រឿងរ៉ាវកក្រើកបណ្ដាញសង្គមកាលពីយប់ថ្ងៃទី២៦ ខែមករា ឆ្នាំ២០២២ ម្សិលមិញនេះ គឺជារឿងដែលអ្នកលេងបណ្ដាញសង្គមម្នាក់បានចេញមកត្អូញត្អែររឿងដែលកំពូលតារាចម្រៀងល្បីលោក ឆន សុវណ្ណារាជ តែងតែ Call ទៅលោកនិងស្នើសុំឱ្យតារារូបនេះបញ្ឈប់ទូរស័ព្ទទៅលោកឬប្រពន្ធលោកទៀត។
គណនីហ្វេសប៊ុកមួយបានចេញមកបង្ហោះរឿងដែលលោកតែងតែទទួលបានទូរស័ព្ទលោក ឆន សុវណ្ណារាជជាប់ជាប្រចាំ រាល់ៗថ្ងៃ ដោយក្នុងនោះភរិយារបស់លោកក៏ទទួលបានទូរស័ព្ទដូចគ្នាដែរ ទោះជាលោកបានបិទ (Block) មិនឱ្យទូរស័ព្ទចូលបានក៏នៅតែទំនាក់ទំនងទៅលេខដែលលោកប្រើផ្សេងៗទៀតដែរ។
ម្ចាស់គណនីដដែលបានត្អូញត្អែរថា ខ្លួនលោកធ្វើការហត់នឿយ ពេលថ្ងៃត្រង់ចង់សម្រាក ប៉ុន្តែបែរជាទទួលបានទូរស័ព្ទ Call ចូលមិនឈប់។ លោកបានបន្ថែមទៀតថាក្រៅពីក្រុមគ្រួសារលោកហើយ បងប្អូនមិត្តភក្ដិលោកក៏មានវាសនាមិនខុសគ្នាដែរ។ លោកបានសំណូមពរឱ្យតារាចម្រៀង ឆន សុវណ្ណារាជ ឈប់ខលទៅលោក ហើយលក់ផលិតផលដូចជា ដី ផ្ទះ ខុនដូរ នៅតាមផេកវិញល្អជាង។
«លោក ឆន សុវណ្ណរាជ អើយឈប់បានឈប់ទៅ ឈប់ Call មកទៀត លោកមានដី មានផ្ទះ មានខុនដូរ លោក ផុសលក់តាមផេកលោកទៅ មិនបាច់ Call មករាល់ថ្ងៃទេ ខលមកខ្ញុំមិនអស់ចិត្ត call មកប្រពន្ធខ្ញុំទៀត ខ្ញុំបាន Block លេខលោក 2 ខ្សែរហើយ នៅ call ទៅប្រពន្ធខ្ញុំទៀត។ ថា call ក៏ call ចុះ តែសុំមើលម៉ោងពេលផង ខ្ញុំអ្នកធ្វើការ ហត់ណាស់ មានពេលបន្តិចបន្តួចសម្រាកថ្ងៃត្រង់ លោក call មកមិនឱ្យសម្រាកទៀត ។ call មកអស់ហើយមិនថាខ្ញុំ ប្រពន្ធខ្ញុំ ចូលដល់បងប្អូនខ្ញុំទៀត។ លោកធ្វើអញ្ចឹងដើម្បីអី បាត់ប្រជាប្រិយភាពហើយ។ សូមអរគុណលោក បើឈប់ call មកខ្ញុំទៀត។»
ការលើកឡើងរបស់បុគ្គលខាងលើនេះត្រូវបានអ្នកលេងបណ្ដាញសង្គមជាច្រើនរូបទៀតចូលមក Comment , Share និង Like ព្រមទាំងគាំទ្រការលើកឡើងទាំងស្រុងដូចអ្វីដែលលោកបាននិយាយនៅខាងលើនេះ។
តាមពិតសំឡេង Call ចូលដែលបង្កឱ្យមានការរំខានដល់អ្នកប្រើប្រាស់ប្រព័ន្ធទូរស័ព្ទមួយចំនួននេះ ទើបតែកើតឡើងក្នុងពេលថ្មីៗនេះទេ ដោយមនុស្សភាគច្រើនទទួលបានទូរស័ព្ទដែលមានសំឡេង Record របស់លោក ឆន សុវណ្ណារាជរៀបរាប់ពីគម្រោងលក់ខុនដូរ។
ជុំវិញមតិរិះគន់ខាងលើនេះ សារព័ត៌មានត្រយងកំពុងព្យាយាមទំនាក់ទំនងទៅលោក ឆន សុវណ្ណារាជដើម្បីស្នើសុំការស្រាយបំភ្លឺប៉ុន្តែទូរស័ព្ទរបស់លោកជាប់រវល់៕