តារាសម្ដែងម្ចាស់រហស្សនាម «តារាទឹកភ្នែក» កញ្ញា នី មុនីនាថ ធ្លាប់មានរឿងអន់ចិត្តអន់ថ្លើមគ្នាជាមួយនឹងថៅកុនម្នាក់រហូតដល់ផ្ដាច់ទំនាក់ទំនង តមមាត់តមកគ្នារាប់សិបឆ្នាំ ទម្រាំតែអាចត្រលប់មកត្រូវរ៉ូវគ្នាវិញ អ្នកទាំងពីរក៏ចេញមករៀបរាប់ពីចំណងមិត្តភាពនៅលើបណ្ដាញសង្គមចែករំលែកបទពិសោធន៍រឿងមិត្តភក្ដិអន់ចិត្តគ្នា។
សូមចុចអាន នី មុនីនាថ ច្រានចោលព័ត៌មានកែខ្ទង់ច្រមុះដែលធ្វើឱ្យមុខប្លែកជាងមុន
យោងតាមការបង្ហោះដែលកញ្ញា នី មុនីនាថ បានចែករំលែកបន្តពីអ្នកស្រី ប៊ុន ចាន់និមល ម្ចាស់ផលិតកម្មផលិតកុនដ៏ធំមួយរូបនៅក្នុងប្រទេសកម្ពុជា បានរៀបរាប់ពីចំណងមិត្តភាពរវាងគ្នាដែលការច្រឡំបន្តិចបន្តួចធ្វើឱ្យអ្នកទាំងពីរខានទាក់ទងគ្នាជាច្រើនឆ្នាំ។
ថៅកែកុនខាងលើបានរៀបរាប់លើហ្វេសប៊ុករបស់ខ្លួនថា៖ «មិត្ត Ny Monyneath ខ្ញុំ និងមិត្តខ្ញុំម្នាក់នេះ ធ្លាប់ឆ្លងកាត់គ្រាកម្សត់ជាមួយគ្នា ជួយគ្នាទៅវិញទៅមក តែក្រោយមកយើងក៏មានរឿងអន់ចិត្តមិននិយាយរកគ្នា៧ឆ្នាំ។ រយៈក្រោយមកយើងចាស់ទុំចិត្តគំនិត យើងក៏បានហៅរកគ្នា ហើយយើងក៏ត្រឡប់មកជិតដិតនឹងគ្នាវិញ។ ធម្មតារាប់អានគ្នាស្និទ្ធ ក៏ងាយមានរឿងប៉ះអារម្មណ៍ តែពេលមានរឿងមិនព្រមនិយាយគ្នាតទល់ វាក៏ធ្វើឲ្យកើតការយល់ច្រឡំ។យ៉ាងណាពេលនេះយើងដឹងហើយថាកាលណោះចិត្តយើងម្នាក់ៗ ពេញដោយសេចក្តីប្រកាន់ ឥលូវយើងរៀនអប់រំចិត្តបានច្រើន ព្រោះយើងទម្លាប់ ស្តាប់ធម៌ និងអានសៀវភៅ សូមឲ្យមិត្តភាពយើងមានភាពចាស់ទុំដូចអាយុយើងណា យើងរាប់អានគ្នាតាំងពីឆ្នាំ2008»
ងាកមកកញ្ញា នី មុនីនាថ ឯណេះវិញក៏បានចែករំលែកផុសខាងលើព្រមទាំងដាក់ Caption ខ្លីតែមានន័យមិនចាញ់គ្នាដែរថា៖ «វាពិតជារយៈពេលយូរណាស់ដែរយើងមិនបានទាក់ទងគ្នា មិននិយាយរកគ្នា អរគុណក្ដីស្រលាញ់មិត្តភាពមួយនេះ ខ្ញុំចង់ប្រាប់ថាខ្ញុំពិតជាស្រលាញ់ណាស់និងនឹកខ្លាំងណាស់ Bun Channimol»
ចំណងមិត្តភាពដ៏ស្មោះត្រង់ដែលឆ្លងកាត់ការយល់ច្រឡំដ៏យូរអង្វែងមួយនេះ ត្រូវបានអ្នកគាំទ្រចូលមកអបអរសាទរនិងជូនពរឱ្យមិត្តភាពរបស់អ្នកទាំងពីរស្អិតល្មួត និងលែងមានជួបការប្រេះឆារវាងគ្នាទៀត៕
