សារព័ត៌មានថៃដ៏ធំមួយនេះ បានបន្តផ្សព្វផ្សាយចោទប្រកាន់យ៉ាងគឃ្លើនពីសំណាក់ហ្វេនថៃលើ កញ្ញា ទេព បូព្រឹក្ស

កាលពីថ្ងៃទី៣០ ខែវិច្ឆិកា ឆ្នាំ២០២១ សារព័ត៌មានដ៏ធំមួយរបស់ថៃដែលមានឈ្មោះថា «Khaosod» បានចុះផ្សាយព័ត៌មានពាក់ព័ន្ធនឹងករណីចោទប្រកាន់របស់អ្នកគាំទ្រថៃមកលើតារាចម្រៀងល្បីរបស់ខ្មែរ ដោយក្រុមអ្នកគាំទ្រថៃទាំងនោះបានចោទប្រកាន់យ៉ាងគឃ្លើនមកលើតារាចម្រៀងខ្មែរយើងថាបាន Copy (ចម្លង) បទចម្រៀង Lisa សមាជិកក្រុមចម្រៀង Blackpink។

សារព័ត៌មានថៃនោះបានសរសេរថាកាលពីថ្ងៃទី២៧ ខែវិច្ឆិកា កន្លងមក «TBP» តារាចម្រៀងកម្ពុជាបានបញ្ចេញ Single ថ្មី «Top Of the Lady» ដែលនៅក្នុង MV នោះអាចនិយាយបានថាគ្រប់គ្រឿងមិនថា សំលៀកបំពាក់ ម៉ូដសក់ ឈុតឆាក និងការសម្ដែងផ្សេងៗគឺប្រមូលផ្ដុំទៅដោយការបង្ហាញនូវសិល្បៈវប្បធម៌របស់កម្ពុជាឱ្យពិភពលោកបានដឹង។

សារព័ត៌មាននេះបានបន្ដផ្សាយក្នុងអត្ថបទខ្លួនទៀតថា អ្នកលេងអ៊ិនធឺណិតបានសង្កេតឃើញថាបទថ្មីនេះមានទំនុកនិងតន្ត្រីស្រដៀងនឹងបទចម្រៀង Blackpink ក្រុមចម្រៀងល្បីដែលមានសមាជិក Lisa ជាជនជាតិថៃម្នាក់ក្នុងក្រុមនោះ មិនថាជាបទចម្រៀង DDU DU DUU DU និងបទ Kill This Love ។

សារព័ត៌មានខាងលើនេះក៏លើកយកផេកចំនួនពីរដែលផេកទាំងពីរនេះត្រូវបានអ្នកលេងបណ្ដាញសង្គមកម្ពុជាចាត់ទុកថាជាផេកញុះញង់បង្កឱ្យមានការស្អប់ខ្ពើមនិងឈ្លោះប្រកែកគ្នារវាងប្រទេសនិងប្រទេស ប្រជាជននិងប្រជាជន ដូចជាផេក «หนังฝังมุก» និង «ASEAN “มอง” ไทย» ដោយក្នុងនោះក្រៅពីមានជនជាតិថៃចូលមកបង្ហាញការយល់ឃើញហើយនោះ ក៏នៅមានប្រជាជនកម្ពុជាក៏បានចូលមកឆ្លើយតប និងបង្ហាញការយល់ឃើញយ៉ាងច្រើនដូចគ្នាដែរ។

សូមចុចអាន អ្នកគាំទ្រខ្មែរ តវ៉ាខ្លាំងមែនទែន រឿងថៃចោទប្រកាន់បទ «វីរនារី» ថា Copy

ចំពោះការលើកឡើងដដែលជាដដែលរបស់ផេកថៃ ឬសារព័ត៌មានថៃ ត្រូវបានប្រជាពលរដ្ឋកម្ពុជា ពិសេសអ្នកគាំទ្រតារាចម្រៀង ទេព បូព្រឹក្សច្រានចោល ហើយបានលើកជាភស្ដុតាង និងអំណះអំណាងតវ៉ាជាច្រើន ដែលស្ដែងឱ្យឃើញពីការខិតខំប្រឹងប្រែងរបស់តារាស្រីរូបនេះ ក៏ដូចជាក្រុមការងារដើម្បីបង្ហាញពីសិល្បៈវប្បធម៌ខ្មែរ ដែលធ្លាប់ជាអារ្យប្រទេសមានភាពរុងរឿងកាលពីសម័យបុរាណ ជាពិសេសអាណាចក្រខ្មែរពីបុរាណកាលគឺជាប្រទេសដ៏រីកចម្រើនមានសិល្បៈ វប្បធម៌ជារបស់ខ្លួន ដូច្នេះការដែលភាគីថៃមួយចំនួនលើកឡើងថា តារាកម្ពុជាទៅ Copy ពីថៃនោះគឺជារឿងមួយដែលភាគីកម្ពុជាមិនទទួលយកជាដាច់ខាត។

ជាងនោះទៀតក៏មានអ្នកលេងបណ្ដាញសង្គមជាច្រើនបានកាត់ត វីដេអូផ្សេងៗ ដោយលើកជាទល្ហីករណ៍មកបញ្ជាក់ជាអំនះអំនាងឆ្លើយតបទៅកាន់ភាគីថៃបានភ្លឺភ្នែកទាំងលើ Tiktok និង Facebook ថា ស្នាដៃ «Top Of the Lady» គឺបង្កើតឡើងដោយកូនខ្មែរពិតៗ មិនមែនជាការចម្លងពីបរទេសដូចការចោទប្រកាន់ពីសំណាក់ភាគីថៃនោះឡើយ៕

អត្ថបទពាក់ព័ន្ធ