ហ្វេនវៀតណាម សម្រុកសុំទោស បវរកញ្ញាកម្ពុជា ប៉ូ គីមថេងសុតធីតា ក្រោយមានការយល់ច្រឡំយ៉ាងធ្ងន់ធ្ងរ!

ជាការពិតណាស់កម្មវិធីប្រកួត Miss Grand International បានបញ្ចប់ទៅ ប្រកបដោយជោគជ័យហើយ ចំណែកម្ចាស់មកុដប្រចាំ២០២១នេះ គឺបានទៅ លើបវរកញ្ញាប្រទេសវៀតណាម Nguyen Thuc Thuy Tien ប៉ុន្តែរឿងរ៉ាវពាក់ព័ន្ធនឹងវេទិកាមួយនេះនៅ តែមិនទាន់ចប់នៅ ឡើយសម្រាប់អ្នកគាំទ្រទាំងកម្ពុជា និងវៀតណាម ដូចជាកាលពីថ្ងៃទី៦ ខែធ្នូ ម្សិលមិញនេះ នៅ លើបណ្ដាញសង្គមនៅ ប្រទេសវៀតណាមបានផ្ទុះរឿងមួយ គឺមានការចោទប្រកាន់ថាបវរកញ្ញាកម្ពុជា ប៉ូ គីមថេងសុតធីតា គឺជាអ្នកចែករំលែកនិងយកវីដេអូនបវរកញ្ញាវៀតណាមហែកកិច្ចសន្យាជំពាក់ប្រាក់ទៅ ឱ្យបវរកញ្ញាប្រទេសផ្សេងៗមើល ធ្វើឱ្យបែករឿង និង មានការរើសអើងចំពោះ Queen របស់ប្រទេសជិតខាងកម្ពុជាមួយនេះ (វៀតណាម)។ ដំណឹងបែកធ្លាយនេះ បានធ្វើឱ្យមហាជនពិសេសហ្វេនវៀតណាមបានសម្ដែងអារម្មណ៍មិនពេញចិត្តនិងខឹងសម្បារយ៉ាងខ្លាំងចំពោះ Queen កម្ពុជា កញ្ញា ធីតា រហូតឈានដល់មានការផុសជេរ អុជអាល ប្រមាថ មើលងាយ លក្ខណៈហែកហួរនៅ លើសង្គមអនឡាញវៀតណាម ដែលធ្វើឱ្យប៉ះពាល់យ៉ាងខ្លាំងចំពោះកិត្តិយស និងសេចក្ដីថ្លៃថ្នូររបស់បវរកញ្ញាតំណាងប្រទេសកម្ពុជាយើង។

យ៉ាងណាមិញកាលពីយប់ទី៦ ម្សិលមិញនេះមានការប៉ះទង្គិចគ្នាមួយប្រាវរវាងក្រុមអ្នកគាំទ្រវៀតណាម និងកម្ពុជាដែលម្ខាងៗសុទ្ធតែចេញមុខការពារ Queen ប្រចាំប្រទេសរាងខ្លួន ជាហេតុធ្វើឱ្យសង្គ្រាមទឹកមាត់នេះកាន់តែរីកធំឡើងៗ រហូតធ្វើឱ្យបវរកញ្ញាកម្ពុជាមិនអាចសម្ងំស្ងៀមដើម្បីឱ្យពាក្យចចាមអារ៉ាមនោះរសាត់បាត់តាមខ្យល់បន្តទៀតបាន ទើបកញ្ញាសម្រេចចិត្តចេញមក Live ដើម្បីលាតត្រដាងការពិតទាក់ទងទៅ នឹងការយល់ច្រឡំខាងលើ ដោយកញ្ញាអះអាងទាំងទឹកភ្នែកពីសេចក្ដីបរិសុទ្ធចិត្តរបស់ខ្លួនថា កញ្ញាត្រូវរ៉ូវគ្នាណាស់ជាមួយនឹងបវរកញ្ញាវៀតណាម និងបវរកញ្ញាថៃ កញ្ញាពិតជាមិនយល់និងមិនដឹងសោះថាតើដំណឹងនេះចេញមកដោយរបៀបណា។ នៅ ក្នុង Live នោះដំបូងឡើយមានអ្នកគាំទ្រវៀតណាមពីរប្រភេទទាំងក្រុមអ្នកជឿលើការបកស្រាយរបស់កញ្ញា និងក្រុមចូលមកចំអកឡកឡឺយ ហើយមិនជឿសម្ដីរបស់ស្រីស្អាតកម្ពុជាយើង។

ប៉ុន្តែអ្វីក៏ដោយ ពាក្យចាស់លោកពោលថា «មាសសុទ្ធមិនខ្លាចភ្លើង មនុស្សល្អព្រះថែរក្សា» ទីបំផុតការយល់ច្រឡំនានាត្រូវបានលាតត្រដាង ហេតុដូច្នេះហើយចុងក្រោយនេះក្រុមអ្នកគាំទ្រវៀតណាមដែលបានប្រើសម្ដីប្រមាថ ជេរស្ដី មកលើបវរកញ្ញាកម្ពុជា បានចូលមកសម្ដែងការសោកស្ដាយយ៉ាងខ្លាំងចំពោះទង្វើរបស់ខ្លួន និងជនជាតិខ្លួន ដែលបានប្រព្រឹត្តិខុសឆ្គងចំពោះ Miss Grand Cambodia កម្ពុជា តាមរយៈការ Comment , Share និងប្រើប្រាស់រូបភាពផ្សេងៗ។

ឆ្លើយតបចំពោះការទទួលស្គាល់កំហុស អ្នកគាំទ្រកម្ពុជាដែលជាប្រជាជនគោរពសាសនាព្រះពុទ្ធ មានចិត្តបុណ្យ មានធម៌មេត្តា បានផ្ដល់នូវការអភ័យទោស ហើយអរគុណទៅ កាន់ភាគីវៀតណាមវិញដែលដឹងខុសទទួលស្គាល់ កំហុស ហើយព្រមកែប្រែកំហុស ខុសឆ្គងរបស់ខ្លួន ប៉ុន្តែអ្នកគាំទ្រខ្លះនៅ មិនអស់ចិត្តព្រោះតែ Director របស់ Miss Vietnam ដែលជាអ្នកនិយាយបង្កាច់បង្ខូច Miss Grand Cambodia មិនបានចេញមកសុំទោស ចំពោះទង្វើនិងពាក្យសម្ដីរបស់ខ្លួន ដែលជាដើមហេតុនាំឱ្យមានការវាយប្រហារនិងប្រមាថមកលើបវរកញ្ញាកម្ពុជា៕