តារាកំប្លែងវ័យចំណាស់ លោកតាចេក អតីតកូនក្រុមកំប្លែងនាយកុយ បានបាត់វត្តមានពីកញ្ចក់ទូរទស្សន៍ក្នុងកម្មវិធីកំប្លែងផ្សេងៗមួយរយៈធំហើយ ដោយលោកបានរសាត់អណ្ដែតទៅ ជួលតូបប្រកបមុខរបរលក់ផ្លែឈើ និងគ្រឿងភេសជ្ជៈបន្តិចបន្តួច គ្រាន់ចិញ្ចឹមជីវិត នៅ តាមផ្លូវឡើងរមណីយដ្ឋានភ្នំគិរីរម្យ ប៉ុន្តែការលក់ដូរនោះមិនកាក់កបនោះឡើយ ដូច្នេះទើបសម្រេចចិត្តទៅ ជួលតូបលក់បន្លែឱ្យភរិយានៅ ផ្សារត្រែងត្រយឹងវិញ នេះបើតាមការបញ្ជាក់របស់សាមីខ្លួនប្រាប់មកកាន់អ្នកសារព័ត៌មានត្រយង។
យ៉ាងណាមិញបើងាកមកនិយាយពីអាជីពជាអ្នកកំប្លែងរបស់លោកតាចេកវិញ លោកបានឱ្យដឹងថាលោកក៏មិនដឹងច្បាស់ពីមូលហេតុដែលបណ្ដាលឱ្យលោកស្រាប់តែលែងត្រូវបានគេហៅ ទៅ ចូលរួមលេងកំប្លែងក្រោយជាសះស្បើយពីជំងឺដែរ។
លោកតាចេកបានពោលឱ្យដឹងទៀតថាពេលនេះលោកលេងឱ្យក្រុមល្ខោនភី សុគន្ធី ខេត្តតាកែវ ប៉ុន្តែសម្រាប់ការងារសិល្បៈផ្សេងៗទៀតនោះនៅ មិនទាន់មានសញ្ញាណល្អនៅ ឡើយទេ ដោយលោកតាបានបន្តឱ្យដឹងថាពេលនេះសុខភាពលោករឹងមាំវិញហើយទោះជាមានវ័យ៦៧ឆ្នាំក្ដី ជាពិសេសលោកបានសង្កត់ធ្ងន់ថាជីវិតរបស់លោកកើតមកគឺដើម្បិសិល្បៈ ដូច្នេះលោកសង្ឃឹមថាលោកនឹងដើរលើវិថីនេះរហូតលុះត្រាតែលោកទៅ លែងរួច។ តារាកំប្លែងរូបនេះក៏បានអំពាវនាវសុំឱ្យលោកបានចូលលេងកំប្លែងឡើងវិញ និងប្រកាសទទួលសម្ដែងគ្រប់ការងារទាំងអស់ឱ្យតែផលិតករ ម្ចាស់ផលិតកម្ម ឬ ម្ចាស់ផលិតផលនានាត្រូវការរូបលោកទៅ ថត និងសម្ដែងជូន។
ជាចុងក្រោយលោកតាចេកបានថ្លែងអំណរគុណយ៉ាងជ្រាលជ្រៅ ចំពោះសប្បុរសជនដែលបានជួយដល់លោកទាំងអស់ក្នុងកំឡុងពេលដែលជីវភាពលោកជួបប្រទះការលំបាកទោះជាតិចឬច្រើនក្ដីលោកមានក្ដីរំភើបជាទីបំផុត៕
ទស្សនាវីដេអូព័ត៌មានខាងក្រោមនេះ៖
