នៅពេលថ្មីៗនេះ គេបានឃើញបវរកញ្ញា ប៊ី សុធារី បើកទំព័រអាជីពសម្ដែងជាលើកដំបូងរបស់ខ្លួន ថតរឿងភាគថ្មីឱ្យស្ថានីយទូរទស្សន៍ហង្សមាស ដែលមានចំណងជើងថា«ឫស្យា»។ បើទោះបីជាមិនទាន់មានបទពិសោធន៍ច្រើនក្នុងការសម្ដែងភាពយន្ដក៏ដោយ តែកញ្ញា ប៊ី សុធារី នៅតែអាចធ្វើបានល្អ ដូចជាមានទេពកោស្យពីកំណើតអីចឹង។ រឿងដំបូងនេះ ប៊ី សុធារី បានចូលរួមសម្ដែងជាមួយតារាល្បីៗជាច្រើនដួងមែនទែន ដូចជា អ្នកនាង សឿ សុធារ៉ា លោក ញ៉ែម សុគន្ធ កញ្ញា អាង សុជាតា លោក ដួង វិរៈសិទ្ធ លោក សំ សុវណ្ណារ៉ាក់ និងតារាកិត្តិយសជាច្រើនដួងទៀត។
ដោយឡែកនៅថ្ងៃទី ២៣ ខែធ្នូ ឆ្នាំ២០២១នេះ គេទើបបានឃើញស្ថានីយទូរទស្សន៍ហង្សមាសបញ្ចេញវីដេអូ Trailer រឿង «ឫស្យា» ដែលឈុតឆាកពីមួយប្លង់ៗទៅមួយប្លង់ ទាក់ចិត្តខ្លាំងមែនទែន តួសម្ដែងនិមួយៗចូលតួខ្លាំង តួគគ្រឺតធ្មេញដាក់គ្នាយ៉ាងសាហាវ។ ជាពិសេសគេកាន់តែចាប់អារម្មណ៍ត្រង់ឈុតមួយគឺ អ្នកនាង សឿ សុធារ៉ា បានលាដៃទះកំផ្លៀងកញ្ញា ប៊ី សុធារី មួយទំហឹងលឺសូរថាផ្លាប់ ក៏ប៉ុន្តែកញ្ញា ប៊ី សុធារី វិញក៏មិនណយដែរ មិនទុកមុខឱ្យអ្នកនាង សឿ សុធារ៉ា ទះទៅវិញមួយកំផ្លៀង ហើយថែមទាំងសម្លក់បើកភ្នែកធំៗ និយាយថា «ត្រឹមតែជាសាច់ថ្លៃដូចតែគ្នាទេ នាងឯងគ្មានសិទ្ធលើយើងនោះឡើយ ពួកនាងឯងចាំតែមើលចុះ! »។ មួយឈុតនេះ គឺពិតជាធ្វើឱ្យហ្វេនអ្នកគាំទ្រមិនខកចិត្តក្នុងការសម្ដែងរបស់កញ្ញា ប៊ី សុធារី ឡើយ។
បើទោះបីជារឿង «ឫស្យា» ជាដំបូងរបស់កញ្ញា ប៊ី សុធារី តែមើលទៅកញ្ញាពិតជាចូលតួបានយ៉ាងស័ក្ដសមក្នុងការសម្ដែងតួមានចរឹត កាចឆ្នាស់ ពិសពុល ឫស្យា សងសឹកយ៉ាងសាហាវ។ គួរឱ្យដឹងបន្ថែមថា រឿងភាគទូរទស្សន៍មួយនេះ មានបញ្ចាំងរាល់ថ្ងៃ ច័ន្ទ អង្គារ ពុធ នៅលើកញ្ចក់ទូរទស្សន៍ហង្សមាស វេលាម៉ោង ៨ យប់។ ទស្សនាវីដេអូ Trailer ខាងក្រោមនេះ៖