កម្ពុជាគឺជាទឹកដីសុវណ្ណភូមិដែលមានដើមកំណើតយូរលង់ណាស់មកហើយ ហើយទឹកដីអច្ឆរិយមួយនេះសម្បូរទៅ ដោយមរតកធម្មជាតិ និងមរតកវប្បធម៌ជាច្រើនឥតគណនាទាំងមរតកវប្បធម៌រូបី និងមរតកវប្បធម៌អរូបិយ។
កូនខ្មែរគ្រប់រូប ពិតជាមានមោទកភាពណាស់ ដែលមរតកបុព្វបុរសខ្មែរជាច្រើនបានបន្សល់ទុកមកទាំងអស់ ដែលនោះសុទ្ធតែត្រូវបានចាត់ទុកជាសម្បត្តិដ៏មានតម្លៃមហាសាលចំពោះកូនខ្មែរយើង។ ដើម្បីរួមចំណែកថែទាំកេរ្តិ៍តំណែលដូនតាទាំងអស់នេះ មានមរតកមួយចំនួនត្រូវបានរាជរដ្ឋាភិបាល និងថ្នាក់ដឹកនាំក្រសួងវប្បធម៌និងវិចិត្រសិល្បៈ យកចិត្តទុកដាក់ក្នុងការចុះបញ្ជីបេតិកភណ្ឌពិភពលោករបស់អង្គការយូណេស្កូ ដើម្បីការពារ និងអភិរក្សទុកជាសម្បត្តិដ៏មានតម្លៃពុំអាចកាត់ថ្លៃបាន ជូនដល់កូនចៅ ជំនាន់ក្រោយនៃប្រជាជាតិកម្ពុជា។
នៅ ថ្ងៃទី ១៤ ខែធ្នូ ឆ្នាំ២០២១នេះ កូនខ្មែរគ្រប់រូប ចូលរួមអបអរសាទរនៃការចុះបញ្ជីតំបន់រមណីយដ្ឋានអង្គរក្នុងបញ្ជីបេតិកភណ្ឌពិភពលោករបស់អង្គការយូណេស្កូ ខួបលើក២៩ឆ្នាំ នៅ ក្នុងកិច្ចប្រជុំគណ:កម្មការបេតិកភណ្ឌពិភពលោកលើកទី១៦ នៅ ទីក្រុងសាន់តាហ្វេ សហរដ្ឋអាមេរិក កាលពីថ្ងៃទី១៤ ខែធ្នូ ឆ្នាំ១៩៩២។ យ៉ាងណាមិញ ប្រទេសកម្ពុជាក៏បានត្រៀមចុះតំបន់ប្រាសាទ កោះកេរ ទៅ ក្នុងបញ្ជីបេតិកភណ្ឌពិភពលោកនាពេលមុខនេះផងដែរ៕