នៅ ពេលថ្មីៗនេះ គេឃើញអតីតតារាសម្ដែងស្រី សារ៉ាយ សក្ខណា ទើបតែវិលត្រឡប់ពីទឹកដីសហរដ្ឋអាមេរិក មកកាន់កម្ពុជា។ មកដល់ទឹកដីកំណើតភ្លាម តារាស្រីរូបនេះស្រាប់តែសម្រុកកើបលុយពីសិល្បៈភ្លែតតែម្ដង។ អ្នកនាង សារ៉ាយ សក្ខណា បានចាយសម្រស់ថតម៉ូដឱ្យសម្អាងការជាច្រើន រហូតដល់អ្នកគាំទ្រលាន់មាត់ថា អីយ៉ា! អ្នកនាង សារ៉ាយ សក្ខណា វិលមកវិញស្អាតម្លេះ?
យ៉ាងណាមិញ នៅ លើបណ្ដាញសង្គមហ្វេសប៊ុករបស់តារាស្រី នី មុនីនាថ ក៏រមែងឃើញបង្ហោះរូបភាព និងវីដេអូស្និទស្នាលខ្លាំងជាមួយអ្នកនាង សារ៉ាយ សក្ខណា ផងដែរ ទាំងដែលកន្លងមកអ្នកគាំទ្រមិនធ្លាប់ដឹងសោះថា អ្នកទាំងពីរស្អិតរមួតស្និទស្នាលខ្លាំងដល់ថ្នាក់នេះ។ តើអ្នកទាំងពីរមានទំនាក់ទំនងពិសេសអ្វីមែនទេ?
កំពូលតារាទឹកភ្នែក នី មុនីនាថ បានបង្ហោះសារនៅ លើហ្វេសប៊ុកខ្លួន ទម្លាយខ្ទេចគ្មានសល់ពីអតីតកាល១៧ឆ្នាំជាមួយអ្នកនាង សារ៉ាយ សក្ខណា ថា ៖ «រយៈពេលជិត១៧ឆ្នាំហើយដែលយើងរាប់អានគ្នាជាមិត្តភ័ក្ដិ មានទាំងការស្រលាញ់ ផ្ដល់ពេលវេលាឱ្យគ្នា ឈ្លោះគ្នាក៏មាន សប្បាយរីករាយក៏មាន យល់ចិត្តក៏មាន តែពួកយើងមិនដែរចោលគ្នា អរគុណសម្រាប់ក្ដីស្រលាញ់មួយនេះ Saray Sakana (រូបភាពអត់សមសរសេរអ៊ីចឹងសោះ )»។ គ្រាន់តែបង្ហោះបែបនេះភ្លាម អ្នកនាង សារ៉ាយ សក្ខណា ក៏បាន Comment តបវិញភ្លែតថា« Wow លឿនណាស់ឯងអើយ ១៧ឆ្នាំ»។
ផ្ដល់បទសម្ភាសន៍បន្ថែមប្រាប់អ្នកសារព័ត៌មានត្រយង តារាស្រី នី មុនីនាថ រៀបរាប់ថា ៖ «ការពិតខ្ញុំជាមួយ អ្នកនាង សារ៉ាយ សក្ខណា គឺស្រឡាញ់រាប់អានគ្នាអស់រយៈពេល ១៧ឆ្នាំមកហើយ។ ពួកយើងជាមិត្តល្អនឹងគ្នា តែក៏មានពេលខ្លះឈ្លោះគ្នារហូតដែរ។ ចាប់ទាំងពីចូលសិល្បៈមក អ្នកនាង សារ៉ាយ សក្ខណា គឺជាមិត្តតែម្នាក់គត់ដែលជួយយកអាសារខ្ញុំ ហើយរាក់ទាក់ខ្ញុំដូចមនុស្សធ្លាប់ស្គាល់គ្នាយូរហើយមកអ៊ីចឹង »។ កញ្ញាបន្ដថា «មានថ្ងៃមួយនេះគ្រួសារខ្ញុំមានបញ្ហា មានគេមកបង្ករឿងតូបលក់កាសែតរបស់គ្រួសារខ្ញុំ។ ពេលនោះខ្ញុំបានសុំអ្នកដឹកនាំរឿងទៅ ផ្ទះមុន ព្រោះត្រូវប្រញាប់ទៅ ជួយដោះស្រាយបញ្ហាគ្រួសារកំពុងកើតឡើង។ តែអ្នកនាងដឹកនាំ មិនឱ្យខ្ញុំទាល់តែសោះ។ ខ្ញុំក៏តូចចិត្តហើយមកអង្គុយយំម្នាក់ឯង។ ភ្លាមនោះស្រាប់តែអ្នកនាង សារ៉ាយ សក្ខណា មកលួងលោមខ្ញុំ និងជួយសុំអ្នកដឹកនាំរឿងឱ្យខ្ញុំបានទៅ ផ្ទះវិញភ្លាម»។
កញ្ញា នី មុនីនាថ បានរៀបរាប់ទៀតថា «ទំនាក់ទំនងស្និទ្ធស្នាលជាមួយអ្នកនាង សារ៉ាយ សក្ខណា គឺចាប់ផ្ដើមពីថ្ងៃខួបកំណើតរបស់អ្នកនាង សារ៉ាយ សក្ខណា កាល១៧ឆ្នាំមុនមកម្លេះ រហូតមកទល់សព្វថ្ងៃនេះ។ ក៏ប៉ុន្ដែមានពេលមួយគឺពួកយើងឈ្លោះគ្នា និងមិននិយាយរកគ្នាដល់ទៅ១ឆ្នាំពេញ»។ មុនីនាថ បញ្ជាក់ថា «ភាគច្រើនឱ្យតែឈ្លោះគ្នា គឺអ្នកនាង សារ៉ាយ សក្ខណា ព្យាយាមតាមមកនិយាយរកមុនរហូត និងលើកហេតុផលប្រាប់ខ្ញុំ ក៏ប៉ុន្តែមកពីចរិតខ្ញុំកាច មិនព្រមនិយាយរកវិញ ទើបក្លាយជាហេតុផលអូសបន្លាយពេលវេលារហូតដល់ទៅ ១ឆ្នាំតែម្ដង។ ខ្ញុំហ៊ាននិយាយថា មានតែអ្នកនាង សារ៉ាយ សក្ខណា ទេ ដែលយល់ចិត្តខ្ញុំ និងស្រឡាញ់ខ្ញុំខ្លាំងបំផុត។ ពួកយើងតែងតែចែករំលែករឿងក្នុងចិត្តទៅ កាន់គ្នា ទៅ វិញទៅ មក»។
កញ្ញា នី មុនីនាថ បានប្រាប់អ្នកសារព័ត៌មានត្រយងទៀតថា កញ្ញាអរគុណអ្នកនាង សារ៉ាយ សក្ខណា ខ្លាំងមែនទែន បើទោះបីជាពេលវេលាដើរទៅ មុខលឿនខ្លាំង ហើយអ្នកនាង សារ៉ាយ សក្ខណា មានគ្រួសារហើយក្ដី ក៏អ្នកនាងនៅ តែបន្ដទំនាក់ទំនងល្អដូចមុន មិនដែលប្រែប្រួល ។ កញ្ញា នី មុនីនាថ ថា អ្នកនាង សារ៉ាយ សក្ខណា ជាតារាស្រីដែលរួសរាយបំផុត តាំងពីថ្ងៃស្គាល់ដំបូង រហូតមកទល់ពេលនេះគ្មានថ្ងៃបំភ្លេចបានពីទឹកចិត្តរបស់ មានគ្រួសារហើយក្ដី ៕