លោក Thongchai Rungreangles គ្រូបង្វឹកសញ្ជាតិថៃ កាន់សញ្ញាប័ត្រគ្រូបង្វឹកបាល់ទាត់ UEFA Pro Licence ដែលជាកម្រិតសិក្សាខ្ពស់ជាងគេក្នុងពិភពបាល់ទាត់ បានបង្ហោះពាក្យលា ដល់កីឡាករក្នុងក្រុមបាល់ទាត់ខេត្តព្រៃវែង នៅថ្ងៃទី២០ ខែធ្នូ ឆ្នាំ២០២១ ក្រោយចប់រដូវកាល២០២១។
ខណ:មុននេះបន្តិចក្លិបបាល់ទាត់ខេត្តព្រៃវែង ក៏បានចេញមកបញ្ជាក់អំពីការចែកផ្លូវគ្នាជាមួយលោកគ្រូបង្គោល Thongchai Rungreangleas បន្ទាប់ពីដឹកនាំក្រុមទទួលបានលទ្ធផលមិនសូវបានល្អ។
លោក Thongchai Rungreangles គឺជាគ្រូបង្វឹកវ័យក្មេង ដែលមានបទពិសោធជោគជាំ ដោយលោកធ្លាប់ដឹកនាំក្រុមជម្រើសជាតិយុវជនថៃ U16 និង U19 រួមទាំងក្រុមយុវជនតាមក្លិបមួយចំនួន ដូចជាក្លិប Thailand Bangkok Glass នៅឆ្នាំ២០១៥-២០១៨ ជាដើម មុននឹងបុរសវ័យ ៣៥ឆ្នាំរូបនេះចាកចេញពីទឹកដីកំណើត មកដឹកនាំខេត្តព្រៃវែងដែលសម្បូរដោយធនធានកីឡាករយុវជន។
រដូវកាល២០២១ ក្លិបព្រៃវែង ក្រោមការដឹកនាំរបស់លោក Thongchai ធ្វើមិនសូវបានល្អឡើយ បន្ទាប់ពីបញ្ចប់ចំណាត់ថ្នាក់ទី១២ ក្នុងចំណោមក្លិបទាំង១៣ នៅក្នុងលីគកំពូលកម្ពុជា ខណ:ពានសម្តេចតេជោ ធ្លាក់ត្រឹមវគ្គ១៦ក្រុមចុងក្រោយ ក្រោមថ្វៃជើងរបស់អង្គរថាយហ្គឺរ ក្នុងលទ្ធផល ២-០ នៅកីឡដ្ឋាន SRU នាទឹកដីសៀមរាប៕
