ថ្វីត្បិតតែវេទិកាប្រកួតប្រជែងសម្រស់ Miss Universe 2021 បានបញ្ចប់ទៅ ហើយក្ដី ប៉ុន្តែប្រធានបទមួយនេះនៅ តែក្ដៅ និងមានការជជែកវែកញែកគ្នាច្រើននៅ លើបណ្ដាញសង្គមអនឡាញនានានៅ ឡើយ ប៉ុន្តែបើសង្កេតលើបណ្ដាញសង្គម បវរកញ្ញាកម្ពុជាហាក់ទទួលបានការសរសើរលើកទឹកចិត្តនិងកម្លាំងគាំទ្រយ៉ាងលើសលប់ ខណៈដែលបវរកញ្ញាប្រទេសជិតខាងកម្ពុជាគឺបវរកញ្ញាថៃ Anchilee Scott-Kemmis កំពុងតែរងព្រនង់ពាក្យសម្ដីរិះគន់យ៉ាងចាស់ដៃពីប្រជាជនថៃ ដែលបេក្ខនារីតំណាងប្រទេសរូបនេះមិនអាចចូលទៅ ដល់វគ្គជំរុះពាក់កណ្ដាលផ្ដាច់ព្រ័ត្រឬវគ្គ Top16 នាក់បាន។
រឿងរ៉ាវដែលសារព័ត៌មានត្រយងលើកយកមកបង្ហាញនៅ ពេលនេះគឺពាក់ព័ន្ធនឹងករណីបវរកញ្ញាខ្មែរ និងបវរកញ្ញាថៃ ដែលជាបេក្ខនារីតំណាងជាតិចេញទៅ ប្រកួតតំណាងជាតិនៅ ប្រទេសអ៊ីស្រាអែល ក្នុងកម្មវិធី Miss Universe 2021 ដោយបវរកញ្ញាទាំងពីរសុទ្ធតែមិនទទួលបានជោគជ័យដូចគ្នា។ ប៉ុន្តែបើសង្កេតលើបណ្ដាញសង្គមវាសនារបស់នារីទាំងពីរនេះ ហាក់ផ្ទុយគ្នាស្រឡះព្រោះខណៈដែលបវរកញ្ញាកម្ពុជាកញ្ញា ងិន ម៉ារ៉ាឌី ថ្វីត្បិតតែភ្លាត់ស្នៀតធ្វើឱ្យរបូតក្បាំងពីក្រោយខ្នងក្នុងវគ្គបង្ហាញឈុតតំណាងជាតិលើវេទិកាប្រកួតក្ដី កញ្ញាមិនត្រូវបានអ្នកគាំទ្រ ក៏ដូចជាប្រជាជនកម្ពុជា ដាក់បន្ទុកឬស្ដីបន្ទោសចំពោះកំហុសដោយអចេតនានេះឡើយ កញ្ញាត្រូវបានប្រជាជនកម្ពុជាលើកទឹកចិត្តយ៉ាងផុសផុល ដែលបង្ហាញឱ្យឃើញថាប្រជាជនកម្ពុជាបានផ្ដល់សេចក្ដីស្រលាញ់ចំពោះបវរកញ្ញាខ្លួនយ៉ាងស្មោះអស់ពីដួងចិត្ត។
យ៉ាងណាមិញបើមើលទៅ ប្រទេសថៃឯណោះវិញ បវរកញ្ញាចក្រវាឡតំណាងប្រទេសមួយនេះកំពុងតែរងព្រនង់សម្ដីពីបណ្ដាហ្វេនៗ និងប្រជាជនថៃយ៉ាងខ្លាំង ដោយសារតែកញ្ញាមិនអាចឡើងទៅ ដល់វគ្គពាក់កណ្ដាលផ្ដាច់ព្រ័ត្រឬវគ្គ Top16 នៅ ក្នុងការប្រកួតបាន។យោងតាមការបង្ហោះនៅ លើបណ្ដាញសង្គមមានមតិមួយភាគធំ បានដាក់បន្ទុកទៅ លើកញ្ញាដោយសារតែរូបរាងធាត់ធំខុសមាត្រដ្ឋានប្រកួតបវរកញ្ញាដែលភាគច្រើនអ្នករិះគន់លើកថានេះគឺជាកត្តាដ៏ចម្បងដែលធ្វើឱ្យបវរកញ្ញាប្រទេសខ្លួនមួយនេះមិនអាចបន្តដំណើរទៅ ដណ្ដើមមកុដបាន។
យោងតាមគេហទំព័រ Pantip ដែលជាបណ្ដាញប្រមូលផ្ដុំព័ត៌មានដ៏ធំដែលបង្កើតឡើងដោយជនជាតិថៃ មានមតិរិះគន់ជាច្រើនបានលើកឡើងស្ដីបន្ទោសទៅ អ្នករៀបចំកម្មវិធី Miss Universe Thailand ដែលបានជ្រើសរើស Anchilee ឱ្យក្ដោបតំណែងតំណាងជាតិថៃចេញទៅ ប្រកួតនៅ លើឆាកអន្តរជាតិ។ មតិរិះគន់ភាគច្រើនបានឡើងយកពីចំណុចខ្វះខាតរបស់កញ្ញាដែលមើលទៅ មិនមានភាពលេចធ្លោនិងមិនមានទំនុកចិត្តខ្ពស់លើខ្លួនឯងជាដើម ខណៈអ្នកខ្លះទៀតបានស្ដីបន្ទោសចំពោះការចង់ប្រូម៉ូត Real Size Beauty ពេករហូតភ្លេចគិតថាវេទិកានេះត្រូវការនារីមានឌ ស្គម ស្រឡូន ស្អាត នៅ មិនអស់ត្រឹមប៉ុណ្ណឹងទេរឿងឈុតក៏ជាប្រធានបទក្ដៅ ដែលអ្នកគាំទ្រថៃធ្វើការរិះគន់យ៉ាងចាស់ដៃដូចគ្នាដែរ។
គួរដឹងថាបវរកញ្ញាកម្ពុជាកញ្ញា ងិន ម៉ារ៉ាឌី នឹងវិលត្រលប់មកដល់ព្រះរាជាណាចក្រកម្ពុជាជាប្រទេសកំណើតរបស់ខ្លួនវិញនៅ ថ្ងៃទី១៦ ខែធ្នូ ឆ្នាំ២០២១ ខាងមុខនេះ ដូច្នេះសម្រាប់ហ្វេនៗដែលជាអ្នកគាំទ្របវរកញ្ញារូបនេះអាចទៅ រង់ចាំទទួលដើម្បីលើកកម្លាំងចិត្ត និងទឹកចិត្តចំពោះបវរកញ្ញាកម្ពុជាយើងបាន៕
