ខ្សែបម្រើជនជាតិជប៉ុន Soma Otani របស់ក្រុមអគ្គស្នងការដ្ឋាននគរបាលជាតិ (ប៉ូលិស) បានសម្រេចចិត្តផ្ទេរទៅកាន់លីគកំពូលប្រទេសបង់ក្លាដេសរដូវកាល២០២១-២០២២ (2021–22 Bangladesh Premier League) ដោយចូលរួមជាមួយក្រុមលេខ៣ ឆ្នាំចាស់ Muktijoddha Sangsad KC។
កីឡាកររូបនេះនឹងពាក់អាវលេខ៦ ជាមួយក្រុមថ្មី ស្របពេលរូបគេស្ថិតក្នុងបញ្ជីកីឡាករបរទេស៤ រូបដែលក្រុម Muktijoddha Sangsad KC បានចុះបញ្ជីត្រៀមប្រកួតជាមួយកីឡាករបរទេសផ្សេងទៀតដូចជាកីឡាករអេហ្ស៊ីប Ahmed Shamsaldin កីឡាករហ្គីណេ Younoussa Camaraនិងមិត្តរួមជាតិ Tetsuaki Misawa។
ក្រុម Muktijoddha Sangsad KC ធ្លាប់បង្ហាញខ្លួនក្នុងពានរង្វាន់ AFC Champion League នៅឆ្នាំ២០០០ ក្នុងវគ្គជម្រុះជុំទី១ និង២០០២ ត្រឹមវគ្គជម្រុះជុំទី២ និងពានរង្វាន់ AFC Cup នៅឆ្នាំ២០០៤ និង២០០៥ ក្នុងវគ្គចែកពូល។
ចំណែកបច្ចុប្បន្នក្រុមរបស់លីគកំពូលបង់ក្លាដេស មានកៅអីវគ្គជម្រុះពានរង្វាន់ AFC Champion League ១ក្រុមសម្រាប់ក្រុមដែលជាម្ចាស់ជើងឯក ហើយក្រុមជើងឯករងមានឈ្មោះចូលលេងពានរង្វាន់AFC Cup តំបន់អាស៊ីខាងត្បូង វគ្គចែកពូល១ក្រុម និងក្រុមឈ្នះពាន Bangladesh Federation Cup ត្រូវប្រកួតវគ្គជម្រុះ១ក្រុម។
បច្ចុប្បន្នក្រុមនេះដឹកនាំដោយលោកគ្រូបង្វឹកជនជាតិម៉ាឡេស៊ី Raja Isa ដែលមានលោក Yusuke Kato ធ្លាប់មានបទពិសោធន៍ជោគជាំក្នុងតំបន់អាស៊ាន និងទ្វីបអាស៊ី កាលនៅជាកីឡាករជាគ្រូជំនួយ និងលោក Dastagir Hossain Neera ជនជាតិបង់ក្លាដេស ជាគ្រូជំនួយដែរ។
កាលនៅជាកីឡាកររបស់ក្រុមអគ្គស្នងការដ្ឋាននគរបាលជាតិ កីឡាករ Soma Otani រកបានគ្រាប់បាល់៦ គ្រាប់ម្នាក់ឯងក្នុងលីគកំពូលកម្ពុជា ស្របពេលក្រុមមួយនេះបំប៉ោងសំណាញ់ទីគូប្រកួតសរុប១៨គ្រាប់ប្រចាំរដូវកាល និងរបូត៣២គ្រាប់វិញ៕