រយៈពេល៥ថ្ងៃ ចាប់ថ្ងៃទី២២ ដល់ថ្ងៃទី២៦ ខែ វិច្ឆិកា ឆ្នាំ២០២១ តាមរយៈមហោស្រពវប្បធម៌អាស៊ី និងអឺរ៉ុប បាននាំយកស្នាដៃរបស់សិល្បករ៣៧រូបមកពីទ្វីបអាស៊ីនិងអឺរ៉ុប មកដាក់តាំងបង្ហាញឱ្យទស្សនាដោយសេរីនៅសារមន្ទីរជាតិ។ ការតាំងពិព័រណ៍នេះ ធ្វើឡើងក្នុងគោលបំណងបង្ហាញពីសាមគ្គីភាពនិងចំណងមិត្តភាពលើវិស័យវប្បធម៌នៃបណ្តាប្រទេសក្នុងទ្វីបអាស៊ី និងអឺរ៉ុប។
ស្នាដៃដែលបានមកដាក់តាំងបង្ហាញក្នុងពិព័រណ៍មហោស្រពនេះ បានផ្អែកលើប្រធានបទធំៗចំនួន៦គឺ ជាស្នាដៃចម្លាក់ រូបថត រូបគំនូរ ឬគ្រឿងអលង្ការ វីដេអូខ្លី ដែលឆ្លុះបង្ហាញបទពិសោធន៍ ការធ្វើដំណើរឆ្លងទ្វីប ស្ថានភាពរស់នៅប្រចាំថ្ងៃ និងការទទួលឥទ្ធិពលគំនិតរវាងសិល្បករនៃទ្វីបទាំងពីរ។ ស្នាដៃសិល្បៈរបស់សិល្បរអ៊ឺរ៉ុប ដែលត្រូវបានជ្រើសរើសឱ្យតាំងបង្ហាញក្នុងឱកាសនេះ គឺពណ៌នាអំពីប្រធានបទដូចជា Happy Head, Sahaka playground, Encountering culture, The longest voyage, Thing that count, និង II Nodo: A sketch of hope ជាដើម។
បើទោះជាស្ថានភាពនៃការរីករាលដាលនៃជំងឺកូវីដ១៩ពុំទាន់បានគ្រប់គ្រងទាំងស្រុង ប៉ុន្តែឥទ្ធិពលនៃជំងឺនេះ ពុំបានធ្វើឱ្យរាំងស្ទះដល់ដំណើរការនៃការរៀបចំព្រឹត្តិការណ៍នានានៃកិច្ចប្រជុំកំពូលអាស៊ី-អឺរ៉ុបលើកទី ១៣ នេះឡើយ ព្រោះតាមជាក់ស្តែង ការរៀបចំពិពណ៌បង្ហាញស្នាដៃសិល្បៈអបអរកិច្ចប្រជុំនេះ បានធ្វើឡើងក្នុងបរិបទពីរគឺតាមរយៈអនឡាញ និង ការតាំងផ្ទាល់នៅក្នុងសារមនី្ទរជាតិកម្ពុជា។
មហាជន អាចអញ្ជើញទៅទស្សនាស្នាដៃជាច្រើនកំពុងតែតាំងបង្ហាញ និងបានទស្សនារូបភាពកម្រដែលអាយុកាលរាប់រយឆ្នាំ ដោយសេរីរហូតដល់ថ្ងៃទី៣១ ខែធ្នូ ឆ្នាំ២០២១ខាងមុខនេះ៕
