Thursday, December 8 Login

ឥទ្ធិបាទ​ធម៌​ ​គឺ​ធម៌​ជា​គ្រឿង​ឱ្យ​សម្រេច​នូវ​ប្រយោជន៍​។​​ រៀន​នៅ​ទីនេះ​ ​សំដៅ​ទាំង​សិស្ស​និស្សិត​ និង​មនុស្ស​ទូទៅ​ ​ដែល​ត្រូវ​សិក្សា​រៀន​សូត្រ​ ​រហូត​ទល់​នឹង​ផុត​រលត់​អាយុ​សង្ខារ​។​​ ជា​ចំណែក​មួយ​ ដើម្បី​រៀន​មាន​ប្រសិទ្ធ​ភាព​ ​ឆាប់​យល់​ ​ចេះ​ចាំ​ ​ព្រះ​ភិក្ខុ​ ​ឈាង​ ​ផល្លី​ ​អនុ​ប្រធាន​ក្រុម​ការងារ​សិក្ខា​សាលា​ ​​និង​អប់រំ​សីលធម៌​ ​៣​ខេត្ត​ បាន​ដក​ស្រង់​ចេញ​ពី​ពុទ្ធោវាទ​ ​នូវ​ឥទ្ធិបាទ​ធម៌​៤​ប្រការ​ ​ជូន​អ្នក​សិក្សា​រៀន​សូត្រ​ជា​ជំនួយ​ស្មារតី​។​

ទី​១​-​ឆន្ទៈ​ គឺសេចក្ដីស្រឡាញ់ចូលចិត្ត ពោលមានបំណង សេចក្តីប្រាថ្នា ពេលចិត្ត និងមានបំណង ប៉ងប្រាថ្នា ដូចជា ការស្រលាញ់ការសិក្សា ស្រឡាញ់ជំនាញណាមួយ ចង់មានចំណេះ ចង់រៀនពូកែ ចង់ធ្វើជាមនុស្សមានតម្លៃ ប្រាថ្នាចង់បានសិទ្ធិសេរីភាព ចង់មានសេចក្តីសុខ ធ្វើការងារសម្រេចផលល្អ មានគុណភាព។

ទី២-វិរិយៈ គឺសេចក្ដីព្យាយាម តស៊ូ អត់ធ្មត់ ស៊ូទ្រាំ ប្រឹងប្រែង ខ្នះខ្នែង ស្វះស្វែង សង្វាត ឧស្សាហ៍ក្នុងកិច្ចការងារ មិនបោះបង់ការងារ បោះជំហានដើរទៅមុខរហូត បានជោគជ័យ។

ទី៣-ចិត្តៈ គឺសេចក្ដីផ្ដោតចិត្តគំនិត ចេះច្នៃប្រឌិត តាំងចិត្ត ក្នុងការសិក្សារៀនសូត្រ ឬកិច្ចការណាមួយ ដែលខ្លួនធ្វើនោះ មានចិត្ត ចាប់អារម្មណ៍កិច្ចការ ដូចជា រឿងសិក្សា គឺចេះរកវិធីសាស្រ្តល្អៗមកគិត ដោយហេតុផល និងមានស្មារតី មិនបណ្តោយឱ្យចិត្តច្របូក ច្របល់ដែលគិតរឿង មិនបានការ ឬថាយកចិត្តទុកដាក់ក្នុងតួនាទីភារកិច្ចរបស់សាមីខ្លួន។

ទី៤-វិមំសា គឺការពិចារណា វិភាគល្បងមើល សាកល្បងមើល ដូចជា ការហាត់ ដោះស្រាយលំហាត់ ឆ្លើយសំណួរ ឬធ្វើមេរៀនផ្សេងៗ ដើម្បីប្រមើលមើល វាស់ស្ទង់សមត្ថភាព ចំណេះដឹង និងកម្រិតរបស់ខ្លួន។ អាចនិយាយបានថា ប្រើបញ្ញាស្ទាបស្ទង់អ្វីដែលអ្នកបានរៀន បានធ្វើ និង រកវិធីកែច្នៃឱ្យ ទទួល បាន ផល កាន់តែប្រសើរឡើងថែមទៀត។ ជារួម គឺអនុវត្តជាក់ស្ដែងច្រើនកាលណាល្អកាលនោះ។

ឥទ្ធិបាទ​ធម៌​៤​ប្រការ​នេះ​ ​គ្រាន់​តែ​ជា​ធាតុ​ផ្សំ​សម្រាប់​អ្នក​សិក្សា​ រួម​នឹង​វិធី​ផ្សេង​ៗ​អាស្រ័យ​លើ​ស្ថានភាព​បុគ្គល​រៀង​ៗ​ខ្លួន​។​ ​តាម​ឥទ្ធិបាទ​ធម៌​៤​ប្រការ​នេះ​បង្ហាញ​ថា​ការ​រៀនសូត្រ​តាម​រូបមន្ត​ទន្ទេញ​ចាំ​មាត់​ ពុំ​មែន​សុទ្ធ​តែ​តិកនិក​ល្អ​នោះ​ឡើយ​។​ ​តែ​ក៏​មិនមែន​ថា​មិន​ល្អ​ដែរ​។​ ​វា​ចាំបាច់​ទៅ​តាម​កាល​វេលា​ឬ​ស្ថានភាព​។​​ ទោះ​យ៉ាង​ណា​ និន្នាការ​លើក​ទឹក​ចិត្ត​ឱ្យ​គិត​វិភាគ​ឈ្វេង​យល់​ ​និង​អនុវត្ត​ជាក់​ស្ដែង​ជា​ប្រចាំ​។​

ប្រភព ៖ ព្រះភិក្ខុ ឈាង ផល្លី
អនុប្រធានក្រុមការងារសិក្ខាសាលា និងអប់រំសីលធម៌ ៣ខេត្ត!

Share.

Leave A Reply