បន្ទាប់ពីធ្លាយដំណឹងជាហូរហែអំពីករណីក្រុមគំរាមយកប្រាក់ពីជំទាវឧកញ៉ាល្បីឈ្មោះមួយរូបថា បានបាត់បង់ទ្រព្យសម្បត្តិរហូតដល់ខ្ទង់លានដុល្លារនោះ អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានចេញមកបញ្ជាក់ថា លោកស្រី អ៊ាន សៀវម៉ី មិនមានការ បាត់បង់លុយរហូតដល់ ៩ ឬ១០លានដុល្លារ ដូចផ្សាយនៅលើបណ្ដាញសង្គមនោះទេ ។
នៅមុនពេលភ្ជង់គំរាមឧកញ៉ា អ៊ាន សៀវម៉ី ក្រុមចោរប្រដាប់អាវុធ៤នាក់ បានបន្លំខ្លួនជាសមត្ថកិច្ច ហើយភូតកុហកថា ជាការចុះអនុវត្តសាលដីការក្លែងក្លាយ ដើម្បីបានចូលក្នុងផ្ទះជនរងគ្រោះ។ករណីភ្ជង់គំរាមនេះបានកើតឡើងនៅវេលាម៉ោង១០៖៤០នាទី ព្រឹកថ្ងៃទី១៩ ខែធ្នូឆ្មាំ២០២១ នៅចំណុចផ្ទះវីឡាលេខV01 ស្ថិតក្នុងភូមិគោគចំបក់ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ដោយយកគ្រឿងអលង្កាពេជ្រមានតម្លៃខ្ទង់លានដុល្លារ។
បើតាមការរៀបរាប់របស់សមត្ថកិច្ចបានឱ្យដឹងថា នៅមុនពេលកើតហេតុជនរងគ្រោះ និងក្រុមគ្រួសារមានមនុស្ស១០នាក់ ក្នុងនោះមាន ប្រុស៤ ស្រី៣ និងក្មេង៣នាក់ (ប្រុស១ស្រី២) កំពុងរៀបចំចេញដំណើរទៅផ្ទះរបស់ខ្លួនទៅខេត្តកំពង់ស្ពឺ ហើយពេលកំពុងរៀបចេញពីផ្ទះ ក៏ស្រាប់តែមានជនសង្ស័យមួយក្រុមមានគ្នា៤នាក់ អង្គុយក្នុងឡាន១នាក់ (ឡានម៉ាក GS អត់ស្លាកលេខពណ៌ស) (ក្នុងចំណោម៤នាក់មានម្នាក់ពាក់សក្តិ៤) ចុះមកឃាត់ជនរងគ្រោះមិនឱ្យចេញដំណើរ ហើយប្រាប់ជនរងគ្រោះថា ពួកគេមកពីក្រសួងចុះអនុវត្តដីការ។
សមត្ថកិច្ចបានរៀបរាប់ទៀតថា ជនសង្ស័យប្រដាប់ដោយអាវុធវែងមួយដើម (អ៊ឹមសី) និងខ្លី៣ដើម បានបញ្ចូលគ្រាប់ភ្ជង់ជនរងគ្រោះដាក់ខ្នោះដៃ និងឆក់ជនរងគ្រោះ ហើយឱ្យជនរងគ្រោះឈ្មោះ អ៊ាន សៀវម៉ី នាំឡើងទៅជាន់ទី១ បន្ទប់ដាក់គ្រឿងអលង្ការ ហើយឱ្យបើកទូដែកយកគ្រឿងអលង្ការទាំងអស់ដាក់ចូលសាក់កាដូពណ៌ខ្មៅ ដែលជនសង្ស័យយកមកជាមួយ។ ក្រោយពេលធ្វើសកម្មភាពរួចជនសង្ស័យទាំងអស់ បានស្រែកហៅនាមសម្ងាត់របស់បក្សពួកខ្លួន ថា A1 A2 ម៉ូ ម៉ូ និងបានយកក្បាលកាមេរ៉ា នាំគ្នាឡើងលើរថយន្តដែលមានបក្សក្ខពួករង់ចាំខាងក្នុង ហើយបើកគេចខ្លួនបាត់តែម្តង ដោយបន្សល់ទុកនូវ វត្ថុតាងរួមមាន៖ ខ្នោះដៃចំនួន៤ និងដីកាចំនួន១សន្លឹកប៉ុណ្ណោះ។
យ៉ាងណាមិញករណីខាងលើបានផ្សព្វផ្សាយពេញបណ្ដាញសង្គម ថាទឹកប្រាក់និងគ្រឿងអលង្ការ ដែលឧកញ្ញ៉ា អ៊ាន សៀវម៉ី បានបាត់បង់គឺមានចំនួន១០លានដុល្លារ ប៉ុន្តែករណីខាងលើនេះត្រូវបានស្នងការនគរបាលរាជធានីភ្នំពេញចេញសេចក្ដីប្រកាសបំភ្លឺព័ត៌មានថា ជាក់ស្ដែងតាមចម្លើយជនរងគ្រោះបានបញ្ជាក់យ៉ាងច្បាស់ថា មិនមានការបាត់បង់លុយឡើយគឺបាត់បង់តែខ្សែកចំនួន ៣ខ្សែប៉ុណ្ណោះ។
ស្នងការដ្ឋាននគរបាលរាជធានីភ្នំពេញ បានបញ្ជាក់ថា នៅពេលដែលសមត្ថកិច្ចចម្រុះ កំពុងតែធ្វើការសាកសួរ និងស្រាវជ្រាវឱ្យបានច្បាសលាស់លើករណីនេះ ជាក់ស្តែង តាមចម្លើយជនរងគ្រោះបានបញ្ជាក់យ៉ាងច្បាស់ថា មិនមានការបាត់បង់លុយឡើយ គឺបាត់តែខ្សែក ៣ខ្សែតែប៉ុណ្ណោះ ៕
ទស្សនាវីដេអូ Big News៖