សម្រាប់ហ្វេនអ្នកគាំទ្រនិយមចូលចិត្តការប្រកួតបវរកញ្ញាចក្រវាឡ ឬ Miss Universe គេបានកត់សម្គាល់ឃើញថា ឈុតតំណាងជាតិរបស់ Miss Universe Vietnam គឺបានរចនាម៉ូដឡើង ដើម្បីបង្ហាញពីអត្តសញ្ញាណម្ហូបអាហារល្បីប្រចាំប្រទេសវៀតណាម។ នៅ ក្នុងថ្ងៃនេះសារព័ត៌មានត្រយងផ្នែកសិល្បៈកម្សាន្ដ សូមលើកយកឈុតតំណាងជាតិ Miss Universe Vietnam ទាំង៣ជំនាន់មកបង្ហាញជូនមិត្តអ្នកគាំទ្រ។ តើមានឈុតណាខ្លះ? ហើយស្ថិតនៅក្នុងការប្រកួតឆ្នាំណាខ្លះដែរ ? តោះទស្សនាខាងក្រោមនេះ ៖
១. ឈុតតំណាងជាតិ Miss Universe Vietnam 2018
បវរកញ្ញា H’Hen Nie បានគ្រងឈុតតំណាងជាតិដែលមានសណ្ឋានជា «នំប៉័ងដាក់សាច់» ដែលជារចនាម៉ូដដោយលោក Pham Phuoc Dien។ បវរកញ្ញារូបនេះ បានអះអាងនៅលើវេទិកាប្រកួតអន្ដរជាតិបង្ហាញពីអត្ថន័យឈុតនេះថា «នំប៉័ងដាក់សាច់» ត្រូវបានជនជាតិវៀតណាម និយមបង្ហាញប្រភេទអាហារមួយនេះទៅកាន់ភ្ញៀវទេសចរណ៍ដែលមកលេងប្រទេសវៀតណាម។ ហើយ«នំប៉័ងដាក់សាច់» ត្រូវបានជនជាតិនេះ ចាត់ទុកជាអាហារវប្បធម៌មួយ ដែលមានភាពងាយស្រួលជាងគេ និងជាអត្តសញ្ញាណនំ បាញ់មី ។
២. ឈុតតំណាងជាតិ Miss Universe Vietnam 2019
ឈុតតំណាងជាតិ Miss Universe Vietnam នៅក្នុងឆ្នាំ 2019 មានរូបរាងជាង «ឧបករណ៍ឆុងកាហ្វេ» ដែលគ្រងដោយបវរកញ្ញា Hoang Thuy និងរចនាម៉ូដដោយលោក Tran Nguyen Minh Duc។ ឈុតនេះត្រូវបានបង្ហាញអត្ថន័យឱ្យឃើញថា កាហ្វេ ជាប្រភេទភេសជ្ជៈដ៏ពេញនិយមក្នុងប្រទេសវៀតណាម ហើយប្រជាជនប្រទេសនេះ និយមទទួលទានកាហ្វេខ្មៅ ដែលប្រើឧបករណ៍ឆុងកាហ្វេបែបបុរាណ និងឱ្យឈ្មោះថា ហ្វ៊ីន។
៣.ឈុតតំណាងជាតិ Miss Universe Vietnam 2021
នៅក្នុងឆ្នាំ២០២១នេះ រៀងប្លែកពីឆ្នាំមុនៗបន្ដិច ដោយសារតែឈុតតំណាងជាតិមួយនេះ បានដកស្រង់អាហារចេញពីតំបន់ខេត្តកម្ពុជាក្រោម នេះគឺឈុត «អន្សមស្នូលពងទាប្រៃ»។ កម្មវិធីប្រកួត Miss Universe ឆ្នាំ2021 ឆ្នាំនេះ បវរកញ្ញាវៀតណាម មានគោលបំណងបង្ហាញឆាកអន្ដរជាតិឱ្យដឹងថា ឈុតនេះបានបង្ហាញអត្ថន័យនៃប្រពៃទំនៀមទំលាប់នៃការច្នៃប្រឌិតមុខម្ហូបអាហាររបស់វៀតណាម។ ឈុតនេះនឹងគ្រងដោយបវរកញ្ញា Kim Duyen ជា Miss Universe Vietnam 2021 ។