ព្រឹត្តិការណ៍ច្នៃម៉ូដដ៏កក្រើកប្រចាំឆ្នាំ២០២១ ដែលរៀបចំដោយក្រុម ឡាឈូក ត្រូវបានឱ្យឈ្មោះថា «យាត្រា០២» បានគៀងគរតារាល្បីៗជាច្រើនដួងរួមមាន កញ្ញា រឿន ណាត កញ្ញា សំណាង អេលីណា កញ្ញា រ៉េត សារីតា តារាចម្រៀងស្រី ឈិត កញ្ចានា ក្រុមអ្នកច្នៃម៉ូដសម្លៀកបំពាក់ និងតារាបង្ហាញម៉ូដជាច្រើននាក់ទៀត ចូលរួមបង្កបរិយាកាសឱ្យកក្រើកនិងអធឹកអធមបំផុត។
កម្មវិធី«យាត្រា០២» ជាព្រឹត្តិការបង្ហាញម៉ូដដ៏ធំមួយ ដែលបាននាំយកឈុតសម្លៀកបំពាក់កែច្នៃចេញពីប្លាស្ទិកចំនួន ៤៦ឈុត បែងចែកជា៤ក្រុមមកដើរបង្ហាញជូនសារធារណជនទស្សនា។ យ៉ាងណាមិញ លោក អ៊ិត សុវណ្ណារាជ ស្ថាបនិកក្រុមឡាឈូក ឬ La CHHOUK Recycled and Creative Fashion បានប្រាប់អ្នកសារព័ត៌មានត្រយងថា ស្នាដៃដែលមានជាសមិទ្ធផលដែលបានបង្ហាញនាពេញនេះ មិនមែនជារបស់លោកម្នាក់ឯងទេ តែជារបស់ក្រុមការងារ ឈូកឈូក ទាំងមូល ដែលសុទ្ធសឹងជាកូនខ្មែរជំនាន់ក្រោយមានវ័យក្មេងទាំងអស់ ហើយម្នាក់ៗបានខិតខំសម្រិតសម្រាំងលើធ្វើការងារនេះខ្លាំងមែនទែន។
លោកបន្ដថា លោកពិតជាអរគុណដល់ដៃគូរសហការគ្រប់ផ្នែកដែលបានជំរុញឱ្យព្រឹត្តិការណ៍បង្ហាញម៉ូដ «យាត្រា០២» ជោគជ័យមានរូបរាងតាំងពីដំបូងរហូតដល់ពេលនេះ។ ហើយក៏សូមអរគុណដល់អ្នកចូលរួមទាំងគ្នាដែលបានចូលទស្សនាការដើរម៉ូដ «យាត្រា០២» នៅយប់នេះ។ ព្រឹត្តិការណ៍នេះនឹងត្រឡប់មកជួបគ្នាវិញនៅ ឆ្នាំក្រោយ។
សូមជម្រាបថា កម្មវិធីទាំងមូលត្រូវបានចែកចេញជា៤វគ្គធំៗ រួមមាន៖
ឈុតទី១ មានឈ្មោះថា «បំពង់»។ ឈុតនេះរចនាឡើងដោយយកលំនាំតាម អាវបំពង់ ក្នុងសម័យលង្វែកដែលជាសម័យរុងរឿងបំផុតរបស់ប្រវត្តិសាស្ត្រកម្ពុជាចាប់ពីឆ្នាំ ១៥២៩ ដល់១៦២០ នៃ គ.ស។ រចនាបថសំខាន់ៗជាច្រើនទៀតពីសំលៀកបំពាក់ប្រពៃណីខ្មែរដូចជា ពុម្ពក្រឡា ក៏ត្រូវបានរួមបញ្ចូលក្នុងក្រុមសម្លៀកបំពាក់នេះដូចគ្នាដែរ។ «ឡាឈូក» បានប្រើប្រាស់ពណ៌នីអុង (Neon) ដែលបង្ហាញពីភាពក្លាហាន ស្វាហាប់ និងឆើតឆាយដើម្បីធ្វើឱ្យសម្លៀកបំពាក់មានភាពរស់រវើកខុសប្លែកពីគេ និងមិនស្ថិតនៅក្នុងទម្រង់ដើមពេក។
ឈុតទី២ មានឈ្មោះថា «ឌី សៀក»។ ឈុតនេះរចនាផ្អែកលើត្លុក ការសម្តែងសៀក និងនិន្នាការម៉ូតបរទេស Memphis Style។ ដោយចង់បង្កើតឱ្យមានការចាប់អារម្មណ៍ និងផ្តល់តម្លៃទៅលើសិល្បៈប្រភេទនេះទើបគោលគំនិតនៃការច្នៃម៉ូតត្រូវបានដកស្រង់ចេញពីការសម្តែងសៀក រួមបញ្ចូលនឹងការប្រើប្រាស់ពណ៌ឆើតឆាយដូចជា ពណ៌ក្រហម និងពណ៌លឿង។ ការប្រើប្រាស់ត្លុកក្នុងក្រុមសម្លៀកបំពាក់នេះ គឺចង់បង្ហាញពីភាពសប្បាយ កំប្លុកកំប្លែង និងាការតុបតែងខ្លួនបែបបំផ្លើសជាដើម។
ឈុតទី៣មានឈ្មោះថា «ជំនឿ និងការសម្លាប់»។ ឈុតនេះត្រូវរចនាផ្អែកលើជំនឿ និងការសម្លាប់ ដោយហេតុមើលឃើញពីភាពដ៏សម្បូរបែបនៃគំនិតនេះនៅក្នុងផ្នត់គំនិតប្រជាជនខ្មែរដែលមានអាទិមានតាមរឿងតំណាលជាច្រើនផ្សេងៗគ្នា។ សម្លៀកបំពាក់នេះត្រូវបានសម្គាល់តាមរយៈភាពមិនប្រក្រតីដូចជាទម្រង់ និងការប្រើប្រាស់ពណ៌ជាដើម។ ជាក់ស្តែង ពណ៌ក្រហម ពណ៌ខ្មៅ និងពណ៌ស ត្រូវបានប្រើប្រាស់យ៉ាងពេញលេញក្នុងការច្នៃម៉ូត។ ពណ៌ក្រហម សំដៅលើលោហិត ឈាម ពណ៌ខ្មៅ តំណាងឱ្យភាពវិលវល់ ភាពចំណាស់ និងផ្លូវងងឹត ចំណែកពណ៌ស តំណាងឱ្យការស្លាប់។
ឈុតទី៤ មានឈ្មោះថា « ฺBurslegue»។ ឈុតនេះរចនាឡើយដោយយកលំនាំពីសិល្បៈមួយប្រភេទឈ្មោះថា Burlesque ដែលមានដើមកំណើតពីប្រទេសបារាំង។ ជានិច្ចកាល ឈុតសម្លៀកបំពាក់នេះត្រូវបានយកទៅសម្តែងក្នុងការសម្តែងសៀក និងត្លុកជាដើម។ គោលគំនិតចំបងរបស់ក្រុមស្រលៀកបំពាក់នេះចង់បង្ហាងញពីភាពស៊ីវិល័យ ឡូយឆាយ ជាពិសេសសេរីភាពក្នុតការស្លៀកពាក់ ក៏ដូចជាការរស់នៅប្រចាំថ្ងៃដោយភាពក្លាហានពោរពេញដោយភាពជឿជាក់ និងភាពជាច្ចាស់ការនៃជីវិតរបស់ខ្លួនផ្ទាល់។
សូមជម្រាបថា មហាជនគ្រប់គ្នាដែលបានចូលរួមបានពោលសរសើរពីស្នាដៃកូនខ្មែរ ព្រមជាមួយស្នូរទះដៃកងរំពងបានកើតឡើងជាអន្លើតាមចង្វាក់ភ្លេង ញ៉ាំងឱ្យព្រឹត្តិការណ៍បង្ហាញម៉ូដសម្លៀកបំពាក់កែច្នៃដ៏ធំប្រចាំឆ្នាំ២០២១នេះ កាន់តែអធិកអធមខ្លាំងឡើង៕
