លោក Ekaphob Pothisai គ្រូបង្វឹកក្រុមគិរីវង់សុខសែនជ័យ បានប្រកាសចែកផ្លូវជាមួយក្រុមដែលមានមូលដ្ឋាននៅខេត្តតាកែវ ដែលជាសមាជិកពានរង្វាន់លីគកំពូលកម្ពុជា មួយនេះនៅរសៀលថ្ងៃពុធ ទី១ ខែធ្នូ ឆ្នាំ២០២១ ម្សិលមិញនេះ ខណៈក្លិបនៅខេត្តតាកែវ មួយនេះបានបញ្ជាក់ពីការមិនបន្តកុងត្រាជាមួយកីឡាករមួយចំនួនដែលផុតកិច្ចសន្យាផងដែរ។
គ្រូបង្វឹកសញ្ជាតិថៃ រូបនេះបានចូលរួមជាមួយគិរីវង់សុខសែនជ័យ នៅរដូវកាល២០១៩ បន្ទាប់ពីចំណាយពេលរយ:ពេល៣ឆ្នាំ ជួយឲ្យក្រុមទទួលបានចំណាត់ថ្នាក់ Top8 ប៉ុន្តែបានត្រឹមខកចិត្តសម្រាប់លទ្ធផលជើងទី២ នៅលីគកំពូលកម្ពុជាឆ្នាំ២០២១ បន្ទាប់ពីធ្វើមិនសូវបានល្អ។
នៅថ្ងៃជាមួយគ្នានេះដែរលោក Florian អគ្គលេខាធិការក្លិបគិរីវង់សុខសែនជ័យ បានចេញសារអរគុណលោក Ekaphob ចំពោះការខិតខំប្រឹងប្រែងក្នុងរយ:ពេល៣រដូវកាលកម្លងមក និងអរគុណដល់អ្នកគាំទ្រផងដែរ។ លោកបញ្ជាក់ថា៖«តាងនាមអោយក្លិប ក៏សូមអរគុណដល់គ្រូបង្វឹករបស់យើង លោក Ekabop សម្រាប់ការប្រឹងប្រែងជួយក្លិប៣រដូវកាលកន្លងមក និងអភិវឌ្ឍន៏សមត្ថភាពកីឡាករថ្នាលយុវជនរបស់យើងអោយកាន់តែមានអនាគតភ្លឺស្វាង។ ឥលូវនេះ យើងនឹងមាន រជ្ជកាលមួយថ្មី ជាប្រវត្តិសាស្ត្ររបស់ក្លិប ប្រសិនបើយើងចង់បន្តរីកចម្រើន និងឈានឆ្ពោះទៅមុខ»។
លោកអគ្គលេខាធិការបញ្ជាក់ទៀតថា៖«ក្នុងដំណាក់កាលផ្លាស់ប្តូរនេះ យើងបានសម្រេចចិត្ត សម្រាប់ការចាកចេញ និងមិនបន្តកុងត្រាដល់កីឡាករជាច្រើន ដើម្បីនាំយកកីឡាករថ្មីៗដែលបទពិសោធន៏ ក៏ដូចជាផ្តល់ឳកាសដល់កីឡាករថ្នាលយុវជនរបស់យើង ដូចអ្វីដែលយើងបានកំពុងធ្វើកន្លងមក»។
បុរសជនជាតិបារាំង រូបនេះបន្ថែមថា៖«ចុងក្រោយ សូមអរគុណយ៉ាងពន់ពេក ដល់អ្នកគាំទ្រ និងសហគមន៏ក្លិបរបស់យើងដែលបន្តលើកទឹកចិត្តកន្លងមក ទោះបីជាពួកគាត់មិនអាចមកចូលរួមទស្សនាផ្ទាល់ក៏ដោយ។ យើងនឹងសន្យាថា យើងខិតខំប្រឹងប្រែងអោយកាន់តែខ្លាំងឡើងៗ សម្រាប់រដូវកាលបន្ទាប់ និងធ្វើអោយអ្នកគាំទ្រមានមោទនភាពសម្រាប់ក្លិបនេះ។ យើងទន្ទឹងរង់ចាំអ្នកគាំទ្ររបស់យើងរួចរាល់ហើយសម្រាប់រដូវកាលខាងមុខនេះ»។
