សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានប្រកាសថា ប្រទេសមួយនេះបានរកឃើញវីរុសបំប្លែងថ្មី អូមីក្រុង ប៉ុន្ដែសម្ដេចឲ្យគ្រប់គ្នា កុំស្លន់ស្លោ ហើយវិធានការការពារត្រូវតែមាន។ សម្ដេចតេជោ ហ៊ុន សែនលើកឡើងបែបនេះ នៅអំឡុងពេលសម្ដេចអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ សណ្ឋាគារ «ហាយ៉ាត់ រីជិនស៊ី ភ្នំពេញ» នាព្រឹកថ្ងៃទី១៥ ធ្នូ។
សូមចុចអាន៖ កម្ពុជា រកឃើញអ្នកវិជ្ជមានវីរុសកូវីដ-១៩ បម្លែងថ្មី អូមីក្រុង លើស្រ្តីមានផ្ទៃពោះ
ទន្ទឹមនឹងនេះ សម្ដេចតេជោ ហ៊ុន សែន បានសម្ដែងការជឿជាក់ថា ស្រ្តីមានផ្ទៃពោះ ដែលបានឆ្លងជំងឺកូវីដ១៩នេះ នឹងជាសះស្បើយ ព្រោះរហូតមកទល់នឹងពេលនេះ នាងមិនចេញអាការៈអ្វីធ្ងន់ធ្ងរនោះទេ ហើយថែមទាំងធ្លាប់បានចាក់វ៉ាក់សាំងការពារជំងឺកូវីដ១៩ Johnson and Johnson។ «ខ្ញុំជឿជាក់ថាគាត់ជាសះស្បើយ តែយើងក៏មិនទាន់ដឹងអំពីការចម្លងជំងឺដល់កូននៅក្នុងផ្ទៃឬយ៉ាងណា?ហើយគ្រូពេទ្យត្រូវតាមដានលើបញ្ហាសុខភាពរបស់នាង»។
ការរកឃើញអ្នកឆ្លងជំងឺកូវីដ១៩បំប្លែងថ្មី អូមីក្រុង កើតមានបន្ទាប់ពីប្រទេសកម្ពុជាបើកចំហរប្រទេស ហើយទទួលយកភ្ញៀវទេសចរបរទេសវ៉ាក់សាំង។ ទន្ទឹមនឹងនេះ កម្ពុជាក៏បានចាត់ទុកឆ្នាំ២០២២ ដែលនឹងមកដល់ក្នុងពេលឆាប់ៗនេះ ជាឆ្នាំនៃការចាប់ផ្ដើមស្ដារ និងជំរុញសេដ្ឋកិច្ចឡើងវិញ ហើយឈានទៅរកភាពប្រក្រតី នៅឆ្នាំ២០២៤ ដែលកម្ពុជារក្សាកំណើនសេដ្ឋកិច្ចរង្វង់៧%។
គួរបញ្ជាក់ថា កម្ពុជាបានរកឃើញរកឃើញអ្នកឆ្លងជំងឺកូវីដ១៩បំប្លែងថ្មី អូមីក្រុង កាលពីថ្ងៃទី១៤ ខែធ្នូ។ ស្ត្រីរូបនេះ មានផ្ទៃពោះចំនួន ១៥សប្តាហ៍ រួចបានធ្វើដំណើរតាមជើងហោះហើរចេញ ពីប្រទេសហ្គាណា (អាហ្វ្រិកខាងលិច) ឆ្លងកាត់តាមឌូបៃ រួចបន្តជើងហោះហើរនៅ ព្រលានយន្តហោះទី ក្រុងបាងកកនៃប្រទេសថៃ (ដោយនៅ រងចាំជើងហោះហើរចំនួន ១៤ម៉ោង) ទើបបន្តដំណើរមកដល់ ប្រទេសកម្ពុជានៅ ថ្ងៃទី១២ ខែធ្នូ ឆ្នាំ២០២១។ នៅ ពេលមកដល់អាកាសយានដ្ឋានអន្តរជាតិភ្នំពេញ ក្រុម ការងារក្រសួងសុខាភិបាល បានធ្វើតេស្តរហ័សលើវត្ថុសំណាករបស់គាត់ ឃើញមានវិជ្ជមានវីរុសកូវីដ-១៩ ហើយក៏បានបញ្ជូនវត្ថុសំណាក ទៅកាន់វិទ្យាស្ថានប៉ាស្ទ័រកម្ពុជា ដើម្បីវិភាគបញ្ជាក់រកវីរុសកូវីដ-១៩ បម្លែងថ្មីអូមីក្រុងនេះ៕