ធម្មតាតារាសម្ដែងស្រីមានរូបសម្រស់ស្រស់ស្អាតហើយទាក់ទាញអ្នកគាំទ្រគឺត្រង់ចំនុចសក់ តែកំពូលតារាសម្ដែងស្រីទឹកភ្នែក នី មុនីនាថ ហាក់ដូចមិនខ្លាចខ្មាសអៀន ហើយហ៊ានកោរសក់សម្ដែងក្នុងរឿងថ្មីមួយទៀតផង។ តារាស្រីល្បីខាងសម្រក់ទឹកភ្នែករូបនេះ បានសម្ដែងរឿងថ្មីមានចំណងជើងថា «បដាចារ» ជាមួយតួឯកប្រុសសង្ហាលោក វ៉ាន់ ដេវីត សម្ដែងជាតួមាណព ក្រោមវណ្ណកម្មផលិតរបស់ Sastra Film។
កញ្ញា នី មុនីនាថ ក៏បានបង្ហើបប្រាប់អ្នកសារព័ត៌មានត្រយ៉ងនៅថ្ងៃទី ១៤ ខែវិច្ឆិកា ឆ្នាំ២០២១ នេះ ឱ្យដឹងថា ជាការពិតទៅ នោះជាការសម្ដែង ហើយដែលមានឈុតឆាកកោរសក់ពាក់ស្បង់ចីវរ នោះក៏ជាការសម្ដែងដែរ។ កញ្ញាថា កញ្ញាមិនបានកោរសក់ពិតប្រាកដនោះទេ នោះគ្រាន់តែជាថ្វីដៃតុបតែង និងមានបច្ចេកទេសបិទបាំង ឱ្យមើលទៅដូចជាការកោរសក់ពិតៗប៉ុណ្ណោះ។ ដំបូងឡើយកញ្ញាធ្លាប់មានអារម្មណ៍ និងក្ដីបារម្ភថាខ្មាសគេដែរ ក៏ប៉ុន្ដែដោយភាពយន្ដ «បដាចារ» ជាភាពយន្ដទី២ហើយ ដែលកញ្ញាបានបង្ហាញពីឈុតឆាកកោរសក់បែបនេះ។ រឿងដំបូងដែលបានបង្ហាញពីឈុតកោរសក់ដែលមិនធ្លាប់មានឃើញក្នុងវិស័យភាពយន្ដរបស់កញ្ញា គឺនៅក្នុងរឿង «ម៉ាឡីន ម៉ាឡែន» ដែលសម្ដែងជាមួយតួស្រីវ័យក្មេង កញ្ញា អាង សុជាតា ហៅ ឈូឈូ។
យ៉ាងណាមិញ កញ្ញា នី មុនីនាថ បានអះអាងប្រាប់អ្នកសារព័ត៌មានត្រយ៉ងទៀតថា ការសម្រេចចិត្តសម្ដែងឈុតកោរសក់ជាលើកទី២នេះ ដោយសារតែ សាច់រឿង «បដាចារ» គឺជារឿងពុទ្ធជាតក ជារឿងល្អខ្លាំងនិងមានតម្លៃអប់រំទៅកាន់ប្រជាពលរដ្ឋខ្មែរយើង តាមរយៈជីវិតតស៊ូរបស់នាងបដាចារ ដែលនាងបានឆ្លងកាត់ជីវិតលំបាកវេទនាគ្រប់សព្វបែបយ៉ាង រហូតដល់សម្រេចចិត្តកោរសក់បួសជាភិក្ខុនី។ ទោះបីជាកញ្ញា នី មុនីនាថ មានបទពិសោធសម្ដែងរាប់ឆ្នាំក៏ពិតមែន តែការសម្ដែងជាតួនាង បដាចារ ក៏នៅមានឧបសគ្គបន្ដិចបន្តួច ដែលជាពិសេសនោះគឺការសម្ដែងឈុតស្នេហាជាមួយតួឯកប្រុសវ័យក្មេងជាងខ្លួន។
គួររំឭកឱ្យដឹងផងដែរថា បើទោះបីជាស្ថិតនៅក្នុងស្ថានភាពកូវីដ១៩ ជាហេតុធ្វើឱ្យសិល្បៈមានសភាពស្ងប់ស្ងាត់បន្ដិចក៏ពិតមែន ក៏ប៉ុន្ដែតារាសម្ដែងស្រី នី មុនីនាថ ត្រូវបានគេឃើញថា ដូចជាមិនរយាលដៃពីសិល្បៈឡើយ កញ្ញាបានសម្ងំថតភាពយន្ដថ្មីៗជាច្រើនរឿង រហូតដល់សឹងតែរកពេលទំនេរមិនបាន។ តារាស្រីទឹកភ្នែករូបនេះបានព្យាយាមសម្រិតសម្រាំងស្នាដៃជាច្រើនរឿងទៀត ព្រោះគិតថាមិនចង់ទុកពេលវេលាចោលខ្លាចបាត់តំណែងល្បីឈ្មោះ ដោយស្នាដៃសម្ដែងថ្មីៗរបស់កញ្ញា នឹងមានត្រៀមបញ្ចេញនាពេលឆាប់ៗខាងមុខទៀត។ ដោយមើលលើទេពកោសល្យសម្តែង ដែលកញ្ញាមានពេញខ្លួន គេរំពឹងថា ភាពយន្ដថ្មីៗរបស់កញ្ញា នី មុនីនាថ នៅតែមានសន្ទុះអ្នកចូលទស្សនាច្រើន៕
អត្ថបទដោយ៖ Abel