យុវជនក្រោមអាយុ១៤ឆ្នាំ (U-14) របស់ក្លិប Lion City Sailors ក្នុងប្រទេសសិង្ហបុរី បានយកឈ្នះលើក្រុមយុវជនក្រោមអាយុ១៤ឆ្នាំក្លិប Luner SV ដោយលទ្ធផល២៧ទល់០ ក្នុងប្រកួតមិត្តភាព នៅNorth Rhine-Westphalia ក្នុងប្រទេសអាល្លឺម៉ង់ នៅថ្ងៃទី១០ វិច្ឆិកា ឆ្នាំ២០២១ ខណៈក្រុមអាស៊ានមួយនេះបានធ្វើដំណើរទៅបោះជំរំហ្វឹកហាត់នៅអឺរ៉ុប រយៈពេល៤២ថ្ងៃ។
បើតាមសារព័ត៌មាន Straitstimes របស់សិង្ហបុរី បញ្ជាក់ថា U14 របស់ក្រុម Lion City Sailors បើកការនាំមុខតាំងពី៤០វិនាទីដំបូងមកម៉្លេះ ហើយចប់តង់ទី១ ក្រុមនេះបាននាំមុខ១៦ទល់០ ស្របពេលការប្រកួតពេញម៉ោងប្រើពេលតែ៨០នាទីប៉ុណ្ណោះ។
តាមផែនការក្រុម Lion City Sailors នឹងប្រកួតមិត្តភាពនៅទឹកដីអឺរ៉ុប ចំនួន១២ប្រកួត។ ពួកគេបានធ្វើដំណើរទៅដល់អាល្លឺម៉ង់ នៅថ្ងៃអាទិត្យ កន្លងទៅព្រមទាំងបានធ្វើទស្សនកិច្ចនៅកីឡដ្ឋាន Signal Iduna Park ទឹកដីម្ចាស់ជើងឯកពានរង្វាន់លីគកំពូលអាល្លឺម៉ង់ Bundesliga ៥សម័យកាល Borussia Dortmund។
អត្ថបទពាក់ព័ន្ធ៖Lion City Sailors ជាក្លិបក្នុងស្រុកដំបូងឈ្នះពានលីគកំពូលសិង្ហបុរី គិតពីឆ្នាំ២០១៤មក
កាលពីខែមិថុនា កន្លងទៅក្រុម Sailors បានចុះដៃគូរយៈពេល២ឆ្នាំកន្លះ ជាមួយក្លិប Borussia Dortmund ដោយផែនការដំបូងគឺពង្រីកហេដ្ឋារចនាសម្ព័ន្ធសម្រាប់ការអភិវឌ្ឍន៍បាល់ទាត់យុវជន របស់សិង្ហបុរីនិងជាការគាំទ្រដល់ការលូតលាស់ផ្នែកវិទ្យាសាស្ត្រកីឡា វេជ្ជសាស្រ្តកីឡា ការវិភាគ និងការស្វែងរកទេពកោសល្យ៕