សារព័ត៌មានកូរ៉េខាងត្បូងបានធ្វើសេចក្ដីរាយការណ៍ថា Taeyeon ប្រធានក្រុម SNSD (Girl’s Generation) បានក្លាយជាជនរងគ្រោះម្នាក់ក្នុងចំណោមជនរងគ្រោះ៣០០០នាក់ផ្សេងទៀតចាញ់បោកទិញដីខ្យល់របស់ក្រុមហ៊ុនអចលនទ្រព្យមួយ។
នៅថ្ងៃទី២៨ ខែតុលា មានសេចក្ដីរាយការណ៍ថាកញ្ញា A សមាជិកក្រុម Girls Group គឺជាជនរងគ្រោះម្នាក់ក្នុងចំណោម៣០០០នាក់ បានបាត់លុយដោយសារតែត្រូវក្រុមហ៊ុនអចលនទ្រព្យបោកប្រាស់សរុបទាំងអស់គ្នាមានចំនួន ២៥០០០០លានវ៉ុន។ បន្តមកទៀតមានការបង្ហើបឱ្យដឹងថាA នោះគឺ Taeyeon សមាជិក SNSD ដោយកញ្ញាបានបាត់លុយសរុបជារួមរហូតដល់ ១.១ពាន់លានវ៉ុន (ប្រមាណ 901,334 ដុល្លារ)។
នៅក្នុងសារព័ត៌មាននោះក៏បានបង្ហើបឱ្យដឹងដែរថា Taeyeon បានទិញដីនៅតំបន់ Hanam នៅក្នុងខេត្ត Gyeonggi ដោយតម្លៃជាង៩ម៉ឺនដុល្លារ ពីក្រុមហ៊ុនអចលនទ្រព្យដ៏ធំមួយ ដោយលោកឪពុករបស់តារាចម្រៀងរូបនេះបានទិញពីក្រុមហ៊ុនដោយដាក់ឈ្មោះកូនស្រីកាលពីឆ្នាំ២០១៩ តែក្រោយមកទើបដឹងថាផ្ទៃដីនោះជាតំបន់អភិរក្សព្រៃភ្នំ ដែលមិនអនុញ្ញាតឱ្យប្រើប្រាស់ឬអភិវឌ្ឍអ្វីទាំងអស់នៅតំបន់នោះ ក្រៅពីការកសាងដើម្បីបំរើសម្រាប់ផលប្រយោជន៍ទាហានឬបម្រើឱ្យប្រយោជន៍សាធារណៈ ដូច្នេះតំបន់នោះមិនអាចយកមកអភិវឌ្ឍឬធ្វើអ្វីបាននោះទេ ដោយសារតែជាទីតាំងត្រូវរក្សាទុកតាមច្បាប់អភិរក្សព្រៃភ្នំ
តាមសេចក្ដីរាយការណ៍បានបញ្ជាក់ថា ក្រុមហ៊ុនអចលនទ្រព្យដែលទិញដីខាងលើក្នុងតម្លៃ ៤០០លានវ៉ុន (ប្រមាណ 330,489) ហើយយកមកលក់ឱ្យ Taeyeon ក្នុងតម្លៃជាង៩ម៉ឺនដុល្លារ ដូចបានលើកឡើងខាងលើ ដូច្នេះសមត្ថកិច្ចបានចេញសេចក្ដីសន្និដ្ឋានថាក្រុមហ៊ុនខាងលើបានបែងចែកដីជាចំណែកតូចៗ ដើម្បីលក់ឱ្យជនរងគ្រោះដែលមានចំនួនសរុបជាង៣០០០នាក់ ដោយបោកប្រាស់ថាមានផែនការអភិវឌ្ឍដីនៅតំបន់នោះ។
ក្រុមហ៊ុនដែលមានឈ្មោះបោកប្រាស់ខាងលើជាក្រុមហ៊ុនធំ បានផ្សព្វផ្សាយតាមរយៈទូរទស្សន៍ ហើយមានតារាកំប្លែងល្បីជាប្រធានម្នាក់ក្នុងចំណោមប្រធានរបស់ក្រុមហ៊ុននេះផងដែរ។
ក្រោយពីបែកធ្លាយដំណឹងនេះ ផលិតកម្ម SM Entertainment ផលិតកម្មគ្រប់គ្រងលើតារាស្រីរូបនេះបានចេញសេចក្ដីថ្លែងការណ៍ចំពោះព័ត៌មានខាងលើនេះថា ៖ «នេះគឺជារឿងមួយដែលពិបាកសម្រាប់ក្រុមហ៊ុនក្នុងការបញ្ជាក់សាច់រឿងលម្អិត ព្រោះជារឿងពាក់ព័ន្ធនឹងទ្រព្យសម្បត្តិផ្ទាល់ខ្លួនរបស់តារា»
