នៅថ្ងៃទី២៥ ខែវិច្ឆិកា ឆ្នាំ២០២១នេះ មានរឿងរ៉ាវបណ្ដាលឱ្យរញ្ជួយវេទិការប្រកួតស្រីស្អាតក្នុងប្រទេសថៃ ក្រោយមានបវរកញ្ញាជាច្រើនរូបពីកម្មវិធីប្រកួត Miss Universe Thailand 2021 បានធ្វើដំណើរទៅប្ដឹងផ្ដល់ជាងថតរូបតណ្ហាក្រាស់ម្នាក់ដែលបានព្យាយាមប្រព្រឹត្តិអនាចារលើរូបកាយរបស់នារីជាច្រើនរូបតាមរយៈសកម្មភាពដដែលៗ មិនថាចាប់គូទ ចាប់ទ្រូង និងចង់ចាប់រំលោភថែមទៀតផង។
ម្ចាស់ក្រុមហ៊ុនទិញកម្មសិទ្ធិបញ្ញាផលិតកម្មវិធីប្រកួត Miss Universe Thailand បានដឹកនាំបវរកញ្ញានិងមេធាវីការពារក្ដីចូលទៅប្ដឹងផ្ដល់សមត្ថកិច្ចប៉ូលីសនៅការិយាល័យប៉ូលិសដោយបានផ្ដល់បទសម្ភាសន៍ប្រាប់អ្នកសារព័ត៌មានថា «ទង្វើនេះមិនអាចអត់ឱនឬសម្របសម្រួលបាននោះទេព្រោះជាសកម្មភាពដែលធ្វើឱ្យខូចឈ្មោះដល់វេទិកាប្រកួត និងខូចឈ្មោះកិត្តិយសបវរកញ្ញាគ្រប់ៗគ្នាដែលរងគ្រោះហើយត្រូវមកជួបរឿងអកុសលបែបនេះផងដែរ។» មេធាវីការពារក្ដីដដែលនេះបានបន្តទៀតថា៖ «នៅមានបវរកញ្ញាជាច្រើនរូបទៀតដែលមិនហ៊ានចេញមកប្ដឹងព្រោះសរុបទាំងអស់មានជនរងគ្រោះចំនួន១០នាក់ ដែលត្រូវអ្នកថតរូបល្មោភកាមរូបនេះ ចាប់គូទ ចាប់ទ្រូង និងព្យាយាមរកឱកាសរំលោភថែមទៀត។»
មេធាវីការពារក្ដីខាងលើដែលមានឈ្មោះពិតថា និដាបានបង្ហើបឱ្យដឹងឥតលាក់ទៀតថា៖ «ជាងថតរូបម្នាក់នេះក្រៅពីប្រព្រឹត្តិទង្វើអនាចារនៅក្នុងវេទិការប្រកួតបវរកញ្ញចក្រវាឡហើយនោះ ក៏ធ្លាប់បញ្ចេញសកម្មភាពអាក្រក់បែបនេះនៅក្នុងកម្មវិធីផ្សេងៗទៀតដែរ។ អ្វីដែលសំខាន់ទៀតនោះបុរសរូបនេះថែមទាំងប្រើកម្លាំងបាយចាប់បង្ខំរំលោភបំពានរាងកាយបវរកញ្ញា ដោយទីកន្លែងកើតហេតុគឺស្ថិតនៅកន្លែងស្នាក់នៅមួយកន្លែងសម្រាប់បវរកញ្ញាស្ថិតក្នុងតំបន់ ខាវយ៉ាយ ខេត្តឈុនប៊ុរី ខណៈដែលប្រធានធំកម្មវិធីប្រកួតនេះបានប្ដេជ្ញាចិត្តថានឹងចាត់ការរឿងនេះឱ្យដល់ទីបំផុត ហើយចាប់ជនល្មើសមកផ្ដន្ទាទោស»