ក្លិបបាល់ទាត់ An Giang FC បានប្រកាសដកខ្លួនចេញពីពានរង្វាន់លីគទី២ របស់ប្រទេសវៀតណាម (V-League 2) រដូវកាលឆ្នាំ២០២២ ខាងមុខ ខណៈការប្រកួតនេះគឺប្រកាសឡើងនៅមុនពិធីធ្វើសន្និសិទសារព័ត៌មានបើករដូវកាលថ្មី តែប៉ុន្មានថ្ងៃខាងមុខប៉ុណ្ណោះ។
ក្រុមAn Giang FC មានមូលដ្ឋាននៅខេត្ត An Giang ដែលមានព្រំប្រទល់ជាប់ខេត្តកណ្ដាល របស់កម្ពុជា ព្រមទាំងស្របតាមដងទន្លេមេគង្គ។ បើតាមសារព័ត៌មានរបស់វៀតណាម បញ្ជាក់ថាការដកខ្លួនរបស់ក្រុម An Giang FC គឺដោយសារវិបត្តិហិរញ្ញវត្ថុ។
ក្រុមមួយនេះបានប្រើប្រាស់កីឡដ្ឋាន Long Xuyên ជាទឹកដីរបស់ខ្លួន ខណៈរដូវកាលឆ្នាំ២០២១ កន្លងទៅក្រុមនេះបានប្រកួត៧ លើក មិនធ្លាប់ឈ្នះ ព្រមទាំងស្មើគ្នាបាន១លើក និងចាញ់៦លើក ទាត់ចូលទីគូប្រកួតបាន២គ្រាប់ គេទាត់ចូលវិញ១១គ្រាប់ ឈរបាតតារាងក្នុងចំណោមសមាជិក១៣ក្រុម មុនសហព័ន្ធកីឡាបាល់ទាត់វៀតនំា ប្រកាសរំសាយការប្រកួតដោយសារប៉ះពាល់ដោយជំងឺកូវីដ-១៩។
អត្ថបទពាក់ព័ន្ធ៖ក្លិប២៧នៅវៀតណាម យល់ព្រមលុបចោលលីគទី១ លីគទី២និងជើងឯកជាតិឆ្នាំ២០២១
បើតាមដំណឹងចុងក្រោយ បញ្ជាក់ថា បន្ទាប់ពីក្រុម An Giang FC ប្រកាសដកខ្លួន ធ្វើឱ្យពានរង្វាន់ V.League 2 នៅសល់ក្រុមសមាជិកតែ១២ក្រុមប៉ុណ្ណោះ ស្ថិតក្នុងបញ្ជីប៉ុណ្ណោះ៕
