ក្លិបបាល់ទាត់មាន់ខ្នាយមាស Tottenham Hotspur សម្រេចបណ្តេញលោក Nuno Espirito Santo ចេញពីតំណែងបន្ទាប់ពីដឹកនាំក្រុមបង្ហាញទម្រង់លេងមិនសូវបានល្អ ខណ:ការប្រកួតចុងក្រោយដឹកនាំក្រុមចាញ់បិសាចក្រហម Manchester United យ៉ាងចាស់ដៃក្នុងលទ្ធផល ៣-០។
គួរបញ្ជាក់លោក Nuno ត្រូវបានក្លិប Spurs តែងតាំងជំនួសលោក Mourinho ជាមួយកិច្ចសន្យាចំនួន២ឆ្នាំ ប៉ុន្តែគ្រូបង្វឹកវ័យ៤៧ឆ្នាំរូបនេះដឹកនាំក្លិបបានត្រឹមតែ១៧ប្រកួតប៉ុណ្ណោះ។
បច្ចុប្បន្ននេះ Spurs កំពុងស្ថិតក្នុងចំណាត់ថ្នាក់លេខ៨ ក្រោយលេង១០ប្រកួត ឈ្នះ៥ មិនដែលស្មើ និងចាញ់ចំនួន៥ប្រកួត មាន១៥ពិន្ទុតាមពីក្រោយក្រុមលេខ១ តោខៀវ Chelsea ចំនួន១០ពិន្ទុ។
មុនឈានមកដឹកនាំ Spurs លោក Nuno បានចំណាយពេល ៤រដូវកាលដឹកនាំ Wolves ហើយក៏បានជួយក្លិបកញ្ជ្រោងមួយនេះឡើងពីលីគទី២ Championship មកកាន់ Premier League និងឈានដល់វគ្គ ៨ក្រុមចុងក្រោយនៃពានអឺរ៉ុប UEFA Europa League ១ដងថែមទៀតផង។
ប្រភព៖ Sky Sport
