តារាសម្ដែង Will Smith បានបង្ហើបនៅក្នុងសៀវភៅថ្មីរបស់លោកនិយាយពីអាថ៌កំបាំងក្នុងជីវិតមួយចំនួនដែលអ្នកគាំទ្រមិនធ្លាប់បានឃើញនិងដឹង។ ផ្នែកដ៏ខ្មៅងងឹតក្នុងជីវិតគ្រួសារ អំពើហិង្សាដែលឪពុកលោក ជីវិតវេទនាមុនពេលលោកបោះជំហានចូលក្នុងហូលីវូដ។ ក្នុងចំណោមរឿងរ៉ាវខ្លោចផ្សារជាច្រើនក្នុងជីវិតគ្រួសារ លោកបានបង្ហើបពាក់ព័ន្ធនឹងរឿងលោកត្រូវចាយថ្លៃអាហារកិច្ចឱ្យម្ដាយរបស់លោកមិនមែនឱ្យអតីតភរិយាលោកដើម្បីចិញ្ចឹមកូននោះឡើយ។
លោកបាននិយាយបែបកំប្លែងរំលឹកដល់រឿងរ៉ាវខាងលើនេះថា «នៅក្នុងជីវិតពិត ខ្ញុំត្រូវចាយលុយអាហារកិច្ចឱ្យខ្លួនឯង។ ស្ដាប់ទៅគឺដូចជារឿងធម្មតាមែនទេ? ពិតមែនហើយ ខ្ញុំបានចាយលុយអាហារកិច្ចឱ្យម្ដាយរបស់ខ្ញុំ។ រយៈពេលជិត២០ឆ្នាំដែលប៉ាម៉ាក់ខ្ញុំបានដំណើរការលែងលះគ្នា តែមិនទាន់បានចុះហត្ថលេខាលែងលះនៅក្នុងឯកសារចប់សព្វគ្រប់ទៅតាមផ្លូវច្បាប់នោះទេ ដូច្នេះម្ដាយរបស់ខ្ញុំក៏ដាក់ពាក្យបណ្ដឹងលែងលះចូលទៅកាន់តុលាការ។
បុរសជាតារាសម្ដែងល្បីអាមេរិករូបនេះបានឱ្យដឹងបន្ថែមទៀតថា ៖ ពាក្យបណ្ដឹងដែលម្ដាយរបស់លោកបានដាក់ចូលទៅកាន់តុលាការនោះ បានធ្វើឱ្យឪពុករបស់លោកត្រូវពិន័យថ្លៃចិញ្ចឹមបីបាច់ (អាហារកិច្ច) រហូតដល់ទៅ១៤ម៉ឺនដុល្លារ។ Will Smith បានឱ្យដឹងដែរថាឪពុករបស់លោកមានកាតព្វកិច្ចមើលថែទាំលោកនិងម្ដាយលោក តែឪពុកលោកមិនដែលបានបំពេញតួនាទីនោះឡើយ ដូច្នេះបូកសរុបទាំងដើមទាំងការ បូករួមនឹងការផាកពិន័យផងនោះធ្វើឱ្យឪពុកលោកជំពាក់ម្ដាយលោកជិត១៤ម៉ឺនដុល្លារ។ ម្ដាយលោកចង់បានប្រាក់គ្រប់កាក់គ្រប់សេនដែលជាកម្មសិទ្ធិរបស់គាត់ ហេតុនេះបើសិនជាឪពុកលោកមិនមានប្រាក់ចាយទេនោះ បានសេចក្ដីថាគាត់ប្រព្រឹត្តិខុសច្បាប់ Pennsylvania អាចប្រឈមមុខនឹងជាប់ពន្ធនាគារ។
ឪពុករបស់លោកមិនមានលទ្ធភាពរកប្រាក់ទាំងអស់នោះទេ ចំណែកម្ដាយលោក៏បដិសេធមិនទទួលប្រាក់ពីលោកដែរ ប៉ុន្តែលោកក៏មិនអាចឈរឱបដៃមើលឃើញឪពុកលោកជាប់ពន្ធនាគារបានដូចគ្នា។ លោកបានផ្ទេរប្រាក់១៤ម៉ឺនដុល្លារចូលទៅក្នុងគណនីរបស់ឪពុកលោក ហើយឪពុករបស់លោកបានប្រញាប់ប្រើប្រាស់នោះប្រគល់ទៅឱ្យសហធន់ដើម្បីចាត់ចែងវេរប្រាក់នេះទៅម្ដាយរបស់សងថ្លៃអាហារកិច្ចដែលមិនបានចាយកន្លងមក។
តារាសម្ដែងល្បីរូបនេះបានបញ្ជាក់ថា លោកគឺជាមនុស្សតែម្នាក់គត់ក្នុងប្រវត្តិសាស្ត្រដែលចាយលុយថ្លៃអាហារកិច្ចឱ្យខ្លួនឯង។ ប៉ុន្តែក្រោយមកនៅពេលរឿងនេះបែកធ្លាយម្ដាយខ្ញុំបានប្រញាប់ស៊ីញ៉េសែក១៤ម៉ឺនដុល្លារឱ្យខ្ញុំវិញភ្លាមៗ ធ្វើឱ្យម្ដាយខ្ញុំក្លាយជាមនុស្សទីមួយដែលចាយប្រាក់ថ្លៃអាហារកិច្ចឱ្យទៅកាន់កូនប្រុសដែលសងប្រាក់ថ្លៃអាហារកិច្ចឱ្យខ្លួនឯង។