ក្លិបបាល់ទាត់ FK Sūduva ដែលកីឡាករ Keisuke Honda អ្នកចាត់ការទូទៅក្រុមជម្រើសជាតិកម្ពុជា កំពុងប្រកបអាជីពនោះ កំពុងតែឈរចំណាត់ថ្នាក់លេខ២ក្នុងតារាងរួមប្រចាំពានរង្វាន់លីគកំពូលនៃប្រទេសលីទុយអានី (A Lyga 2021) បើទោះជារកបានជ័យជម្នះនៅចុងសប្ដាហ៍កន្លងទៅក៏ដោយ។
កីឡាករ Keisuke Honda ត្រូវលោកគ្រូបង្វឹក Víctor Basadre ដាក់ឱ្យចូលលេង៩០នាទីពេញក្នុងជ័យជម្នះរបស់ FK Sūduva លើក្រុមបាតតារាង FK Nevėžis ដោយលទ្ធផល ៣ទល់០ លើទីលានកីឡដ្ឋាន Kėdainių miesto stadionas ក្នុងទីក្រុង Kėdainiai នាថ្ងៃ៣០ តុលា ឆ្នាំ២០២១ ថ្មីៗនេះក្នុងសប្ដាហ៍ទី៣៣។
ក្រុមបាល់ទាត់ FK Sūduva កំពុងឈរលេខ២ក្នុងតារាងពានរង្វាន់ A Lyga ក្រោយប្រកួតបាន៣១លើក ឈ្នះបាន២០លើក ស្មើ៨លើក និងចាញ់៣លើកមាន៦៦ពិន្ទុ។ ពានរង្វាន់ A Lyga តម្រូវឱ្យក្រុមជាសមាជិកទាំង១០ក្រុម ប្រកួតវិលជុំចំនួន៤ជើង គឺ៣៦សប្ដាហ៍ទើបបញ្ចប់។
អត្ថបទពាក់ព័ន្ធ៖៤រឿងពេលអ្នកចាត់ការទូទៅក្រុមកម្ពុជា Keisuke Honda ចូលរួមក្លិបថ្មីនៅលីទុយអានី
សម្រាប់ប្រកួតបន្ទាប់ក្រុម FK Sūduva ត្រូវជួបក្រុមFC Hegelmann Litauen នៅថ្ងៃអាទិត្យ ទី៧ ខែវិច្ឆិកា ឆ្នាំ២០២១ ចុងសប្ដាហ៍នេះលើទីលាន LFF Kauno treniruočių centras ក្នុងទីក្រុង Kaunas៕