កីឡាករម៉ូតូទឹកជម្រើសជាតិកម្ពុជា សាលី អ៊ូមើត បានទទួលចំណាត់ថ្នាក់លេខ១ ក្នុងព្រឹត្តិការណ៍ ប្រណាំង ម៉ូតូទឹកពានរង្វាន់អន្តរជាតិ Jet Ski Pro Tour 2021 ជុំទី១ ក្រោយឆ្លងកាត់ការប្រកួតដ៏ស្វិតស្វាញរយៈពេល២ថ្ងៃ នៅថ្ងៃទី៣០-៣១ ខែតុលា ឆ្នាំ២០២១ នេះនៅប្រទេសថៃ។
កីឡាករម៉ូតូទឹកជម្រើសជាតិកម្ពុជា៥រូប បានចូលរួមប្រកួតក្នុងព្រឹត្តិការណ៍ដែលមាន ២២វិញ្ញសារនេះក្នុងនោះមាន ម៉ីន មូស្ដាន, ម៉ីន អូស្មាន, កៃ វ៉ាន់ស៊ីដែន, សាលី ហ្វីលីន និង សាលី អ៊ូមើត ផ្ទាល់។
ចំពោះកីឡាករ សាលី អ៊ូមើត និង ម៉ីន មូស្ដាន បានប្រកួតវិញ្ញាសា Pro Am Ski Modifiedហើយជាលទ្ធផល អ៊ូមើត ដណ្ដើមបានចំណាត់ថ្នាក់លេខ១ ក្នុងចំណោមកីឡាករ ៨នាក់ ហើយប្អូនជីដូនមួយរបស់គេ មូស្ដាន ទទួលបានលេខ៦ បន្ទាប់ពីជួបបញ្ហាប៉ះទង្គិចជាមួយគូប្រជែង ក្នុង ការប្រកួតជុំទី៣។ រីឯកីឡាករវ័យក្មេង ៣រូបផ្សេងទៀត ទទួល បានត្រឹម ចំណាត់ថ្នាក់លេខ៦ និងលេខ៧ ប៉ុណ្ណោះ។ នេះបើតាមការបញ្ជាក់នៅលើហ្វេសប៊ុក Sea Games 2023។
ម្ចាស់មេដាយមាសកីឡាអាស៊ី ឆ្នាំ២០១៨ សាលី អ៊ូមើត បានឲ្យដឹងថា ការប្រកួត ម៉ូតូទឹកអន្ដរជាតិនេះ មាន៥ប្រទេសចូលរួម រួមមានកម្ពុជា ឡាវ អាមេរិក អាល្លឺម៉ង់ និងម្ចាស់ផ្ទះថៃ។
ព្រឹត្តិការណ៍ Jet Ski Pro Tour 2021 បែងចែកការប្រកួតជា ៤ដំណាក់កាល ឬ ៤ជុំធំៗ ដោយ ជុំទី១ ទើបបញ្ចប់ការប្រកួតនៅថ្ងៃទី៣០ដល់៣១ខែតុលា ឆ្នាំ២០២១ ខណៈជុំទី២ គ្រោងប្រកួតនាថ្ងៃទី២០-២១ ខែវិច្ឆិកា ខាងមុខ នៅទីក្រុងប៉ាតាយ៉ា ប្រទេសថៃ។ ចំណែកជុំទី៣ និងជុំទី៤ គណៈកម្មការរៀបចំការប្រកួត នៅមិនទាន់កំណត់កាលបរិច្ឆេទប្រកួតនោះទេ៕
