ឈុតប៊ីគិនីអង្កាំ ដែលអ្នកនាងគង់ ចាន់ស្រីមុំ និងស្វាមីបានស្លៀកនិងតុបតែងហើយបង្ហោះនៅលើផេករបស់ខ្លួន កំពុងក្លាយជាប្រធានបទក្ដៅ និងរងនូវការរិះគន់ខ្លាំងពីសាធារណជន ប៉ុន្តែសម្រាប់ហ្វេនអ្នកនាងវិញ ក៏បានសម្ដែងចំណាប់អារម្មណ៍និងមតិពេញចិត្តចំពោះការច្នៃប្រឌិតប្លែកថ្មីនេះខ្លាំងដូចគ្នា។ ដើម្បីឆ្លើយតបចំពោះការគាំទ្រពីហ្វេនរបស់ខ្លួន អ្នកនាង គង់ ចាន់ស្រីមុំ សន្យាថានឹងមានអ្វីដែលពិសេសៗ ប្លែកៗ សម្រាប់បងប្អូនជាអ្នកគាំទ្រអ្នកនាងជានិច្ច។
ទោះបីជាមានមតិរិះគន់ច្រើនចំពោះឈុតប៊ីគីនីចំនួន៣សន្លឹកដែលអ្នកនាង គង់ ចាន់ស្រីមុំបានបង្ហោះនៅលើផេករបស់ខ្លួន ប៉ុន្តែពិធីការិនី 3Fun មិនបានបង្ហាញក្ដីកង្វល់អ្វីនោះឡើយ ព្រោះអ្នកនាងបានបន្តបង្ហោះរូបភាពបែប Fashion របស់ខ្លួនជាបន្តទៀតនៅលើផេករបស់អ្នកនាង ដោយរូបភាពទាំងនោះគឺជារូបភាពស្លៀកប៊ីគីនីក្នុងកាយវិការផ្សេងៗគ្នា។
រូបភាពចំនួន៤សន្លឹកបន្ថែមនេះ ក្រៅពីមានហ្វេនៗដែលជាអ្នកស្រលាញ់ចូលចិត្តអ្នកនាង និងក្រុមគ្រួសារ MoMo Family ហើយនោះ ក៏នៅមានអ្នកមិនពេញចិត្តចូលមករិះគន់ និងថាឱ្យអ្នកនាងយ៉ាងច្រើនផងដែរ ដោយភាគច្រើនអ្នកដែលរិះគន់អ្នកនាងបានលើកហេតុដូចៗគ្នាថា អ្នកនាងគឺជាតារាជាបុគ្គលសាធារណៈ ហេតុនេះមុននឹងធ្វើអ្វីអ្នកនាងគួរតែត្រិះនិងពិចារណាព្រោះទង្វើរបស់អ្នកនាងជះឥទ្ធិពលដល់សង្គម។
យ៉ាងណាមិញភាគីអ្នកនាង គង់ ចាន់ស្រីមុំមិនបានចេញមកតបតចំពោះអ្នករិះគន់ខ្លួននោះឡើយ ភាគីច្រើន Admin ផេករបស់អ្នកនាងឆ្លើយតបនិងអរគុណចំពោះអ្នកដែលស្រលាញ់ចូលចិត្តការតុបតែងខ្លួនបែបប្លែកៗរបស់អ្នកនាងប៉ុណ្ណោះ។
លើសពីនេះទៀត Admin ផេករបស់អ្នកនាង បានបញ្ជាក់ច្បាស់ៗទៀតថា អ្នកនាង គង់ ចាន់ស្រីមុំ សន្យានឹងបន្តខិតខំរិះរកនូវគំនិតថ្មីៗ ប្លែកៗដើម្បីបម្រើជាចំណីចក្ខុជូនដល់អ្នកគាំទ្រអ្នកនាងជាបន្តទៀត។ «ខ្ញុំបាទជា admin សូមអរគុណដល់បងប្អូនដែលតែងតែស្រលាញ់ ចូលចិត្ត គាំទ្រចំពោះ Family MoMo ពួកគាត់នឹងសន្យាថានឹងមានអ្វីដែលពិសេសៗ ប្លែកៗ សម្រាប់បងប្អូនជានិច្ច»៕
