តារាសម្ដែងលេខមួយរបស់ប្រទេសឥណ្ឌា លោក Sha Rukh Khan សរសើរភរិយារបស់លោកដែលអាចរស់នៅជាមួយលោកបានព្រោះថា«រស់នៅជាមួយនឹងលោកគឺជារឿងមួយដ៏លំបាក» ព្រោះលោកនាំរឿងនិងបញ្ហាជាច្រើនចូលទៅក្នុងជីវិតគ្រួសាររបស់លោក ពិសេសគ្រួសារលោកត្រូវគេយកទៅលេងសើចចំណែកឯកជនភាពក៏ត្រូវបានអ្នកផ្សេងដណ្ដើមបាត់ដែរ។
តារាសម្ដែងដ៏មានប្រជាប្រិយភាពបំផុតមួយរបស់ឥណ្ឌាបានរៀបការជាមួយនឹងភរិយា អ្នកស្រី Gauri Khan កាលពីឆ្នាំ ១៩៩១ ហើយទទួលបានកូនចំនួន៣នាក់ជាចំណងដៃអាពាហ៍ពិពាហ៍ ដោយកូនប្រុសច្បង Aryan Khan មានអាយុ២៣ឆ្នាំ កូនទីពីរ Suhana Khan មានអាយុ ២១ឆ្នាំ និងកូនពៅ AbRam កើតនៅឆ្នាំ២០១៣។
នៅក្នុងបទសម្ភាសន៍មួយលោក Shah Rukh Khan ធ្លាប់បាននិយាយថា «ខ្ញុំបានស្គាល់ភរិយាខ្ញុំ Gauri តាំងពីនាងមានអាយុ១៤ឆ្នាំ គិតមកដល់សព្វថ្ងៃខ្ញុំបានស្គាល់នាងរយៈពេល៣៥ឆ្នាំហើយ។ រស់នៅជាមួយលោកគឺជាការងារមួយដ៏លំបាក ភរិយាលោកមិនអាចមានសិទ្ធិពេញលេញលើខ្លួនលោក ភរិយាទទួលបានចំណែកតិចតួចបំផុត ព្រោះលោកបានក្លាយជាកម្មសិទ្ធិរបស់អ្នកគាំទ្រ។ ចង់ចេញក្រៅឬទៅភោជនីយដ្ឋាន គឺប្រៀបដូចជានាំខ្ញុំចេញទៅបង្ហាញឱ្យក្រុមមនុស្សដែលចង់បានពេលវេលារបស់ខ្ញុំ។ ខ្ញុំនាំរឿងឥតប្រយោជន៍ជាច្រើនចូលក្នុងគ្រួសារ។ សមាជិកក្នុងផ្ទះត្រូវគេយកទៅលេងសើច ពេលវេលារបស់ខ្ញុំសម្រាប់គ្រួសារត្រូវអ្នកដទៃដណ្ដើមអស់ សូម្បីតែរឿងធម្មតាដូចជាដើរលេងជុំគ្រួសារដូចមនុស្សទូទៅក៏គ្រួសារខ្ញុំមិនហ៊ានស្រមៃថាខ្ញុំអាចផ្ដល់ឱ្យពួកគេបានដែរ»
យោងតាមសារព័ត៌មាន Hindustan Times (ហ៊ិនឌូស្ដាន ថាមស៍) ដដែលបានផ្សាយដែរថា បុរសកូន២រូបនេះបានលើកឡើងនៅក្នុងបទសម្ភាសន៍ដែរថា៖ «ខ្ញុំធំដល់ថ្នាក់នេះហើយ នៅត្រូវរៀនស្រលាញ់ថែមទៀត ប៉ុន្តែ Gauri មិនដែលរករឿងឬនិយាយពីរឿងនេះទេ ធ្វើឱ្យខ្ញុំមានពេលវេលាបានដកដង្ហើម។ ជួនកាលពេលរឿងមិនល្អកើតឡើងចំពោះគ្រួសារខ្ញុំ ខ្ញុំមានអារម្មណ៍ថាត្រូវទទួលខុសត្រូវ។ បើខ្ញុំធ្វើខ្លួនមិនល្អនៅស្ដាត គឺខ្ញុំជាអ្នកដែលចេញអាកប្បកិរិយាមិនល្អ មិនមែនកូនរបស់ខ្ញុំទេ។ ខ្ញុំមិនអាចសូម្បីតែការពារកូនស្រីនិងមិត្តរបស់កូនខ្ញុំ។ ដូច្នេះហើយខ្ញុំពិតជាគោរពចំពោះ Gauri ដែលអាចរក្សាអត្តសញ្ញាខ្លួននិងអត់ធន់ចំពោះរឿងល្ងីល្ងើដែលខ្ញុំបាននាំចូលក្នុងជីវិតរបស់នាង។ ខ្ញុំបើជានាងវិញ ខ្ញុំប្រហែលមិនអាចធ្វើដូចនាងបានទេ។»
គួរដឹងថាភាពយន្តចុងក្រោយដែល Shah Rukh Khan សម្ដែងគឺរឿង «Zero» កាលពីឆ្នាំ ២០១៨ ហើយរឿងថ្មីដែលតារារូបនេះសម្ដែងមានចំណងជើងថា «Pathan» ដែលដឹកនាំដោយអ្នកដឹកនាំជនជាតិតាមិល៕
