យោងតាមសារព័ត៌មាន Yahoo News បានចុះផ្សាយថា មន្ទីរពេទ្យមួយបានចេញលិខិតព្រមានចំពោះឪពុកម្ដាយក្រោយមានក្មេងត្រូវភ្លើងឆេះព្រោះតែហ្គេមស្ករគ្រាប់ Dalgona ចេញពីភាពយន្តកូរ៉េខាងត្បូង «Squid Game» កំពុងតែល្បីល្បាញខ្លាំងនៅលើបណ្ដាញសង្គមពិសេស App Tiktok ។
ស្ករគ្រាប់បុរាណដែលផលិតឡើងដោយយកស្ករសទៅដុតរំងាស់លាយជាមួយនឹងម្សៅសូដា រួចយកមកចាក់លើថាសនឹងយកពុម្ពរូបរាងផ្សេងមកដាក់ផ្អឹបពីលើឱ្យចេញជារូបរាងនោះគឺជាហ្គេមមួយដែលត្រូវបានភាពយន្ត «Squid Game» លើកយកមកលេងនៅក្នុងសាច់រឿងដែលតម្រូវឱ្យបេក្ខជនលេង ហើយអ្នកដែលធ្វើឱ្យស្ករនេះខូចទ្រង់ទ្រាយឬរូបរាងចាត់ទុកថាចាញ់ ហើយត្រូវបាញ់សម្លាប់ចោល។
រូបមន្ដធ្វើស្ករនេះមានភាពងាយស្រួលហើយត្រូវបានបង្ហាញតាមរយៈអនឡាញ ដូចជា Tiktok #DalgonaChallenge ដែលម្ចាស់គណនី Tiktok បានថតរូបខ្លួនឯងព្យាយាមធ្វើស្ករនោះឱ្យចេញជារូបរាងណាមួយដោយមិនខូចទ្រង់ទ្រាយ ដោយវីដេអូនេះមានចំនួនចូលទស្សនា ២២លានដង។
ក្មេងអូស្ត្រាលីម្នាក់បានព្យាយាមធ្វើស្ករនេះដោយដុតទឹកលាយជាមួយនឹងម្សៅសូដានិងស្ករក្នុង Microwave ជំនួសឱ្យប្រើវែកដុតពីលើចង្ក្រាន្តតាមរូបមន្តដែលបង្ហាញតាមរយៈវីដេអូណែនាំ។ ពែងនោះបានផ្ទុះនៅក្នុងដៃក្មេងនោះបន្ទាប់ពីគេបានយកពែងចេញពីក្នុង Microwave ជាលទ្ធ ផលបណ្ដាលឱ្យក្មេងរូបនោះរលាកដៃធ្ងន់ធ្ងរ និងរលាកជើងតិចតួច។ ព្រោះតែកម្រិតរលាកខ្លាំងនិងរបួសច្រើនកន្លែង គ្រូពេទ្យអាចនឹងផ្សាំស្បែករបស់ក្មេងរូបនោះហើយប្រើពេលយ៉ាងតិច១ឆ្នាំទើបអាចជាសះស្បើយឡើងវិញ។
គួរដឹងថាភាពយន្ត «Squid Game» រកប្រាក់ចំណូលចូល Netflix បាន៩០០លានដុល្លារ ខណៈដែលភាពយន្តនេះចំណាយទុនផលិតត្រឹមតែ២១លានដុល្លារប៉ុណ្ណោះ ប៉ុន្តែក្រុម Netflix មិនបានឆ្លើយតបចំពោះការលើកឡើងនេះទេ៕
