បវរកញ្ញា ងិន ម៉ារ៉ាឌី Miss Universe Cambodia 2021 បានឆក់យកបេះដូងមហាជនទូទាំងប្រទេសកម្ពុជាហើយ បើទោះបីជានៅ លើវេទិកាប្រកួត Miss Universe 2021 កើតមានការភ្លាត់ស្នៀតបន្ដិចបន្ដួចក៏ពិតមែន តែអ្នកគាំទ្របានមើលឃើញថា នេះមិនមែនជាកំហុសរបស់ ម៉ារ៉ាឌី ទេ។ ផ្ទុយទៅ វិញ អ្នកគាំទ្រនៅ តែបន្ដលើកទឹកចិត្តកញ្ញា ហើយរំភើបបំផុតនៅ ពេលដែលឃើញកញ្ញានៅ តែបន្ដជំហររឹងមាំនៅ លើវេទិកា។
ក្រោយចប់ការប្រកួតភ្លាម កញ្ញា ម៉ារ៉ាឌី បានផ្ញើសារមកសុំទោសអ្នកគ្រប់គ្រងកម្មវិធីប្រកួត Miss Universe Cambodia ដោយអះអាងថា កញ្ញាមិនអាចបន្តដំណើរចូលទៅ កាន់ Top 16 បាន ទាំងដែលប្រឹងប្រែងអស់កម្លាំងកាយចិត្តរួចហើយ។ សារនេះពិតជាធ្វើឱ្យអ្នកគាំទ្រឃើញហើយចង់ស្រក់ទឹកភ្នែក។
ភ្លាមៗនោះលោក ម៉ែន និមលរត្ន័ ជាអ្នកគ្រប់គ្រងនិងរៀបចំកម្មវិធី Miss Universe Cambodia បានលើកទឹកចិត្ត ម៉ារ៉ាឌី តាមរយៈហ្វេសបុកលោកថា «ក្មេងតូចអើយ! បងដឹងថាអូនហត់ខ្លាំងណាស់ហើយ ហើយទាំងអស់គ្នានៅ កម្ពុជានៅ តែស្រលាញ់អូនជានិច្ច ហើយការដែលព្យាយាមបំពេញតួរនាទីតំណាងប្រទេស ជាកាតព្វកិច្ចនិងសំពាធដ៏ធំធេងសំរាប់អូន រួចទៅ ហើយ We love you Marady Ngin!»។
យ៉ាងណាមិញ លោក ម៉ែន និមលរត្ន័ បានប្រាប់អ្នកសារព័ត៌មានត្រយងថា លោកពិតជាក្ដុកក្ដួលខ្លាំង នៅ ពេលដែលកំពុងអង្គុយអាន Comment របស់អ្នកគាំទ្រលើហ្វេសប៊ុក។ ដំបូងឡើយគឺលោកមានក្ដីព្រួយបារម្ភខ្លាំងមែន ខ្លាចតែរងនូវការស្ដីបន្ទោសពីមាត់មហាជនទូទាំងប្រទេស។ តែផ្ទុយទៅ វិញគឺ នៅ ក្នុងគ្រោះគឺមានលាភ លោកបែរជាអួលដើមក ហូរទឹកភ្នែកពេលឃើញ Comment អ្នកគាំទ្រខ្មែរជាច្រើនាក់ ចូលមកសរសើរលើកទឹកចិត្តដល់ ម៉ារ៉ាឌី បូករួមទាំងសកម្មភាពរបស់ក្រុមការងារនៅ ប្រទេសអ៊ីស្រាអែល។
លោកបន្ដថា ទោះមានកំហុសអចេតនាលើឆាកក៏ពិតមែន ប៉ុន្ដែអ្នកគាំទ្រមិនបានស្តីបន្ទោសក្នុងន័យជាន់ពន្លិច ពោលគឺមានតែការអាណិតចំពោះការខិតខំប្រឹងប្រែងរបស់ ម៉ារ៉ាឌី ដែលបានតស៊ូនៅ លើវេទិកាដោយមិនខ្វល់ពីភាពនឿយហត់។ លោក ម៉ែន និមលរត្ន័ និយាយថា ៖ « នៅ ថ្ងៃទី១៦ ខែធ្នូ នេះ ខ្ញុំនិងក្រុមការងារ រួមទាំងអ្នកគាំទ្រទាំងអស់ នឹងត្រៀមខ្លួនទៅ ទទួលស្វាគមន៍ដំណើរវិលត្រឡប់មកមាតុភូមិវិញរបស់ ម៉ារ៉ាឌី នៅ ព្រលានយន្ដហោះអន្ដរជាតិ-ភ្នំពេញ។ ហើយយើងមានកម្មវិធី២ គ្រោងរៀបចំជាពិសេសសម្រាប់គាត់ ទី១៖ នឹងមានកម្មវិធីជំនួបជាមួយហ្វេន និងទី២៖ នឹងមានកម្មវិធីពិសារអាហារជុំគ្នាជាមួយក្រុមបវរកញ្ញាដើម្បីលើកទឹកចិត្តដល់ ម៉ារ៉ាឌី»។
លោកបន្ដទៀតថា លោកអរគុណចំពោះទឹកចិត្តក្រុមការងារប្រទេសអ៊ីស្រាអែល ដែលបានយកចិត្តទុកដាក់ជួយជ្រោមជ្រែងចំពោះបវរកញ្ញាកម្ពុជា និងអរគុណយ៉ាងខ្លាំងចំពោះអ្នកគាំទ្រទាំងអស់ ដែលបានស្រឡាញ់ និងលើកទឹកចិត្តដល់បវរកញ្ញាកម្ពុជា ជាពិសេសចំពោះកញ្ញា ងិន ម៉ារ៉ាឌី ជា Miss Universe Cambodia 2021៕
