop និង តន្ត្រីអូប៉េរ៉ា នឹងចេញទៅគួរឱ្យចាប់អារម្មណ៍ប៉ុណ្ណា?
ការរៀបចំកម្មវិធីប្រគំតន្ត្រី Count Down ដ៏ធំនៅប្រទេសថៃលើកនេះត្រូវបានមន្រ្តីក្រសួងទេសចរណ៍ថៃលើកឡើងថាជាការរៀបចំ Event ដ៏ធំប្រចាំឆ្នាំ ដែលនឹងជួយខេត្តភូកេតក្លាយជាខេត្តទេសចរណ៍ធំលំដាប់ពិភពលោក។
ថ្វីត្បិតតែមានការអះអាងពីរដ្ឋមន្ត្រីទេសចរណ៍និងកីឡារបស់ថៃថានឹងមានវត្តមានរបស់ LISA នៅប្រទេសថៃក្នុងកម្មវិធីប្រគំតន្ត្រីចុងឆ្នាំ២០២១-ដើម២០២២ ក្ដី ប៉ុន្តែដរាបណាដែល Agency និង Lisa មិនទាន់ចុះកិច្ចកុងត្រាជាផ្លូវការ គ្រប់យ៉ាងអាចនឹងមានការផ្លាស់ប្ដូរ៕
