យោងតាមការប្រកាសជាផ្លូវការពីផេក Miss World បានចេញសេចក្ដីប្រកាសសារព័ត៌មានស្ដីពីការផ្អាកជាបណ្ដោះអាសន្នការប្រកួតផ្ដាច់ព្រ័ត្រកម្មវិធី Miss World អន្តរជាតិដោយសារតែផ្ទុះចេញជំងឺកូវីដ-១៩ កាលពីយប់ថ្ងៃទី១៦ ខែធ្នូ ឆ្នាំ២០២១ ម្សិលមិញនេះ។ ដំណឹងបន្ទាន់នេះបានធ្វើឱ្យមហាជនកម្ពុជាមានក្ដីព្រួយបារម្ភពីសុខសុវត្ថិភាពរបស់បវរកញ្ញាកម្ពុជា កញ្ញា ភុំ សោភ័ណ្ឌ ដែលជាបេក្ខនារីតំណាងជាតិកំពុងតែស្នាក់នៅ ព័រតូរីកូ ដើម្បីរង់ចាំការប្រកួត។
បើតាមការឱ្យដឹងពីបវរកញ្ញាកម្ពុជា ភុំ សោភ័ណ្ឌ បាននិយាយឱ្យដឹងនៅ ក្នុង Live ថាការដែលកម្មវិធីសម្រេចចិត្តផ្អាកការប្រកួតជាបណ្ដោះអាសន្ននោះក៏ដោយសារតែ មានបវរកញ្ញាមួយរូប និងអ្នករៀបចំបានរកឃើញមានវិជ្ជមានកូវីដ-១៩ ដូច្នេះទើបកម្មវិធីត្រូវពន្យារពេលនៃការប្រកួត។
កម្មវិធីប្រកួតនឹងត្រូវពន្យាពេលប្រកួតដោយរង់ចាំរយៈពេល៩០ថ្ងៃក្រោយទើបការប្រកួតចាប់ផ្ដើមសារជាថ្មី ព្រោះរកឃើញថាមានការឆ្លងជំងឺមួយនេះនៅក្នុងក្រុមការងារនិងបេក្ខនារីប្រកួត។ បន្ទាប់ពីផ្ទុះករណីកើតជំងឺកូវីដនៅក្នុងក្រុមប្រកួតបវរកញ្ញាពិភពលោក អ្នកគាំទ្រមានការព្រួយបារម្ភពីសុខសុវត្ថិភាពរបស់បវរកញ្ញាកម្ពុជាយើងគ្រប់ៗគ្នា។ យ៉ាងណាមិញសាមីខ្លួនបានចេញមក Live ចែករំលែកពីសុខទុក្ខរបស់ខ្លួនឱ្យអ្នកគាំទ្របានដឹងថា ខណៈនេះកញ្ញាមានសុខភាពល្អ និងមិនមានការព្រួយបារម្ភអ្វីឡើយដោយសារតែកញ្ញាបានជួបប្រាស្រ័យឬប៉ះពាល់ជាមួយនឹងអ្នកកើតជំងឺកូវីដនោះទេ។
តាមរយៈការ Live នោះក៏កញ្ញា ភុំ សោភ័ណ្ឌបានប្រាប់ឱ្យដឹងដែរថានៅថ្ងៃទី១៨នេះ កញ្ញានឹងត្រូវធ្វើដំណើរទៅកាន់ព្រលានយន្តហោះ ដើម្បីរង់ចាំតេស្តលទ្ធផលជំងឺកូវីដ-១៩ ប្រសិនបើមិនមានបញ្ហាអ្វីនោះទេ កញ្ញានឹងធ្វើដំណើរចាកចេញពីប្រទេសព័រតូរីកូត្រលប់មកកាន់ទឹកដីនៃព្រះរាជាណាចក្រកម្ពុជាវិញ៕
