កាលពីថ្ងៃទី១៧ ខែវិច្ឆិកា តារាចម្រៀងប្រចាំផលិតកម្មរាម លោក ដួង វិរៈសិទ្ធ បានបង្ហោះវីដេអូមួយស្ដែងឱ្យឃើញថា លោកបានបើក Studio ថ្មីមួយ សម្រាប់ទទួលស្វាគមន៍អ្នកគាំទ្រដែលមានចំណងចង់មកថតសំឡេងច្រៀង Cover។ តារាប្រុសរូបនេះបានបញ្ជាក់បន្ថែមដែរថា ការអញ្ជើញមកច្រៀង Cover របស់អ្នកគាំទ្រ ត្រូវគោរពតាមគោរណ៍និងមានលក្ខខ័ណ្ឌបន្ដិចបន្តួច។
ពិតមែនហើយ គេបានដឹងថា Studio ផ្ទាល់របស់លោក ដួង វិរៈសិទ្ធ មានឈ្មោះថា « The Moon Studio » អ្នកគាំទ្រទាំងអស់ ត្រូវផ្ញើសារដើម្បីកក់ថ្ងៃច្រៀងជាមុនសិន។ លោក ដួង វិរៈសិទ្ធ បានអះអាងថា មានអ្នកគាំទ្រជាច្រើននាក់ បានសំណូមពរមករូបលោក ក្នុងការច្រៀង Cover បទរបស់លោក ក៏ប៉ុន្ដែបទចម្រៀងរបស់លោក គឺមិនមានភ្លេងសុទ្ធដែលបង្ហោះនៅក្នុងយូធូបឡើយ។ លោកថា នេះក៏ជាមូលហេតុមួយដែរ ដែលលោកចង់ប្រាប់ទៅអ្នកគាំទ្រថា ចំពោះសាច់ភ្លេងដែលជាបទចម្រៀងរបស់លោក គឺទុកសម្រាប់ត្រៀមបើក Studio ជូនមកប្អូនអ្នកគាំទ្រមកថតកម្សាន្ដ។ រាល់ភ្លេងទាំងអស់ ជាភ្លេងដែលលោកបានផលិត និងសម្រួលតន្ត្រីផ្ទាល់។
លោក ដួង វិរៈសិទ្ធ បានបន្ដបញ្ជាក់បន្ថែមថា ចំពោះការថតសំឡេង និងបច្ចេកទេសសំឡេង ( MIX) គឺអ្នកគាំទ្រនឹងបានជួបជាមួយលោកផ្ទាល់តែម្ដង។ លោកអាចនឹងប្រាប់បន្ថែមពីបច្ចេកទេសក្នុងច្រៀង ឬប្រសំឡេងមួយចំនួនបន្ថែមទៀត ដើម្បីឱ្យច្រៀងទៅកាន់តែពីរោះ។ លោកថា បន្ថែមលើសពីនេះ ចំពោះអ្នកគាំទ្រដែលត្រូវការ ការនិពន្ធបទភ្លេង ទំនុកច្រៀង និងសម្រួលតន្ត្រី តែមិនដឹងទៅរកនៅទីណានោះ គឺសូមអញ្ជើញមក « The Moon Studio »៕ ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ៖