ក្រោយព្រឹត្តិការណ៍ពានរង្វាន់បាល់ទាត់ប្រចាំតំបន់អាស៊ីភាគអាគ្នេយ៍ AFF Suzuki Cup 2020 បានបញ្ចប់នៅថ្ងៃទី១ ខែមករា ឆ្នាំ២០២២ នេះ សហព័ន្ធកីឡាបាល់ទាត់អាស៊ីភាគអាគេ្នយ៍ (AFF) នឹងបន្តរៀបចំការប្រកួតពានរង្វាន់ AFF Suzuki Cup 2022 ក្នុងអំឡុងខែធ្នូ ខាងមុខ។
បើតាមឯកឧត្តម ខៀវ សាម៉េត ប្រធានសហព័ន្ធកីឡាបាល់ទាត់អាស៊ីភាគអាគ្នេយ៍ និងជាអនុប្រធានសហព័ន្ធកីឡាបាល់ទាត់កម្ពុជា បានប្រាប់មកក្រុមការងារសារព័ត៌មានត្រយង ថា៖«ពានរង្វាន់ AFF Suzuki Cup 2022 នឹងរៀបចំនៅអំឡុងខែធ្នូ ដោយរៀបចំការប្រកួតបែបក្នុងដី និងក្រៅដី (Home/Away) ដូចការប្រកួតក្នុងឆ្នាំ២០១៨ កន្លងទៅផងដែរ»។
ចំណែកការប្រកួតបែងចែកជា២ ដោយវគ្គជម្រុះរវាងក្រុមមានចំណាត់ថ្នាក់ទាបជាងគេប្រចាំ AFF Suzuki Cup 2020 គឺទីម័រខាងកើត ជាមួយក្រុមជម្រើសជាតិប្រ៊ុយណេ រកអ្នកឈ្នះ ឡើងទៅវគ្គចែកពូល ជាបន្តដែលមានក្រុម៩ ផ្សេងទៀតអង្គុយចាំ។
ពានរង្វាន់បាល់ទាត់ផ្នែកបុរសធំជាងគេប្រចាំតំបន់អាស៊ាន នេះរៀបចំរាល់២ឆ្នាំម្តង គិតចាប់តាំងពីបង្កើតឡើងដំបូងឆ្នាំ១៩៩៦ មកម៉្លេះ ដោយកាលនោះប្រើឈ្មោះជា AFF Tiger Cup។ ក្រុមជម្រើសជាតិថៃ ឈ្នះជើងឯកពានរង្វាន់នេះបានច្រើនជាងគេ គឺរហូតដល់៦លើក គឺនៅឆ្នាំ១៩៩៦,២០០០,២០០២,២០១៤,២០១៦,២០២០៕