កីឡាករប្រេស៊ីល Eliel Da Cruz ដែលក្នុងរដូវកាលឆ្នាំ២០២១ កន្លងទៅរកគ្រាប់បាល់ឱ្យអង្គរថាយហ្គឺរ បានរហូតដល់១០គ្រាប់ម្នាក់ឯង ពេលនេះត្រូវក្លិបមានមូលដ្ឋាននៅខេត្តសៀមរាប ប្រកាសចែកផ្លូវគ្នាហើយ។
បើតាមការបញ្ជាក់របស់ក្លិបបាល់ទាត់អង្គរថាយហ្គឺរ នៅល្ងាចថ្ងៃអង្គារ សប្ដាហ៍នេះថា៖«ក្លិប សូមជម្រាបដំណឹងជូនដល់អ្នកគាំទ្រទាំងអស់ថា ក្លិបបានសម្រេចចែកផ្លូវគ្នាជាមួយកីឡាករ Eliel Da Cruz ក្រោយពីចូលរួមជាមួយក្លិបក្នុងពេញមួយរដូវកាល ២០២១។ ពួកយើងរាល់គ្នានៅក្នុងក្លិប សូមថ្លែងអំណរគុណយ៉ាងក្រៃលែង សម្រាប់ការរួមចំណែកជួយក្លិប។ សូមជូនពរ Da Cruz ឲ្យជួបប្រទះតែសំណាងល្អ នឹងបន្តជោគជ័យក្នុងអាជីព»។
អត្ថបទពាក់ព័ន្ធ៖ល្បីថាគ្រូថ្មីរបស់ក្រុមអង្គរថាយហ្គឺរ ប្រាក់ខែជិត៤ម៉ឺនដុល្លារ?
ក្រុមអង្គរថាយហ្គឺរ ទើបតែតែងតាំងលោក Alistair Heath ជនជាតិអង់គ្លេស ជាគ្រូបង្វឹក បន្ទាប់ពីគ្រូបង្វឹកចាស់ជនជាតិអេស្ប៉ាញ Oriol Mohedano បានចាកចេញ។ ក្រៅពីនោះក្លិបបានប្រកាសពីការចាកចេញរបស់កីឡាករមួយចំនួនដែរដូចជា ឈង់ ប៊ុនណាត ទៅវិសាខា, កីឡាករបេឡារូស Maksim Taleyko, កីឡាករ ឡុង ម៉េងហាវ, កីឡាករ ឡុង ភារ៉ាត់, កីឡាករជប៉ុន Kosuke Uchida និង កីឡាករជនជាតិតុងហ្គា Ata Inia ជាដើម។
បើនិយាយពីលទ្ធផលឆ្នាំ២០២១ កន្លងទៅនេះក្រុមអង្គរថាយហ្គឺរ បានឈរចំណាត់ថ្នាក់លេខ៦ ក្នុងចំណោមក្រុមជាសមាជិកទាំង១៣ ក្រោយប្រកួតបាន១៩លើក ឈ្នះ៨លើក ស្មើ៤លើកនិងចាញ់៧លើក។ ចំណែកក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន វិញក្រុមដែលមានថៅកែជាជនជាតិជប៉ុន មួយនេះបានធ្លាក់ត្រឹមវគ្គ៨ក្រុមចុងក្រោយ បន្ទាប់ពីចាញ់ព្រះខ័នរាជស្វាយរៀង ៣-០ នៅខេត្តស្វាយរៀង៕
