បើទោះជាមិនទាន់មានការប្រកាសផ្លូវការណាមួយពីក្រុមហ៊ុនលីគបាល់ទាត់កម្ពុជា ក៏ពិតមែន ប៉ុន្ដែដំណឹងក្រៅផ្លូវការថាមានក្រុមមួយចំនួន ត្រូវកាត់ចេញពីពានរង្វាន់លីគកំពូលកម្ពុជា ទៅកាន់លីគកម្រិតទី២ សម្រាប់រដូវកាលឆ្នាំ២០២២ ខាងមុខ រហូតដល់គ្រូបង្វឹកចំនួន២បានចេញមុខប្រតិកម្មជុំវិញបញ្ហានេះ។
តាមផែនការសេចក្ដីប្រកាសព័ត៌មានពិស្ដារជុំវិញការប្រកួតលីគកម្ពុជារដូវកាលឆ្នាំ២០២២ គ្រោងធ្វើឡើងនៅថ្ងៃទី៣០ ខែធ្នូ ឆ្នាំ២០២១ ថ្មីៗ ប៉ុន្តែត្រូវបានលើកពេលវិញ ដោយមិនទាន់កំណត់កាលបរិច្ឆេទច្បាស់នៅឡើយ។
ទោះជាមិនមានដំណឹងក្រៅផ្លូវការបែបណាក៏ដោយ តែបែរមានការប្រតិកម្មពីសំណាក់គ្រូបង្វឹក២រូប ដោយក្នុងនោះមានលោក ហុក សុជីវ័ន្ត គ្រូបង្វឹករបស់ក្រុមខេត្តកោះកុង សមាជិកលីគទី២ និងលោក សុក វាសនា គ្រូបង្វឹករបស់ក្រុមអាស៊ីអឺរ៉ុបយូណាយធីត។
លោក ហុក សុជីវ័ន្ត បានលើកឡើងនៅលើបណ្ដាញសង្គមហ្វេសប៊ុករបស់លោកថា៖«ជាការពិត ហើយវាពិតជាពិបាកបំផុតក្នុងការសម្រេចចិត្តក្នុងការកាត់ក្រុមដែលលេងក្នុងលីគកំពូលឣោយមកលេងក្នុងលីគ២ គួរទុកពេលអោយក្រុមរៀបចំខ្លួនអោយបានតាមស្តង់ដារទៅតាមពេលកំណត់ណាមួយជាក់លាក់»។
ងាកទៅលោក សុក វាសនា វិញបានបញ្ជាក់វិញថា៖«ខ្ញុំបាទលើកយកលីគកំពូល ២ក្នុងតំបន់ Asians មកពិចារណាគឺ៖
1) លីគកំពូលថៃ ក្រុមចូលរួម១៦ ក្លិប មាន Licensed ១១ ក្លិប
2) លីគកំពូលVN (វៀតណាម) ក្រុមចូលរួម១៤ ក្លិប មាន Licensed ១១ ក្លិប
3) លីគខ្មែរមាន12ក្រុម ក្លិបមានLicensed 8 ត្រៀមកាត់៤ ក្រុមទៅលីគ២ ដោយគ្មានការប្រជុំប្រាប់នៅរដូវកាលចាស់2021។ លីគគេអាចធ្វើបានហេតុអ្វីកម្ពុជា ខាងសហព័ន្ធនិងក្រុមហ៊ុនមិនគិតពិចារណាថានិងប៉ះពាល់អ្វីខ្លះដែលក្លិបនិមួយៗប្រឹងទាំងត្រដាបត្រដួសបរិបទកូវីត-១៩ នេះដោយមិនលើកលែងនោះ»។
អ្វីៗសុទ្ធតែរង់ចាំសេចក្ដីប្រកាសព័ត៌មានផ្លូវការពីក្រុមហ៊ុនលីគកម្ពុជាថ្មី ឬ សហព័ន្ធកីឡាបាល់ទាត់កម្ពុជា ក្នុងពេលខាងមុខ ខណៈភាគីពាក់ព័ន្ធសុទ្ធតែត្រូវការចម្លើយដើម្បីត្រៀមខ្លួនជាពិសេស កូតាកីឡាករបរទេស កាលបរិច្ឆេទប្រកួត ចំនួនក្រុមដែលត្រូវចូលប្រកួត ការផ្សាយផ្ទាល់ ប្ដូរឈ្មោះថ្មី ឬ រក្សាឈ្មោះចាស់ដដែល? ជាដើម៕