មួយរយៈកាលនេះ គេកត់សម្គាល់ឃើញថា មានអ្នកសិល្បៈជាច្រើនបានជាប់គាំងក្នុងបំណុល និងការចាញ់បោករឿងលុយកាក់ ដោយបានលើកមកបង្ហោះសារលើបណ្ដាញផ្សព្វផ្សាយសង្គមហ្វេសប៊ុកឱ្យសាធារណៈជនបានដឹងថា បុគ្គលនេះឬបុគ្គលនោះជាអ្នកបោកប្រាស់លុយ បុគ្គលនេះឬបុគ្គលនោះជំពាក់បំណុលខ្លួនមិនព្រមដោះស្រាយហើយរត់គេចបាត់ស្រមោល ខ្លះថាខ្លួនត្រូវមេតុងទីនបោកលុយមិនបង្វិលលុយឱ្យវិញ ហើយនិងមានខ្លះទៀតថាជំពាក់បំណុលចិនវ័ណ្ដកហើយប្រកាសខ្លួនក្ស័យធនតែម្ដង។
វិបត្តិរបស់អ្នកសិល្បៈត្រូវបានគេឃើញកើតមានឡើងច្រើន ក្រោយជួបបញ្ហាលំបាកនៃស្ថានភាពកូវីដ១៩ ខណៈការសម្ដែងជាច្រើនកម្មវិធីត្រូវបានលុបចោល គ្មានការច្រៀងនៅក្នុងកម្មវិធីកាត់សក់មង្គលការ គ្មានការដើរបង្ហាញម៉ូដ ឬថតនិងសម្ដែងភាពយន្ដនោះទេ ដោយសារត្រូវការពារ និងរក្សាគម្លាតសង្គម ដើម្បីរីករាលដាលនៃជំងឺកូវីដ១៩។ ហើយថ្មីៗនេះគេបានក៏ឃើញមានតារាចម្រៀងមួយចំនួន បង្ហោះសារនៅលើហ្វេសប៊ុកឱ្យមហាជនបានដឹងថា ខ្លួនកំពុងចាញ់បោកមេតុងទីនម្នាក់ ហើយក៏មានអ្នកនៅក្នុងចង្កោមសិល្បៈក៏ចាញ់បោកបុគ្គលនោះដែរ។
ដោយឡែកគេក៏បានឃើញតារាចម្រៀងស្រី ទេព បូព្រឹក្ស ដែលជាម្ចាស់បទ «វីរនារី» បង្ហាញតម្រុយរឿងតុងទីននៅហ្វេសប៊ុករបស់ខ្លួនដែរ រហូតធ្វើឱ្យហ្វេនគាំទ្រសង្ស័យថា កញ្ញា ទេព បូព្រឹក្ស ប្រហែលជាត្រូវមេតុងទីនបោកប្រាស់លុយកាក់ដែរហើយមើលទៅ?។ កញ្ញា ទេព បូព្រឹក្ស ដំបូងឡើយបានបង្ហោះសារថា «បទថ្មីចេញក្នុងពេលឆាប់ៗ ចំណងជើង តុងទីន ទាន់?😩» ។ ក្រោយពីបង្ហោះបែបនេះហើយ ហ្វេនជាច្រើនបានចូលឬទៅ Comment បន្ដ ហើយក្នុងនោះក៏មានអ្នកសិល្បៈជាច្រើននាក់ចូល Comment ផងដែរ។
ជាក់ស្ដែងគេឃើញមានអ្នកនាង គង់ ចាន់ស្រីមុំ បាន Comment ថា «ចាំបងថែមចំណងជើងមួយទៀត “កាត់ចិត្តទៅថ្លៃ” 😫» ហើយ Alex CoNan Real ក៏បាន Comment ថា«ស្រណោះមេតុងទីន» ភ្លាមៗនោះ ហ្វេសប៊ុកកញ្ញា ទេព បូព្រឹក្ស ក៏បានព្លយពាក្យចេញមកថា «ចែអូនឯងឡូវសើចយំសើចយំដូចអីទេ»។ យ៉ាងណាក្ដីគេក៏ឃើញមាន Comment ជាច្រើនទៀត ដូចឱ្យតម្រុយថា កញ្ញា ទេព បូព្រឹក្ស កំពុងតែគាំងរឿងតុងទីន ហើយចង់យំក៏មិនចេញ ចង់សើចក៏មិនចេញ។ យ៉ាងណាមិញ សារព័ត៌មានត្រយងបានព្យាយាមសុំការបំភ្លឺបន្ថែមពីកញ្ញា ទេព បូព្រឹក្ស ថាពិតជាបានចាញ់បោករឿងទុងទីនពិតប្រាកដមែនទេ? ក៏ប៉ុន្តែនៅមិនទាន់ឃើញមានការឆ្លើយតបនៅទេ៕
