ឆ្នាំ២០២១បានកន្លងទៅ ដូចជានាំនូវរឿងរ៉ាវមិនល្អ និងគ្រោះអាក្រក់ឱ្យរសាត់ផុតទៅតាម។ ចូលមកដើមឆ្នាំ២០២២នេះ ម្នាក់ៗហាក់មានសង្ឃឹមជាថ្មី ទំនងជាមានទឹកមាត់លេបឡើងវិញ។ ជាក់ស្ដែងដូចជាតារាស្រី២ដួងនេះ ម្នាក់ជាតារាចម្រៀង និងម្នាក់ទៀតជាពិធីការិនី នោះគឺ អ្នកនាង ឱក សុគន្ធកញ្ញា និងអ្នកនាង ចាន់ កែវនិមល ដែលថ្មីៗនេះ អ្នកទាំងពីរក្ដាប់បានតំណែងធំនៅក្នុងដៃតែម្ដង ដោយក្លាយជាអ្នកតំណាងឱ្យក្រុមហ៊ុន និងផលិតផលធំប្រចាំប្រទេស។ បើទោះបីជាមិនមានការទម្លាយអំពីតម្លៃខ្លួនរបស់អ្នកទាំងពីរក៏ដោយ ក៏ប៉ុន្ដែគេអាចប៉ាន់ស្មានដឹងថា មិនតិចជាងខ្ទង់ម៉ឺនៗដុល្លារនោះទេ។
ឱក សុគន្ធកញ្ញា 
ចាន់ កែវនិមល
កាលពីថ្ងៃទី ៦ ខែមករា ឆ្នាំ២០២២នេះ គេបានឃើញតារាចម្រៀងស្រី ឱក សុគន្ធកញ្ញា បង្ហាញភាពស្និទ្ធស្នាល កៀកដៃ ឱបស្អិត ជាមួយថៅកែស្រីឃូស៊ី និងផលិតកម្មរាម គឺអ្នកនាង ស្រីអូន ដោយអ្នកទាំងពីរបានចុះកុងត្រាជាមួយគ្នារយៈពេលមួយឆ្នាំពេញតែម្ដង។ ក្រុមហ៊ុនផលិតអាហារបំប៉នមួយនេះ បានជ្រើសយកតារាចម្រៀងស្រី ឱក សុគន្ធកញ្ញា ធ្វើជាអ្នកតំណាង ទាំងដែលកន្លងមកគេដឹងថាតារាចម្រៀងស្រីរូបនេះ មានតម្លៃខ្លួនថ្លៃដាច់គេក្នុងចំណោមតារាស្រីដទៃទៀតក្នុងចង្កោមសិល្បៈ។
ការក្ដាប់តំណែងធំមួយនេះ ហ្វេនរបស់អ្នកនាង ឱក សុគន្ធកញ្ញា មិនបានគិតថា អ្នកនាងនឹងដើរចេញពីហង្សមាស មកកាន់រាមនោះទេ តែបែរជានឹកសរសើរថៅកែរាមទៅវិញ ដែលអាចទាញយករាជិនីរបស់ហង្សមាស មកធ្វើការជាមួយបាន និងក្លាយជាផ្សព្វផ្សាយផលិតផលឱ្យថៅកែរាមបានទៀតផង។
ងាកមកមើលអ្នកនាង ចាន់ កែវនិមល ដែលជាពិធីការិនីល្បីឈ្មោះ និងធ្លាប់កាន់កម្មវិធីលំដាប់ពិភពលោកដែលផលិតដោយក្រុមហ៊ុនហង្សមាសនោះ នៅព្រឹកថ្ងៃទី ១០ ខែកមរា ឆ្នាំ២០២២នេះ អ្នកនាងក៏បានក្លាយជាតំណាងឱ្យធនាគារធំមួយក្នុងស្រុកផងដែរ។ ក្រៅពីពូកែវោហារសព្ទនៅលើឆាកកម្មវិធីហើយនោះ អ្នកនាង ចាន់ កែវនិមល ក៏មានរូបសម្រស់ស្អាត និងបានកម្ពស់ មិនចាញ់តារាម៉ូដែលប៉ុន្មានទេ។ អ្នកនាង កែវនិមល មិនត្រឹមតែមានកេរ្តិ៍ឈ្មោះល្បីល្បាញនៅក្នុងប្រទេសកម្ពុជាប៉ុណ្ណោះទេ ប៉ុន្តែអ្នកនាងមានអាជីពមួយគួរឱ្យកត់សម្គាល់ និងទទួលបានការគោរពនៅក្នុងអាជីពជាពិធីការនី ។
