យោងតាមការបញ្ជាក់របស់ស្នងការដ្ឋាននគរបាលរាជធានីភ្នំពេញបានឱ្យដឹងថា ទាក់ទងទៅនឹងការបិទបញ្ចប់ការសាកសួរជនរងគ្រោះ អំពីការបាត់បង់ទ្រព្យសម្បត្តិជាក់ស្តែង លើករណីជនសង្ស័យមួយក្រុមដែលបានចូលភ្ជង់គំរាមដល់ក្នុងផ្ទះជនរងគ្រោះ នៅបុរីម៊ូន ថោន ( Moon Town ) កាលពីវេលាម៉ោង ១០:៣០នាទីព្រឹកថ្ងៃទី១៩ ខែធ្នូ ឆ្នាំ២០២១ នេះ ភ្លាមៗបន្ទាប់ពីកើតហេតុ កម្លាំងចម្រុះនៃការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ កម្លាំងនៃអធិការដ្ឋាននគបាលខណ្ឌពោធិ៍សែនជ័យ បានសហការជាមួយកម្លាំងចម្រុះនាយកដ្ឋានព្រហ្មទណ្ឌក្រសួងមហាផ្ទៃ បានចុះដល់កន្លែងកើតហេតុដើម្បីធ្វើកំណត់ហេតុស្រាវជ្រាវចំពោះករណីប្លន់នេះ ។
ដំបូងឡើយសមត្ថកិច្ចជំនាញបានធ្វើការសាកសួរជនរងគ្រោះលើករណីនេះ ជាពិសេសចំពោះទ្រព្យសម្បត្តិដែលបានបាត់បង់ ដោយបន្ទាប់ពីកើតតហេតុភ្លាមៗ ជនរងគ្រោះនៅមានអារម្មណ៍តក់ស្លុត ភ័យខ្លាច និងមិនទាន់បានពិនិត្យឱ្យបានច្បាស់លាស់អំពីការបាត់បង់ទាំងនេះ ទើបរហូតមកដល់ថ្ងៃទី២០ ខែធ្នូ ឆ្នាំ២០២១ សមត្ថកិច្ចចម្រុះបានធ្វើការសាកសួរបញ្ចប់ជាមួយជនរងគ្រោះលើការបាត់បង់សរុបនេះ ។
បន្ទាប់ពីជនរងគ្រោះសម្រួលអារម្មណ៍ បាត់ភ័យខ្លាច និងបានត្រួតពិនិត្យច្បាស់លាស់អំពីទ្រព្យសម្បត្តិដែលបានបាត់បង់ ដោយបានបញ្ជាក់តម្លៃជាមួយហាងលក់ពេជ្រដែលគាត់តែងតែទិញយកមកប្រើប្រាស់ តាមចម្លើយរបស់ជនរងគ្រោះសម្ភារៈដែលបានបាត់បង់រួមមានខ្សែកពេជ្រធំ ចំនួន៣ខ្សែ និងគ្រឿង អល័ង្កា (ពេជ្រ) មួយចំនួនទៀត យោងទៅលើវិក័យបត្រ ទិញ-លក់ គិតជាទឹកប្រាក់សរុបប្រហែលជា ១.៦ ទៅ ១.៩ លានដុល្លាអាមេរិច និងទូរស័ព្ទដៃម៉ាក I phone ចំនួន ២គ្រឿងផងដែរ ។ ពេលនេះសមត្ថកិច្ចចម្រុះកំពុងតែធ្វើការស្រាវជ្រាវយ៉ាងយកចិត្តទុកដាក់លើករណីនេះ ។
រហូតមកដល់យប់ថ្ងៃទី២០ខែធ្នូនេះ សំណុំរឿងចូលភ្ជង់គំរាមយកទ្រព្យពីផ្ទះឧកញ៉ា ឈ្មោះអ៊ាន សៀវម៉ី នោះ សមត្ថកិច្ចអាវុធហត្ថក៏បានបំបែកហើយ។ កម្លាំងអាវុធហត្ថរាជធានីភ្នំពេញ ដឹកនាំ ដោយឧត្តមសេនីយ៍ឯក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ តាមចាប់ ក្រុមចោរចូលផ្ទះឧកញ៉ា អ៊ាន សៀវម៉ី បានហើយ ដោយប្រមូល បានគ្រឿងពេជ្រត្រឡប់មកវិញ។ ក្នុងនោះមានជនសង្ស័យចំនួន២នាក់ ក្រោយចាប់ឃាត់ខ្លួនបាន កាលពីវេលាម៉ោង ១០យប់ ថ្ងៃទី២០ ខែធ្នូ ឆ្នាំ២០២១ នៅចំណុចភូមិវាលថ្លាន់ សង្កាត់កងណយ ខណ្ឌដង្កោ រួមជាមួយ ដកហូតបានរថយន្តឡិចស៊ីGS300 ពណ៌ស គ្មានស្លាកលេខមួយគ្រឿង រួចមកត្រូវបាន នាំទៅកាន់ផ្នែកជំនាញអធិការដ្ឋានខណ្ឌពោធិសែនជ័យ ហើយនៅព្រឹកថ្ងៃទី២១ ខែធ្នូនេះ។ ពេលនេះ ជំនាញព្រហ្មទណ្ឌស្នងការក្រុង ភ្នំពេញ លោក មន វុធី អធិការដ្ឋាន ខណ្ឌពោធិ៍សែនជ័យ និងកម្លាំងជំនាញ កំពុងសាកសួរ ជនសង្ស័យ ។
ជនសង្ស័យទាំង២នាក់ ឃាត់នៅខណ្ឌពោធិសែនជ័យ ទី១ ឈ្មោះ កេត ម៉ាច ភេទប្រុស អាយុ២៦ឆ្នាំ ជាសមាជិកគណបក្សខ្មែរក្រោក រស់នៅភូមិប្រមូលផ្តុំ ឃុំត្រាច ស្រុកជ័យសែន ខេត្តព្រះវិហារ ។ ទី២ ឈ្មោះ ថុន វឌ្ឍនៈបូរ៉ាម៉ី ភេទស្រី អាយុ២៧ឆ្នាំ មុខរបរ ទិញលក់រថយន្ត មានទីលំនៅ ភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ៕
ទស្សនាវីដេអូ Big News ៖