កាលពីដើមឆ្នាំ២០២១នេះ ក្រុមហ៊ុន Netflix បានចេញប្រកាសព័ត៌មានត្រៀមផលិតសេរីរឿងភាគកូរ៉េ បែបវិទ្យាសាស្ត្រអាវកាស ដែលមានចំណងជើងថា « The Silent Sea » ដែលសម្ដែងដោយ Gong Yoo តួឯកប្រុសដ៏ល្បីល្បាញពីភាពយន្ត Train To Busan។
នៅថ្ងៃទី ២២ ខែ វិច្ឆិកា ឆ្នាំ២០២១ នេះ ខាងក្រុមហ៊ុនភាពយន្ដដ៏ធំនេះ បានសម្រេចប្រកាសថ្ងៃដាក់បញ្ចាំងសេរីរឿងភាគនេះជាផ្លូវការហើយ ដោយដាក់បញ្ចាំងរឿងនេះជាផ្លូវការចំថ្ងៃទី២៤ ខែធ្នូ ឆ្នាំ២០២១ ដើម្បីជាចំណងដៃដល់អ្នកគាំទ្រក្នុងថ្ងៃបុណ្យ Christmas ។
រឿង«The Silent Sea» មានទាំងអស់៨ភាគ សាច់រឿងរៀបរាប់ពី ថ្ងៃអនាគតរបស់ភពផែនដី ដែលជួបប្រទះវិនាសកម្មនៃការឡើងខ្លាំងនៃកម្ពៅផែនដី។ ផែនដីមួយភាគធំបានក្លាយទៅជាខ្សាច់ គ្មានជីវិត គ្មានអាហារ និង គ្មានទឹក។ ដើម្បីបន្ដជីវិតរស់នៅបាន ក្រុមអ្នកវិទ្យាសាស្ត្រ បានបញ្ចូនអ្នកជំនាញអាវកាសមួយក្រុម ហោះឆ្ពោះទៅកាន់ឋានព្រះច័ន្ទ ដើម្បីស្វែងរករុក្ខជាតិ និងជីវធម្មជាតិថ្មី ដែលអាចបង្កកំណើតនៅលើភពថ្មីនោះបាន។ ជាអកុសល ដំណើររបស់ក្រុមអាវកាសនេះ បានជួយជាមួយឧបសគ្គដ៏អាក្រក់ ដែលគ្មានអ្នកណាធ្លាប់នឹកស្មានដល់។
សេរីរឿង «The Silent Sea » ដឹកនាំដោយលោក រឿង Choi Hang-yong អ្នកដឹកនាំ ធ្លាប់បានឈ្នះពានរង្វាន់មហោស្រពភាពយន្តខ្លី Mise-en-scene លើកទី១៣ កាលឆ្នាំ២០១៤ ។ រឿងនេះក៏ជាស្នាដៃសហការជាមួយអ្នកនិពន្ធ Park Eun-kyo ធ្លាប់បានឈ្នះពានរង្វាន់ល្អបំផុតសម្រាប់ខ្សែភាពយន្ត Mother ក្នុងមហោស្រពភាពយន្តកូរ៉េលើកទី២៩ផងដែរ។ រឿងភាគថ្មីនេះក៏កំពុងទទួលបានការចាប់អារម្មណ៍យ៉ាងខ្លាំង ព្រោះមានការចូលរួមសម្ដែងពីសំណាក់តារាល្បីៗដូចជា តួឯកប្រុស លោក Gong Yoo , តួឯកស្រី Bae Doo-Na និង តារាប្រុស Lee Joon អតីតសមាជិក MBLAQ។
គួររំលឹកឡើងវិញថានៅឆ្នាំ២០២១នេះ ក្រុមហ៊ុន Netflix បានចំណាយលុយអស់ ៥០០លានដុល្លារ ក្នុងការបង្កើត Content ភាពយន្ដល្បីរបស់ប្រទេសកូរ៉េ ហើយរហូតមកទល់ពេលនេះ ក្រុមហ៊ុន Netflix បានបញ្ចេញភាពយន្ដកូរ៉េជាច្រើនរឿងចេញពី Content ខាងលើដូចជា Squid Game , D.P , My Name , Love Alarm Season2 , Hellbound , All of Us Are Dead, Kingdom: Ashin of the North, Night in Paradise , Lee Su-geun: The Sense Coach, So Not Worth It , Space Sweepers និងរឿង Paik’s Spirit៕