ហ្វេនអ្នកគាំទ្រច្បាស់ជានៅចាំភាពយន្ត និងប្រលោមលោក «សង្សារ ១៤ថ្ងៃ» របស់អតីតអ្នកនិពន្ធទំនុកច្រៀងល្បីឈ្មោះក្នុងផលិតកម្មរស្មីហង្សមាស គឺលោក សុខ ចាន់ផល ដែលភាពយន្ដបែបស្នេហាយុវវ័យនេះ បានពន្យាពេល និងអូសបន្លាយថ្ងៃចាក់បញ្ចាំងយ៉ាងច្រើនខែមកហើយ រហូតធ្វើឱ្យហ្វេនអ្នកគាំទ្រអន្ទះសាចង់ទស្សនាខ្លាំង។
យ៉ាងណាមិញ ភាពយន្ដនេះក៏មានវត្តមានតារាសម្ដែងល្បីៗជាច្រើនដួងដូចជា លោក ហូ សារៈ កញ្ញា ស៊ឹម ស្រីនិច្ច លោក សាន់នី លោក លី សុខណេត និងតារាសម្តែងថ្មីៗមួយចំនួនទៀតផងដែរ។ តាមរយៈរូបភាព Poster និងក្របសៀវភៅប្រលោម «សង្សារ ១៤ថ្ងៃ» អ្វីដែលហ្វេនចាប់អារម្មណ៍ខ្លាំងបំផុតនោះគឺ រូបរាងសង្ហារបស់តួឯកប្រុសលោក ហូ សារៈ ជាអតីត Freshie Boy លេខ ១ ជំនាន់ទី១០ នៅឆ្នាំ២០១១។ មកទល់ពេលនេះ តារាសម្ដែងប្រុសរូបនេះ ក៏មិនសូវជាចេញមុខក្នុងការសម្ដែងភាពយន្ដ ឬរឿងភាគទូរទស្សន៍ប៉ុន្មានដែរ ក៏ប៉ុន្តែលោកបានលេចមុខសម្ដែង MV ថ្មីៗមួយបទៗឱ្យផលិតកម្មហង្សមាស។
យ៉ាងណាក្ដី ថ្មីៗនេះលោក ហូ សារៈ ក៏បានទម្លាយរូបភាពម្ចាស់បេះដូងឱ្យមហាជនបានដឹងនិងស្គាល់មុខឥតលាក់លៀម។ បើតាមការបង្ហោះរបស់លោក ហូ សារៈ នៅលើបណ្ដាញសង្គមហ្វេសប៊ុក បានឱ្យដឹងថា ម្ចាស់បេះដូងរបស់លោកមានឈ្មោះគណនីហ្វេសប៊ុក Voleak Morm ហើយអ្នកទាំងពីរតែងតែបង្ហាញភាពស្អិតរមួត និងផ្អែមល្ហែមជាមួយគ្នា ដែលធ្វើឱ្យហ្វេនកើតចិត្តច្រណែន។ បើនិយាយរូបសម្រស់របស់គូស្នេហ៍តារាសម្ដែងប្រុសនេះវិញ ក៏មិនចាញ់តារាសម្ដែង ឬតារាបង្ហាញម៉ូដប៉ុន្មានដែរ ពោលគឺមានសប្បុរសស រាងតូចច្រលឹង កម្ពស់ខ្ពស់ និងស្នាមញញឹមស្រស់ ទើបបានជាធ្វើឱ្យលោកស្រឡាញ់ស្ទើលេបតែម្ដង៕