អតីតខ្សែបម្រើរបស់ក្រុមបិសាចក្រហម Man United កីឡាករសញ្ជាតិជប៉ុន Shinji Kagawa យល់ព្រមចូលរួមជាមួយក្រុម Sint-Truiden ដែលស្ថិតនៅលីគកំពូលបែលហ្ស៊ិក Belgian First Division A។
Shinji Kagawa ចាប់ផ្តើមអាជីពដំបូងឲ្យក្លិប Cerezo Osaka ចន្លោះឆ្នាំ២០០៦/១០ បង្ហាញខ្លួនសរុប១២៥ប្រកួត ស៊ុតបញ្ចូលទី៥៥គ្រាប់។ លុះដល់ឆ្នាំ២០១០ កីឡាករវ័យ៣២ឆ្នាំរូបនេះ ត្រូវបានក្លិប Borussia Dortmund ទិញនៅក្នុងតម្លៃ៣៥ម៉ឺនអឺរ៉ូ ពីក្លិប Cerezo Osaka ចំនួន២រដូវកាល បង្ហាញខ្លួនបាន៤៩លើក ស៊ុតបញ្ចូលទី២១គ្រាប់។
បន្ទាប់ពីបង្ហាញខ្លួនបានល្អនៅទឹកដីអាល្លឺម៉ង់ Shinji ត្រូវបានលោក Sir Alex Ferguson ពេញចិត្តហើយក៏បាននាំចូលទៅកាន់ក្លិប Man United ក្នុងតម្លៃ១២លានផោន។
ក្រោយផ្លាស់ទៅកាន់ទឹកដីអង់គ្លេស កីឡាករសញ្ជាតិជប៉ុនរូបនេះហាក់ធ្វើមិនសូវបានល្អសោះឡើយ បន្ទាប់មកក៏ត្រូវបានលក់ត្រលប់ទៅកាន់ក្លិប Dortmund វិញនៅក្នុងតម្លៃ៦,៥លានផោន នៅឆ្នាំ២០១៤ ហើយនៅឆ្នាំ២០១៩ Shinji ត្រូវបានក្លិប Beşiktaş ខ្ចីជើង។
ក្រោយផុតកុងត្រាខ្ចីជើង Shinji Kagawa ក៏បានចូលរួមជាមួយក្លិប Real Zaragoza របស់ប្រទេសអេស្ប៉ាញចំនួន២ឆ្នាំដោយគ្មានតម្លៃ ហើយក៏បន្តចូលរួមជាមួយក្លិប PAOK FC នៅដើមខែមករា ឆ្នាំ២០២១ មុននឹងយល់ព្រមចូលរួមជាមួយ Sint-Truiden នៅបែលហ្ស៊ិក៕