ពេលវេលាដែលអ្នកគាំទ្រទន្ទឹងរង់ចាំមកដល់ហើយ ឈុតតំណាងជាតិ Miss Grand Cambodia 2021 ដែលមានឈ្មោះថា «ក្សត្រីក្រុងកម្ពុជានៃវប្បធម៌អរិយធម៌» នឹងត្រូវបង្ហាញខ្លួនជូនមហាជនអ្នកគាំទ្រនៅលើឆាកប្រកួតលំដាប់អន្ដរជាតិ Miss Grand International 2021 នាយប់នេះ ថ្ងៃទី ៣០ ខែ វិច្ឆិកា ឆ្នាំ២០២។ ការប្រកួតវគ្គឈុតតំណាងជាតិនេះ នឹងធ្វើឡើងនៅទីក្រុងបាងកក ប្រទេសថៃ។
បើតាមការបង្ហោះនៅលើហ្វេសប៊ុក Miss Grand Cambodia បានរៀបរាប់ថា « ចូលរួមឱ្យកម្លាំងចិត្តទៅដល់កញ្ញាឯកដ៏អស្ចារ្យនៃកម្ពុជាឆ្នាំ២០២១ ( Miss Grand Cambodia 2021 ) ក្នុងថ្ងៃបង្ហាញឈុតតំណាងជាតិ ដ៏អស្ចារ្យមួយនេះ ទាំងអស់គ្នា ឈុតតំណាងជាតិកញ្ញាឯកដ៏អស្ចារ្យនៃកម្ពុជា ដែលមានឈ្មោះថា ក្សត្រីក្រុងកម្ពុជានៃវប្បធម៌អរិយធម៌ នឹងត្រូវបង្ហាញនៅថ្ងៃទី៣០ ខែ វិច្ឆិកា នេះហើយ នៅក្នុងកម្មវិធីកញ្ញាឯកដ៏អស្ចារ្យអន្តរជាតិឆ្នាំ២០២១ ( Miss Grand international 2021 ) នឹងធ្វើការផ្សាយផ្ទាល់តាមរយៈ Channel YouTube : Grand TV តែមួយគត់»។
យ៉ាងណាមិញ បវរកញ្ញា ប៉ូ គីមថេងសុតធីតា ក៏បានធ្វើការ Live នៅលើហ្វេសប៊ុករបស់ខ្លួនថា កញ្ញាពិតជារំភើបខ្លាំងមែនទែន ខណៈដែលបានបង្ហាញឈុត «ក្សត្រីក្រុងកម្ពុជានៃវប្បធម៌អរិយធម៌» នៅលើវេទិកាអន្ដរជាតិមួយនេះ។ កញ្ញាថា ខណៈកំពុងហាត់សមដំណើរនៅលើឆាកយប់មិញនេះ កញ្ញាពិតជាក្ដុកក្ដួលក្នុងអារម្មណ៍ណាស់ រហូតដល់ស្រក់ទឹកភ្នែកមកតែម្ដង នៅពេលដែលពិធីករធ្វើការពោលរៀបរាប់អំពីអត្ថន័យរបស់ឈុត«ក្សត្រីក្រុងកម្ពុជានៃវប្បធម៌អរិយធម៌» មួយនេះ។ កញ្ញាបន្ដថា កញ្ញាមិនធ្លាប់នឹកស្មានសោះថា កូនខ្មែរអាចនាំឈុតដ៏ប្រណីត និងបង្ហាញពីអត្តសញ្ញាណជាតិដ៏អសច្ចារ្យនេះ បង្ហាញឱ្យមហាជនទូទាំងពិភពលោកបានឃើញ។ កញ្ញាប្រាប់អ្នកគាំទ្រថា កញ្ញាគ្មានពាក្យថានឿយហត់នៅក្នុងចិត្តឡើយ គឺកញ្ញានឹងតស៊ូឱ្យអស់ពីកម្លាំងកាយចិត្ត។ កញ្ញាសូមអំពាវនាវឱ្យអ្នកគាំទ្រទាំងអស់ចូលរួមទស្សនាការប្រកួតឈុតតំណាងជាតិ នាវេលាម៉ោង ៧ យប់ តាមរយៈឆាណែលយូធូប Grand TV ។
សូមជម្រាបផងដែរថា ឈុត «ក្សត្រីក្រុងកម្ពុជានៃវប្បធម៌អរិយធម៌» បានរចនាម៉ូដរំលេចព្យព្ជានៈទាំង ៣៣តួ បូករួមនឹង តួលេខខ្មែរពីលេខ១ដល់លេខ។ លក្ខណៈពិសេសនៃឈុតនេះគឺ ផ្ទាំងអក្សរកាត់ពីកញ្ចក់ភ្លឺថ្លា ពេលដែលមានពន្លឺចាំងផ្លាតមក នោះនឹងធ្វើឱ្យព្យញ្ជនៈខ្មែរពោរពេញទៅដោយពន្លឺពណ៌មាស នៅលើឆាកតែម្ដង។ ឈុតនេះត្រូវបានរចនាម៉ូដដោយ លោក លី ភក្ត្រារដ្ឋហ្វុង នឹងលោក សាយ ធារ៉ា និងក្រុមការងារជាច្រើននាក់ទៀត ខិតខំលះបង់ ពេលវេលា កម្លាំងកាយចិត្តពិតប្រាកដ ក្នុងការធ្វើឈុតតំណាងជាតិដ៏អស្ចារ្យប្រកបដោយប្រណីតភាព នាំមកនូវមោទនាភាព៕