នៅ សល់ត្រឹមតែ ៥ថ្ងៃទៀតប៉ុណ្ណោះ ពោលគឺនៅ ថ្ងៃចន្ទ ទី១៣ ខែធ្នូ ឆ្នាំ២០២១ កម្មវិធី Miss Universe 2021 នឹងប្រកួតផ្ដាច់ព្រ័ត្រដើម្បីស្វែងរកម្ចាស់មកុដនិងម្ចាស់តំណែងបវរកញ្ញាចក្រវាឡអន្តរជាតិលើកទី៧០ របស់ពិភពលោក ហើយ។ ជាមួយនឹងការទន្ទឹងរង់ចាំពីសំណាក់ហ្វេនថាតើបេក្ខនារីបវរកញ្ញាប្រទេសណា នឹងក្លាយជាម្ចាស់តំណែងកម្រិតអន្តរជាតិនេះ អ្នកគាំទ្រក៏មានការចាប់អារម្មណ៍ខ្លាំងដែរចំពោះគណៈកម្មការកាត់សេចក្ដី ព្រោះឆ្នាំនេះមានរាជិនីកំពូលសម្រស់ដែលជាកំពូលតារា២ដួងប្រចាំប្រទេសឥណ្ឌា និងហ្វីលីពីន ត្រូវបានជ្រើសរើសឱ្យក្លាយជាគណៈកម្មាការកាត់សេចក្ដីក្នុងកម្មវិធីនេះ។
យោងតាមការប្រកាសនៅ លើប្រព័ន្ធផ្សព្វផ្សាយ និងសារព័ត៌មាននានា បានឱ្យដឹងថា រាជិនីសម្រស់ Marian Rivera កំពូលតារាសម្ដែងប្រចាំប្រទេសហ្វីលីពីន ឬដែលប្រជាជនកម្ពុជាស្គាល់យ៉ាងច្បាស់គឺ នាងម៉ារីម៉ា ត្រូវបានអង្គភាពរៀបចំកម្មវិធីមួយនេះជ្រើសរើសឱ្យធ្វើជាគណៈកម្មការម្នាក់នៅ ក្នុងកម្មវិធីប្រកួតនាប្រទេសអ៊ីស្រាអែលលើកនេះ។
ក្រៅ ពីតារាសម្ដែងរបស់ហ្វីលីពីនខាងលើហើយនោះ រាជិនីកំពូលសម្រស់របស់ឥណ្ឌា ដែលជាអតីតបវរកញ្ញាចក្រវាឡឥណ្ឌាប្រចាំឆ្នាំ២០១៥ និងជាតារាសម្ដែង-តារាបង្ហាញម៉ូដដ៏ល្បីរបស់បូលីវូដ កញ្ញា Urvashi Rautela (អ៊ុវ៉ាស៊ី រ៉ៅ ថេឡា) ក៏នឹងក្លាយជាគណៈមេប្រយោគមួយរូបទៀតដែរនៅ ក្នុងកម្មវិធីកម្រិតពិភពលោកខាងលើនេះ។
គួរដឹងថានៅ រាជិនីកំពូលសម្រស់ទាំងពីរដួងបានធ្វើដំណើរចាកចេញពីប្រទេសរបស់ខ្លួនហើយកាលពីថ្ងៃទី៧ ខែធ្នូ ឆ្នាំ២០២១ ដើម្បីត្រៀមខ្លួនធ្វើជាគណៈកម្មការនៅ ក្នុងការប្រកួត Miss Universe 2021 លើកទី៧០ នាទីក្រុង Eilat (អ៊ីឡាត) ប្រទេសអ៊ីស្រាអែល នេះបើយោងតាមការចែករំលែកពីផេក Sash Factor (សាហ្វិចទ័រ) ។
សូមជំរាបជូនថា បវរកញ្ញាប្រទេសមិចស៊ិក កញ្ញា Andrea Meza (អែនឌ្រា មេតសា) គឺជាម្ចាស់ជ័យលាភីចំណាត់ថ្នាក់លេខ១ បវរកញ្ញាចក្រវាឡអន្តរជាតិលើកទី៦៩ ដែលបានរៀបចំឡើងកាលពីថ្ងៃទី១៦ ខែឧសភា ឆ្នាំ២០២១ នាទីក្រុងហូលីវូដ រដ្ឋហ្ល័ររីដា សហរដ្ឋអាមេរិក៕
ប្រភព៖ news18