ផលិតកម្ម Galaxy Navatra (ហ្គាឡាក់ស៊ីណាវ៉ាត់ត្រា) និងក្រុមហ៊ុនចិន (GESTOS) បានធ្វើសន្នីសីទកាសែត និងចុះអនុស្សរណៈលក់សិទ្ធិបទចម្រៀងខ្មែរ «Are You OK?» រួមគ្នាជាផ្លូវការនាសណ្ឋាគារ សូហ្វីតែលភ្នំពេញ កាលពីរសៀលថ្ងៃសៅរ៍ទី៦ ខែតុលា ឆ្នាំ២០២១ ម្សិលមិញនេះ។
ការចុះអនុស្សរណៈលក់សិទ្ធិបទចម្រៀងនេះធ្វើឡើងបន្ទាប់ពីខាងផលិតកម្មបានកែច្នៃនិងកែសម្រួលទាំងខ្លឹមសារ និងរូបភាពឡើងវិញ ដើម្បីឱ្យស្របទៅតាមលក្ខខណ្ឌក្រសួងវប្បធម៌និងវិចិត្រសិល្បៈ ដែលបានផ្ដល់ទិដ្ឋាការផ្សព្វផ្សាយជាសាធារណៈទាំងក្នុងប្រទេស និងអន្តរជាតិ ហើយក៏ឆ្លើយតបទៅតាមការរិះគន់ ក៏ដូចជាកែលម្អរពីសំណាក់សាធារណជននិងហ្វេនៗមួយចំនួនផងដែរ។
កម្មវិធីសន្នីសីទសារព័ត៌មានដ៏ធំឱឡារឹកនេះ មានការចូលរួមពីតំណាងផលិតកម្ម Galaxy អ្នកចាត់ការទូទៅក្រុមហ៊ុន GESTOS និងតំណាងមកពីប្រធាននាយកដ្ឋានសិល្បៈភាពយន្តនិងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ រួមទាំងភ្ញៀវកិត្តិយសជាតិ អន្តរជាតិ និងបណ្ដាបងប្អូនអ្នកសារព័ត៌មានមកពីបណ្ដាស្ថាប័ននានាចូលរួមក្នុងនោះដែរ។
ថ្លែងក្នុងឱកាសនោះ លោក យឹម តាស្រង់ អ្នកគ្រប់គ្រងទូទៅផលិតកម្ម ហ្គាឡាក់ស៊ីណាវ៉ាត្រា បានឱ្យដឹងថា «ក្រោយពីខាងផលិតកម្មលក់សិទ្ធិបទចម្រៀង Are you ok?នេះទៅខាងក្រុមហ៊ុន GESTOS បទចម្រៀង ស្នាដៃកូនខ្មែរមួយបទនេះ នឹងត្រូវក្លាយជាកម្មសិទ្ធិបញ្ញារវាងផលិតកម្មហ្គាឡាក់ស៊ីណាវ៉ាត្រា និងក្រុមហ៊ុន GESTOS ដោយមិនមានជនណាអាចថតចម្លង ឬបង្ហោះដោយគ្មានការអនុញ្ញាតនៅប្រទេសចិនឡើយ។»
អ្នកគ្រប់រូបនេះបានពន្យល់បន្ថែមទៀតថា៖ «ចាប់ពីពេលនេះអនុស្សរណៈលក់សិទ្ធិបទចម្រៀង Are you Ok? នេះទៅឱ្យ ក្រុមហ៊ុន GESTOS ដែលជាក្រុមហ៊ុនផលិតចម្រៀងដ៏ធំនៅប្រទេសចិន មានសិទ្ធិយកទៅកែសម្រួលជាភាសាចិន ហើយគ្រោងនឹងផ្សព្វផ្សាយនៅគ្រប់បណ្ដាញសង្គមល្បីៗក្នុងប្រទេសចិន»
ចំណែកឯអ្នកស្រី Britney LI ជាអ្នកគ្រប់គ្រងទូទៅ GESTOS បានគូសបញ្ជាក់ឱ្យដឹងដែរថា៖ «តាមរយៈការសហការគ្នាលើកនេះ ភាគីទាំងពីរសង្ឃឹមយ៉ាងមុតមាំថា ពួកយើងនឹងសម្រេចបាននូវការផ្លាស់ប្ដូរកម្មសិទ្ធិបញ្ញា រវាងគ្នា និងគ្នា ហើយអ្នកចម្រៀង អ្នកនិពន្ធទំនុកច្រៀង អ្នកនិពន្ធបទភ្លេងរបស់ផលិតកម្ម ហ្គាឡាក់ស៊ីណាវ៉ាត្រា ក៏នឹងទទួលបានចំណូលជាភាគរយពីអ្នកចូលទស្សនានៅក្នុងកម្មវិធីបណ្តាញសង្គមនានានៅប្រទេសចិនថែមទៀតផង»
កាន់តែមានមោទកភាពសម្រាប់ផលិតកម្មហ្គាឡាក់ស៊ីណាវ៉ាត្រា និងប្រជាពលរដ្ឋកម្ពុជានោះគឺ អ្នកស្រី Britney បានបង្ហើបឱ្យដឹងបន្ថែមដែរថា នៅពេលដែលស្ថានភាពជំងឺកូវីដ-១៩ មានភាពធូរស្បើយនាពេលខាងមុខ ក្រុមហ៊ុននឹងអញ្ជើញតារាចម្រៀង ក៏ដូចជាខាងផលិតកម្មទៅចូលរួមកម្មវិធីប្រគំតន្ត្រីធំៗនៅឯប្រទេសចិនមិនខាន។
ងាកមកប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ លោក ប៉ុក បូរក្សា បានថ្លែងក្នុងសន្នីសីទសារព័ត៌មានប្រកបដោយខ្លឹមសារថា៖ «អនុស្សរណៈលក់សិទ្ធិបទចម្រៀង Are you ok? របស់ផលិតកម្ម ហ្គាឡាក់ស៊ីណាវ៉ាត្រា អ្នកឧកញ៉ា ឡេង ណាវ៉ាត្រា ទៅឱ្យខាងក្រុមហ៊ុនផលិតចម្រៀងនៅប្រទេសចិនថ្ងៃនេះ គឺជាពន្លឺនៃក្ដីសង្ឃឹមដ៏ថ្មីសន្លាងសម្រាប់សិល្បៈករ អ្នកនិពន្ធទំនុកចម្រៀង អ្នកនិពន្ធបទភ្លេង អ្នកចម្រៀង និងផលិតកម្មទាំងឡាយ ឬអាចនិយាយបានថា ជាលើកដំបូងសម្រាប់វិស័យចម្រៀងក្នុងប្រទេសកម្ពុជា ដែលទទួលបានការចាប់អារម្មណ៍ពីដៃគូសហការពីបរទេសដូច្នេះ។» លោកក៏បានសង្កត់ធ្ងន់ដែរថា អ្វីដែលកាន់តែពិសេសជាងនេះទៀតនោះ គឺការចូលរួមគោរពទៅតាមច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល ឬកម្មសិទ្ធិបញ្ញា នៅក្នុងប្រទេសកម្ពុជាយើង។
ផលិតកម្មហ្គាឡាក់ស៊ីណាវ៉ាត្រា គឺជាផលិតកម្មចម្រៀងខ្មែរមួយដែលមានចក្ខុវិស័យវែងឆ្ងាយ នាំយកបទចម្រៀងខ្មែរទៅកាន់ទីផ្សារអន្តរជាតិ ដោយប្រកាន់ខ្ជាប់នូវការផលិតចម្រៀងច្មីៗស្នាដៃថ្មីមិនចម្លងពីអ្នកដទៃ ក្នុងគោលបំណងធ្វើឱ្យបរទេសស្គាល់និងទទួលស្គាល់ប្រទេសកម្ពុជា សំដៅឈានទៅទាក់ទាញភ្ញៀវទេសចរណ៍អន្តរជាតិឱ្យចង់មកទស្សនាប្រទេសកម្ពុជាកាន់តែច្រើន តាមរយៈការស្រលាញ់និងចូលចិត្តតន្ត្រីខ្មែរចម្រៀងខ្មែរ។
ជាការកត់សម្គាល់បទចម្រៀង «Are You Ok?» នេះគ្រាន់តែចេញភ្លាមមានការចាប់អារម្មណ៍ខ្លាំងពីសាធារណៈជនរហូតដល់មានសារព័ត៌មានថៃជាច្រើនបានចុះផ្សព្វផ្សាយដំណឺងនៅលើបណ្ដាញសារព័ត៌មានរបស់ខ្លួនថែមទាំងលើកសរសើរថាជាបទដែល Viral ខ្លាំង និងមាន Content Creator ល្បីៗយកទៅ Challenge គ្នា ហើយសូម្បីតែ Idol កូរ៉េ ក៏មិនភ្លាត់ឱកាសយកបទនេះទៅរាំ Cover ដូចគ្នាដែរ។
សូមបញ្ជាក់ឱ្យដឹងផងដែរថា បទចម្រៀង «Are You Ok?» កែសម្រួលថ្មីនេះត្រូវបានក្រសួងវប្បធម៌ និងវិចិត្រសិល្បៈ សម្រេចផ្ដល់ទិដ្ឋាការអនុញ្ញាតឱ្យផលិតកម្ម Galaxy Navatra អាចផលិតចេញជា MV ខារ៉ាអូខេថ្មីបានកាលពីថ្ងៃទី២៧ ខែតុលា ឆ្នាំ២០២១ បន្ទាប់ពីមានការកែសម្រួលទាំងខ្លឹមសារ និងកែច្នៃរូបភាពមួយចំនួនចេញ៕